پارک لین ریفرنس، نیب دے دائرہ اختیار دے خلاف آصف زرداری دی عرضی رد

اسلام آباد: احتساب عدالت نے پارک لین ریفرنس وچ نیب دے دائرہ اختیار دے خلاف آصف زرداری دی عرضی رد کردیاں پیر دے دیہاڑ فرد جرم لاگو کرن دا فیصلہ کیتا اے۔ احتساب عدالت وچ پارک لین ریفرنس دی سنوائی ہوئی۔ قومی احتساب بیورو (نیب) نے پیپلزپارٹی دے شریک چیئرمین آصف زرداری دی بریت دی عرضی خارج کرکے اوہناں تے فرد جرم لاگو کرن دی استدعا کیتی۔ ایس موقع تے آصف زرداری نے آپ ای اپنی بریت دی عرضی واپس لین دی استدعا کر دتی۔ نیب ڈپٹی پراسیکیوٹر جنرل آکھیا سارے دلائل مکمل ہون دے بعد آصف زرداری عرضی واپس نہیں لے سکدے، ملزم جان بوجھ کے تاخیری حربے استعمال کر رہیا اے، اک مہینہ فرد جرم موخر کروا کے اج جواب الجواب تے عرضی واپس لے رہے نیں۔ احتساب عدالت نے پارک لین ریفرنس وچ بری کرن، ریفرنس خارج کرن تے عدالتی دائرہ اختیار دے خلاف آصف زرداری دی دوواں عرضیاں رد کردیاں پیر دے دیہاڑ اوہناں تے فرد جرم لاگو کرن دا فیصلہ کیتا اے۔ فاضل جج آکھیا پارک لین نیب دا کیس ای بن دا اے۔