پنجاب وچ گڈ گورننس لئی کونسل تشکیل، وزیراعلیٰ عثمان بزدار سربراہ ہون گے

لہور: وزیراعلیٰ پنجاب دی ہدایت تے گڈ گورننس کونسل تشکیل دے دتی گئی۔ عثمان بزدار کونسل دے سربراہ ہون گے۔ صوبائی وزیراں میاں محمود الرشید، یاسمین راشد، یاسر ہمایوں، مراد راس تے فیاض الحسن چوہان سنے دوجے اراکین پنجاب اسمبلی وی گڈ گورننس کمیٹی دے ممبران ہون گے۔ عثمان بزدار دا کہنا سی صوبے وچ گڈ گورننس نوں یقینی بنان لئی آخری حد تک جاواں گے، لہور دے بعد دوجے شہراں دے وی سر پرائز وزٹ کراں گا، دفتر بیٹھن دی بجائے فیلڈ وچ جا کے زمینی حقائق آپ ویکھنا آں، پچھلی رات لہور دا تن گھنٹے تفصیلی دورہ کرکے عوامی مسئلیاں توں آگاہی حاصل کیتی، کوتاہی تے فرائض توں غفلت ورتن تے فوری ایکشن لیندیاں متعلقہ افسراں دے خلاف کاروائی عمل وچ لیائی گئی۔ وزیراعلیٰ پنجاب ہور آکھیا پچھلے حکمران 30ورھیاں وچ اوہ کم نہ کر سکے جہڑا تحریک انصاف دی سرکار نے قلیل مدت وچ کیتا اے،2ورھے وچ صوبے دے عوام نوں بہترین خدمات دی فراہمی لئی محکمیاں وچ بے پناہ اصلاحات کیتی گئیاں نیں، کسے نوں عوامی خدمت دے سفر وچ حائل نہیں ہون دیواں گے، عوام دا نمائندہ آں تے اوہناں دے مسئلے حل کرنا میری ذمہ داری اے۔