غزل

قیصر محمود گورائیہ

صدمے والی برچھی سینے وچ اج لنگھدی ویکھی اے
نکے نکے ہتھ ودھا کے بھکھ میں منگدی ویکھی اے
اس توں پہلاں لگدا سی کہ اجے میں جنتوں ڈِگا نہیں
ماپے مرن توں مگروں دنیا دوزخ رنگ دی ویکھی اے
چول تلی نہیں کرنوں مڑدے جنے مرضی رجے ہون
انکھاں والی بھکھ وی میں تے منگنوں سنگدی ویکھی اے
کدھرے جیبھ دے سِر تے پرہیا کردے پئے بڑبولے نیں
کدھرے مونہہ دی اکو گل ای سولی ٹنگدی ویکھی اے
جرن دے وچ اے امن تے امن چ پیار محبت سجناپے
جھوٹھی انکھ چ ویروں ودھ تباہی جنگ دی ویکھی اے
پیار دا ماسہ دِسیا نہیں کسے وی کچ دی چپر چوں
میں تے قیصر کِرچی کِرچی ٹُٹی ونگ دی ویکھی اے