بلیک میل کرن دی بجائے ہمت اے تے مینوں گرفتار کرو، مریم نواز دا چیلنج

کراچی: مسلم لیگ (ن) دی نائب صدر مریم نواز دا کہنا اے قریبی رشتیاں دے ذریعے بلیک میل کرن دی بجائے ہمت اے تے مینوں گرفتار کرو۔ مسلم لیگ (ن) دے رہنما کیپٹن صفدر دی گرفتاری تے اوہدے بعد عدالت پیشی دے بعد پی ڈی ایم دے سربراہ فضل الرحمان نے پی ڈی ایم دا اجلاس ہویا۔اجلاس وچ مریم نواز، اختر مینگل، میاں افتخار، اویس نورانی، راجہ پرویز اشرف، پرویز رشید، مریم اورنگزیب تے راشد محمود سومرو سنے دوجے رہنما شریک ہوئے۔ اجلاس وچ کیپٹن صفد ر دی گرفتاری تے گل بات تے مشاورت کیتی گئی۔

اجلاس مگروں پریس کانفرنس کردیاں مریم نواز دا کہنا سی قائداعظم دے مزار تے اوہناں دے فرمودات نوں دہرانا کہڑا گناہ اے؟ قائداعظم دے مزار تے نوازشریف زندہ باد یا مریم زندہ باد دے نعرے نہیں لگے سگوں صرف ووٹ نوں عزت دیو دے نعرے لائے گئے، مزار قائد تے ہلڑ بازی پی ٹی آئی نے کیتی سی تے ساڈا مزار قائد تے ووٹ نوں عزت دیو دا نعرہ وی گناہ بن گیا۔ رہنما مسلم لیگ (ن) آکھیا سرکار نے ساڈا کم آسان کر دتا تے سانوں قوم نوں دسن دا موقع دتا کہ نوازشریف سچ کہندے نیں کہ ملک وچ ریاست دے اندر ریاست نہیں سگوں ریاست توں بالا ریاست اے، قریبی رشتیاں دے ذریعے بلیک میل کرن دی بجائے ہمت اے تے مینوں گرفتار کرو، جے کوئی سمجھدا اے کہ اسیں دھمکیاں توں ڈر جاواں گے تے ایہ ایہدی خام خیالی اے۔