کوک

نسیم نصرت گڈو

میں اڈن ہار کبوتری
میرا بدلاں نال سنجوک
میرے کٹے پر صیاد نے
جد ہوئی میں اڈن جوگ
میرے پیریں رون جھانجھراں
تے سینے اُٹھدی ہوک
میرا جسا چیکاں مار دا
میری کوئی نہ سُن دا کوک
میرے دل وچ سدھراں روندیاں
مینوں لگیا برہوں روگ
میں اڈن ہار کبوتری
میں بدلاں نال سنجوگ
میں ازلاں توں اسیر ہاں
میری ٹٹی نہ زنجیر
میری انج حیاتی ہو گئی
جیویں جھاڑی ٹنگی لیر
میرے لباں تے ہاڑے ہجر دے
مینوں جھلی آکھن لوگ
میں اڈن ہار کبوتری
میرا بدلاں نال سنجوگ
میرا رونا تے کرلاونا
میرے کسے نہ آیا کم
سبھ ریجھاں رو رو تھکیاں
تے اتھرو گئے نے جم
ہن پنجرا میرا نصیب اے
جتھے جندڑی لینی بھوگ
میرا بدلاں نال سنجوگ