پاکستان دا کلبھوشن دے معاملے تے بھارت نال اک وار فیر سفارتی رابطہ

اسلام آباد: ترجمان دفتر خارجہ دا کہنا اے پاکستان نے کلبھوشن دے معاملے تے بھارت نوں اک ہور موقع دین لئی سفارتی رابطہ کر لیا اے۔ ترجمان دفتر خارجہ عائشہ فاروقی نے ہفتہ وار بریفنگ وچ آکھیا پوری دنیا وچ کل مقبوضہ کشمیر وچ بھارتی ظلم دے خلاف آوازاں چکیاں گئیاں تے مقبوضہ کشمیر وچ بھارتی یکطرفہ اقدام نوں یکسر رد کیتا گیا، ہیومن رائٹس واچ نے وی بھارتی غیر قنونی اقدامات بارے بیان دتا۔ترجمان دا کہنا سی 4اگست نوں پاکستان نے سیاسی نقشہ جاری کیتا، پاکستان دے سیاسی نقشہ دے اجراء تے اراکین پارلیمان نوں پہلے اعتماد وچ لیا گیا، سیاسی نقشہ جاری کرنا ویلے دی لوڑ سی جد کہ پاکستان دے سیاسی نقشہ وچ جموں و کشمیر نوں پاکستان دا حصہ وکھانا تضاد نہیں۔ اوہناں آکھیا پاکستانی سیاسی نقشے نے پچھلے ورھے جاری ہون والے بھارتی نقشے دی نفی کیتی جد کہ پاکستان اپنے سیاسی نقشے دے اجراء تے بھارت دے بیان نوں رد کردا اے۔ ترجمان آکھیا 5اگست 2019ء توں پاکستان نے کشمیر تے او آئی سی دے نال 3اجلاس کیتے، او آئی سی نے کشمیر تے مضبوط بیانات دتے پر اسیں چاہنے آں کہ او آئی سی اپنا قائدانہ کردار ادا کرے جد کہ سعودی عرب نال ساڈے قریبی برادرانہ تعلقات موجود نیں۔