کھیڈ نرالی

آتش کیانی

قدرت دے اک
گورکھ دھندے
عجب کھیڈ رچایا
سارا آدم مٹی جایا
مٹی ایہدا ہار سنگار
مٹی ایہدا پیار وقار
اک گل دی سمجھ نہ آوے
پال پوس کے نال پیار
صدقے واری
کئی کئی وار،فر کیوں…؟
اپنا رزق بناوے
کنج دا رشتا مٹی نال
خیال دا پکھو،ڈھیر اڈایا
کدھروں حل نہ لبھ لیایا
کیوں پال پوس کے رزق بنایا
اوہ وی مٹی اپنا جایا
مٹی جہدا چین قرار
مٹی جہدا مان وقار
مٹی جہدی ماں،قدرت دی
ہر کھیڈ نرالی
آتشؔ سمجھ نہ آون والی