خیبر پختونخوا وچ کوئی بے ایمان نہیں، پورا صوبہ جنت دا ٹکڑا اے: خواجہ آصف

اسلام آباد: مسلم لیگ (ن) دے رہنما خواجہ آصف آکھیا اے خیبر پختونکوا وچ کوئی بے ایمان نہیں تے پورا صوبہ جنت دا ٹکڑا اے۔ قومی اسمبلی وچ اظہار خیال کردیاں خواجہ آصف آکھیا سپیکر قومی اسمبلی نے اک پارلیمانی کمیٹی بنائی تے سارے بلز ایس کمیٹی نوں گھلن تے ایکا ہویا، ایف اے ٹی ایف دے بلز اُتے تقریباً اتفاق رائے ہو چکیا سی۔ سرکار اپوزیشن نیب قنون تے مذاکرات سپیکر ہاؤس وچ ہوئے، مذاکرات وچ صلاحواں ساہمنے آئیاں سین۔ ایہناں صلاحواں نوں وزیر خارجہ نے پچھلے دیہاڑ ڈیڑھ گھنٹہ بیان کیتا، اسیں اپنی رائے صلاح دتی سی کوئی مطالبہ نہیں کیتا سی۔ صلاح اُتے رنگ بازی کیتی گئی، ساڈے بارے ایہ تاثر پیدا کیتا گیا کہ اسیں ملکی مفاد دے خلاف گل کیتی، ساڈے بارے تاثر بنایا گیا جیویں اسیں سب نیب زدہ آں تے اپنے مفاد دے نیب قوانین بنانا چاہنے آں۔خیبر پختونخوا وچ احتساب کمیشن ای بند کر دتا، صوبے دے نیب سربراہ نوں استعفیٰ دین تے مجبور کر دتا، خیبر پختونخوا وچ کوئی بے ایمان نہیں تے پورا صوبہ جنت دا ٹکڑا اے۔ ایہناں وچ جنے کرپٹ بیٹھے نیں ایہدی مثال نہیں ملدی۔پی ٹی آئی دے خلاف نیب کیوں کوئی ریفرنس نہیں بناندا، مالم جبہ، بلین ٹری تے غیر ملکی فنڈنگ سنے اوہناں نوں سب اُتے چھوٹ اے؟