کرپشن وچ ملوث افسر نوں نوکری توں فارغ کر دتا جائے گا: وزیراعظم

لہور: وزیراعظم عمران خان نے صوبہ پنجاب دی صورتحال تے برہمی دا اظہار کردیاں آکھیا اے ایتھے ہیٹھلی سطح تے بہت زیادہ کرپشن اے، جہڑا افسر وی ملوث ہووے گا، نوکری توں فارغ کر دتا جائے گا۔ وزیراعظم عمران خان نے پلس تے پٹوار کلچر ختم کرن دی ہدایت کردیاں آکھیا پلس تے بیورو کریٹاں نوں بہت زیادہ الاؤنسز دتے، تنخواہواں وی بہتر کر دتیاں، ہن رزلٹ دیو، تفصیل دے مطابق لہور وچ وزیراعظم عمران خان دی زیر صدارت ویڈیو لنک دے راہیں اجلاس ہویا جہدے وچ پنجاب بیورو کریسی تے پلس افسراں نے رلت کیتی۔ وزیراعظم دا دوران خطاب کہنا سی جہڑا غلط کم یا کرپشن کرے گا، اوس پلس افسر تے بیورو کریٹ نوں فارغ کیتا جائے گا۔ اوہناں نے حکم دتا پنجاب وچ تھانہ کلچر نوں تبدیل جد کہ پلس تے پٹوار کلچر توں کرپشن نوں ختم کیتا جائے۔ پنجاب دے تھانے دے معاملات نوں بہتر بناؤ۔ اسیں پلس تے بیورو کریٹاں نوں الاؤنسز دتے، تنخواہواں وی بہتر کر دتیاں، ہن رزلٹ دیو۔ بیورو کریسی نوں جہڑے ٹاسک دتے، ایہدے تے عملدرآمد کرنا چاہیدا اے۔وزیراعظم نے بیورو کریسی تے پلس افسراں نوں حکم دتا لوکاں دے نال چنگے سلوک نال پیش آؤ، عوام نوں جناں ہو سکے ریلیف دیو۔ اوہناں نے کورونا وائرس دے خلاف زبردست اقدام تے پنجاب حکومت تے بیورو کریسی دی تعریف کیتی۔ دوجے پاسے خبراں نیں ممبران قومی اسمبلی نے وزیراعظم عمران خان نال ملاقات وچ شکایتاں دے ڈھیر لا دتے۔ وزیراعظم نے سخت اظہار برہمی کردیاں وزیراعلیٰ نو ں اگلے ہفتے فیصل آباد جان دا حکم دے دتا اے۔ ذرائع دے مطابق ممبران قومی اسمبلی دا کہنا سی ساڈے ضلع وچ ایس ایچ اوز تے ڈی ایس پیز کھل کے کرپشن کر رہے نیں جد کہ علاقیاں نوں ترقیاتی فنڈز توں محروم رکھیا گیا اے۔