حکومت دی معاشی یا معاشرتی پالیسی

لكهت:سید صفدر رضا

کرونا دی دوجی لہر نے اپنے پنجے گاڑنے شروع کر دتے نیں ویکسین دی تیاری دے دعوے وی ساہمنے آ چکے نیں جد کہ امریکہ نے سانوں ویکسین دین توں معذرت کر لئی اے۔ پاکستان اُتے کرونا وبا دے پہلے وار نے ساڈے توں ساڈے پیاریاں دیاں جاناں کھوہ لیاں پر اللہ دا شکر اے ایہہ تعداد گوانڈھی ملک بھارت تے دیگر ترقی یافتہ ملکاں دی نسبت گھٹ اے پر حکومت دی بجائے ایہہ ساڈے ساریاں اُتے فرض اے کہ اسیں بحیثیت قوم ایس دا مقابلہ کرن لئی احتیاطی تدبیراں اختیار کریے تے اپنی ذمے داری دا ثبوت دیئے۔ ماہرین طب دے مشوریاں اُتے عمل پیرا ہوئیے کرونا دی وبا نے عالمی معیشت اُتے گہرے اثرات مرتب کیتے نیں پر ساڈے وطن عزیز وچ سیاسی اکھاڑے وچ سیاسی پہلواناں نے اپنے دنگل وچ مظلوم عوام نوں مٹی وچ روند دتا اے۔ ایس حکومت نے معاشی اشاعریاں دی جیہڑی تصویر عوام دے ساہمنے حکومت وچ ایس توں پہلے پیش کیتی سی تے جیہڑی ماہرین دی ٹیم پیش کیتی سی حکومت بنان دے بعد یکسر دعویاں دے برعکس اے قرضہ نہ لین IMF دے کول نہ جان دے دعوے دھرے دے دھرے رہ گئے پچھلی حکومت جیہڑی موجودہ حکومت دے بقول چوراں دی حکومت سی۔ موجودہ مدینہ دی ریاست دے دعویداراں دی حکومت دا موازنہ پچھلی حکومت نال کردے نیں میرا مقصد پچھلی حکومت دی قطعا ً وکالت مقصود نہیں بلکہ خارجہ تے معاشی صورت حال پیش خدمت اے۔ 2018ء وچ پچھلی حکومت دے آخری مرحلے وچ ٹیکس ایگزمشن 541 ملین روپئے سی جیہڑی پچھلی حکومت دے اختتامی ورھے وچ سی پر موجودہ حکومت دے دو سالہ کارکردگی جس وچ شبیر زیدی صاحب دا بڑا چرچا ہویا سی تے موجودہ حکومت دی بہترین ٹیکس پالیسی ساہمنے آئی گی ہن ایہناں دی تبدیلی دے بعد ٹیکس ایگزمشن ابتدائی دو سالہ کارکردگی دی بنیاد اُتے 2020 وچ 1471 ملین ہو گئی۔ جے 2017 to 2018 ٹیکس حدف ویکھیے۔ 3935 ملین سی تے جمع شدہ 3751 ملین روپئے تے 184 ملین حدف توں گھٹ رہیا۔ جد کہ موجودہ حکومت دے 2019to20 وچ شارٹ فال 2300 ملین رہیا۔ جے GDP اُتے نظر مارو تے پچھلی حکومت نے 5.7 فیصد اُتے چھڈیا سی جیہڑا موجودہ حکومت وچ گھٹ ہو کے صرف 51 بلین ڈالر دے نقصان دے نال اج منفی 0.4 فیصد اے۔ جے سٹاک ایکسچینج دا موازنہ کیتا جائے تے پچھلی حکومت وچ 2018 وچ 8703 بلین اُتے سی جیہڑی PTI دی حکومت وچ 2020 وچ گھٹ ہو کے 6530 بلین اُتے آ گئی اے۔ مہنگائی دی شرح 2018 وچ 4 فیصد اُتے سی تے مدینہ دی ریاست وچ 2020 ایہہ شرح تاریخ دی بلند ترین سطح اُتے یعنی جنوری وچ جد کہ کرونا دی لہر ایتھے نہیں آئی سی 14.6 فیصد اُتے آ گئی سی جد کہ نہ تنخواہواں ودھیاں نہ پنشن نہ کرونا تے جیہڑی ارباں دی چوری ہو رہی سی بقول کپتان۔ ہن تے مدینہ دی ریاست وچ ایمانداری تے دیانت پاروں کرپشن فری حکومت اے۔ اوہ چوری تے رک گئی؟ تے معاشرتی بہبود دے منصوبیاں دی بھرمار ہو گئی اے تعلیمی ادارے صحت دے ادارے ذرائع آمد و رفت وغیرہ دا جال وچھ گیا۔ غریباں نوں سستا تیل تے کھان پین والیاں شیواں نال معاشرے وچ خوشحالی دا دور دورا اے۔ جے قرضہ جات دی گل ہوئے تے پچھلی حکومت نے اپنے پنج سالہ دور وچ 13 ٹریلین روپئے قرض لیا جیہڑا یومیہ بنیاداں اُتے 7 بلین روپئے بن دا اے جد کہ تسیں کہندے سی کہ مرجاواں گا قرض نہ لواں گا IMF دے کول جان توں بہتر اے مر جاواں پر تسیں تے قرض لین دے سابقہ حکومتاں دے ریکارڈ توڑ دے ہوئے 13 ٹریلین دا وڈا قرض صرف دو ورھے وچ لے کے جیہڑا یومیہ 20 بلین بن دا اے ریکارڈ قائم کیتا ہجے تہاڈے معاشی اعشاریے مثبت نیں۔ غریب عوام نوں مزید کنہا رگڑا لایا جائے گا ۔ تہاڈے وعدے وزیراعظم ہائوس، گورنر ہائوس یونیورسٹیاں وچ بدلنا سی۔ مہنگائی دا طوفان روکنا سی۔ کشمیر لئی مظاہرے لئی دن منانے سن۔ غریباں لئی گھر بنانے سن تسیں ایہناں توں چھتاں کھوہ لیاں ، تسیں نوکریاں دینیاں سن۔ لوکاں نوں ملازمتاں توں محروم کیتا۔ 2017.18 وچ پچھلے دور حکومت وچ 35 لکھ لوک بیروزگار سن۔ تہاڈی حکومت وچ دو سال وچ ای ایہہ تعداد سوا کروڑ دے لگ بھگ ہو چکی اے۔ ہن مظلوم عوام لئی قبرستان دی ای کسے سکیم دا اعلان فرما دیو تاں جے سکون قبر وچ ای اے۔ بقول تہاڈے جد کہ شاعری تے کجھ ہور ای کہندا اے کہ
سکوں کہیں بھی میسر نہیں انساں کو
جنازے والے بھی کندھا بدلتے رہتے ہیں
بار بار مختلف عہدیاں دی تبدیلی تے عدالتاں وچ دائر مختلف بندیاں اُتے مقدمیاں نال غریب بندے دا ڈیڈھ نہیں بھردا، نہ وعدیاں نال۔ غریب عوام دا تے کہنا اے:
یہ تیرے کچے وعدے میرا پیٹ بھر نہیں سکتے
اک لقمہ روٹی کا میرے منہ سے لگایا ہوتا
معاشرتی تے معاشی ترقی لازم و ملزوم اے پر سب دا مرکز ریاست تے ایس دے شہری ہوندے نیں عوام ہوندے نیں خواص دی بجائے عوام دے دکھ درد نوں دورکریئے تے غریب دی بجائے غربت دا خاتمہ فرمائو تاں جے معاشرتی پرامن تے خوشحال ہوئے تے ملک وی ترقی کرے کدھرے انج نہ ہوئے کہ
غریب شہر تو فاقوں سے مر گیا لیکن
امیر شہر نے ہیرے سے خود کشی کرلی