ٹیچنگ ہسپتالاں، ڈی ایچ کیوز تے دیہی مراکز وچ ڈاکٹراں دی کمی نوں پورا کیتا جائے: یاسمین راشد

لہور: وزیر صحت پنجاب ڈاکٹر یاسمین راشد نے ہدایت کیتی اے ٹیچنگ ہسپتالاں، ڈی ایچ کیوز تے دیہی و بنیادی صحت مراکز وچ ڈاکٹراں دی کمی نوں پورا کیتا جائے۔ انسٹی ٹیوٹ آف پبلک ہیلتھ دی استعداد کار نوں ہور ودھایا جائے گا۔ صوبائی وزیر صحت ڈاکٹر یاسمین راشد دی زیر صدارت محکمہ سپیشلائزڈ ہیلتھ کیئر اینڈ میڈیکل ایجوکیشن وچ اعلیٰ سطحی اجلاس ہویا۔ صوبائی وزیر صحت یاسمین راشد نے اجلاس دے دوران ٹیچنگ ہسپتالاں، ڈی ایچ کیوز، دیہی تے بنیادی صحت مراکز وچ ہیومن ریسورس، ڈاکٹراں دی اگلے گریڈ وچ ترقی لئی پیش رفت تے نویں بھرتی بارے تجاویز دا جائزہ لیا۔ سیکرٹری محکمہ پرائمری اینڈ سکینڈری ہیلتھ کیئر کیپٹن (ر) عثمان یونس نے صوبائی وزیر صحت نوں ڈی ایچ کیوز، دیہی و بنیادی صحت مراکز وچ ڈاکٹراں دی خالی آسامیاں تے بھرتی تے موجودہ سٹاف دی تفصیلات توں آگاہ کیتا۔ڈاکٹراں دی اگلے گریڈ وچ ترقی لئی دفتری معاملات نوں جلد نبیڑیا جائے۔ ایم ایس حضرات دی تعیناتی دے دوران تجربہ، قابلیت تے شہرت تے بالکل سمجھوتہ نہیں کیتا جا رہیا۔ وزیراعظم صحت اقدامات دے تحت 8ضلعیاں دے سرکاری ہسپتالاں دے حالات بہتر کیتے جا رہے نیں۔