وزیراعظم نے برطانوی شہریت ترک کرن دا آکھیا تے 2سیکنڈز نہیں لاواں گا: زلفی بخاری

اسلام آباد: معاون خصوصی برائے سمندر پار پاکستانی زلفی بخاری آکھیا اے وزیراعظم نے برطانوی شہریت ترک کرن دا آکھیا تے 2سیکنڈز توں ودھ ویلا نہیں لاواں گا۔ بین الاقوامی ویب سائٹ نوں دتے گئے انٹرویو وچ زلفی بخاری دا کہنا سی ساڈے اگلے 8سال پاکستان لئی بڑے بہترین ہون گے، ایس توں پہلاں اسیں کدھرے نہیں جا رہے، 8سال لئی اپوزیشن کوئی نوکری لبھ لوے تے کم کرے، بہت ہو گیا دیس نوں لوٹنا، کجھ ہن محنت وی کر لوے۔ دہری شہریت رکھن والے مشیراں تے معاون خصوصی اُتے تنقید دے حوالے نال زلفی بخاری آکھیا ساڈے اُتے الزام لائے جاندے نیں کہ ایہ تے پہلا موقع ملے گا بھج جاواں گے۔ میں پاکستان وچ آں، اوہ آپ لندن بھجے ہوئے نیں، میں پاکستان وچ آں تے اوہناں دے بال باہر بھجے ہوئے نیں۔ میں پاکستان وچ آں تے اوہناں دے اقامے نکل رہے نیں۔ دہری شہریت دے مسئلے تے خواجہ آصف دی تقریر توں اوہ اوہناں دی گل نہیں من لین گے سگوں ایس بارے فیصلہ باقاعدہ بحث دے بعد ہونا چاہیدا اے۔ خواجہ آصف نوں بیرون ملک توں ہر مہینے 20لکھ روپے کہڑی گل دے آرہے نیں۔ میرا تے پورا کاروبار بیرون ملک اے، اوہناں دے کہڑی گل دے پیسے آ رہے نیں، اجیہا کہڑا کم اوہ کردے نیں جو دس نہیں سکدے۔