سرکاربدنام کر رہی اے، سارے ثبوت دیاں گا، خواجہ آصف دا نیب وچ جواب

لہور(پنجابی میڈیا گروپ) اقامہ کیس وچ مسلم لیگ (ن) دے رہنما خواجہ آصف نیب دی تحقیقاتی ٹیم دے ساہمنے پیش ہو گئے۔ اوہناں توں پونے دو گھنٹے تحقیقات کیتی گئیاں۔ اوہناں نے الزام لایا سرکار اپوزیشن نوں بدنام کر رہی اے۔ نیب نوں سارے ثبوت دیواں گا۔ تفصیل دے مطابق خواجہ آصف اقامہ کیس وچ نیب دی تحقیقاتی ٹیم دے ساہمنے پیش ہوئے ۔ نیب نے لیگی رہنما توں 2004ء توں 2017ء تک اقامہ دی تفصیلات منگیاں سن۔ خواجہ آصف نے نیب وچ تحریری طور تے وی اپنا جواب جمع کروایا۔ اپنے جواب وچ اوہناں نے تحریک انصاف دے رہنما عثمان ڈار نوں آڑے ہتھاں لیا تے آکھیا سرکار اپوزیشن رہنماواں نوں بدنام کرن دی مذموم کوشش کر رہی اے۔ ایہ سارے اقدامات ناقص کارکردگی توں توجہ ہٹان لئی نیں۔ اوہناں نے الزام لایا وزیراعظم عمران خان تے عثمان ڈار اپنے مخالفاں توں بدلہ لین لئی حکومتی اداریاں نوں استعمال کر رہے نیں۔ جواب وچ آکھیا گیا سابق ڈی جی ایف آئی اے دے انکشافات توں ساری چیزاں واضح ہوندیاں نیں۔لیگی رہنما خواجہ آصف نے اپنے جواب وچ واضح کیتا نیب ولوں سپریم کورٹ دی وضاحت نوں نہیں من دا۔ آمدن توں ودھ اثاثے بنان تے منی لانڈرنگ دے الزامات بے بنیاد تے من گھڑت نیں۔