کشکولی آگو

طاہر وزیر آبادی

ویکھو جی سرکاراں ویکھو
بجلی نہیں بس تاراں ویکھو
بے بس عاجز سڑکاں اُتے
مزدوراں دیاں ڈاراں ویکھو
جہڑی شے نہیں لبھدی اوہدا
کیکن بل میں تاراں ویکھو
مرچ مصالہ گھیو تے پتی
جعلی ہین وساراں ویکھو
آٹا دال تے چاول کھپے
بلدی اگ بزاراں ویکھو
منگھیائی دا سورج تتا
سڑ گئے لوک ہزاراں ویکھو
ات گردی دے اُچے لانبو
روز حیاتی ہاراں ویکھو
آکھے اپنے گھر نوں ساڑو
غیر دیاں وگیاراں ویکھو
جمہور پاگل جھلا کیتا
قوم دیاں جہداں ویکھو
ویکھو ہن تے کجھ نہیں پلے
پلاّ کنج کھلاراں ویکھو
ساڈے سب کشکولی آگو
دسدے روز بہاراں ویکھو
مٹی کیتا دیس دا سونا
سیاست دے فنکاراں ویکھو
میں دھرتی دا جایا طاہر
جند دھرتی توں واراں ویکھو