غزل

عمران سلیم

دوجے دے تخیل دے بپاری نہیں ہوندے
شاعر کدے لفظاں دے بھکاری نہیں ہوندے
پتھر نیں جو کردے نہیں محسوس غماں نوں
انسان تے احساس توں عاری نہیں ہوندے
ہو جائے مخالف جہدے ویلے دی ایہہ گردش
فر اوہدے مقدر وی حواری نہیں ہوندے
کردے نیں بسر جہڑے اصولاں تے حیاتی
اوہ لوک رواجاں دے پجاری نہیں ہوندے
تقدیر دا لکھیا وی بدل دیندے نیں جہڑے
ہوندے نیں قلندر اوہ مداری نہیں ہوندے
ملدی اے سلیم اوہناں نوں رسوائی جہاں تے
جو لوک وی حالات تے بھاری نہیں ہوندے