نیب دا شہباز شریف دے خلاف صاف پانی انکوائری بند کرن دا فیصلہ

لہور: مسلم لیگ (ن) دے صدر شہباز شریف لئی چنگی خبر ایہ اے کہ نیب لہور نے صاف پانی کرپشن انکوائری دی ہور تحقیقات نہ کرن تے کیس متعلقہ محکمیاں نوں گھلن دا فیصلہ کیتا اے۔ وسیلیاں دے مطابق نیب لہور نے قومی اسمبلی وچ اپوزیشن لیڈر شہباز شریف دے خلاف صاف پانی ساؤتھ کمپنی انکوائری بند کرن لئی چیئرمین نیب توں منظوری منگ لئی۔ چیئرمین نیب نوں پیش کیتی سفارشات وچ آکھیا گیا اے صاف پانی منصوبے وچ پنجاب پروکیورمنٹ رولز 2014دی شق 45دی سب شق 5دی خلاف ورزی کیتی گئی جد کہ ای سی ایس پی تے اربن یونٹ نوں غیر ملکی فرمز دے نال رل کے کنٹریکٹ دتے گئے پر پیرا رولز 2014غیر ملکی یا پرائیویٹ فرمز دے حکومتی کمپنیاں نال معاہدے تے چپ اے۔

نیب انکوائری وچ آکھیا گیا غیر ملکی کمپنیاں نوں 19کروڑ 59لکھ 70ہزار دی رقم ادا کیگی گئی جد کہ صاف پانی جنوبی پنجاب آفس 2سال دے کرائے دی مد وچ 6کروڑ 48لکھ 29ہزار دی رقم ادا کیتی گئی۔ ذرائع دے مطابق نیب صاف پانی کمپنی کیس دی ہور تحقیقات نہیں کرے گا تے ایہ کیس متعلقہ اداریاں ہاؤسنگ اینڈ اربن ڈویلپمنٹ تے پبلک ہیلتھ انجینئرنگ ڈویلپمنٹ ڈیپارٹمنٹ نوں گھلن دی سفارشات کیتی گئی اے۔