کیہدی گل اُتے اعتبار کیتا جائے؟

تحریر حمید اللہ بھٹی

عمران خان فرماندے نیں کہ مشکل حالات توں لنگھ چکے ہن معاشی پہیہ رواں دواں اے مہنگائی گھٹ ہون دے نال اوہ روپے دی قیمت وچ وادھے دی نوید سناندے نیں ہائوسنگ انڈسٹری دے نال دیگر کئی صنعتاں چلن دا دعویٰ کردے ہوئے ایہہ وی فرماندے نیں کہ حکومتی کامیابیاں صرف ایہناں ای دی نظر نہیں آندیاں جنہاں نے اقتدار دے دوران لُٹ مار کیتی تے برطانیہ دے انج دے پوش علاقیاں وچ جائیداداں بنائیاں جنہاں علاقیاں وچ رہن دا برطانوی وزیراعظم وی تصور نہیں کر سکدا اوہ اپنے دور اقتدار دی کارکردگی نوں وی قابل فخر قرار دیندے نیں پر وزیراعظم دی قابل فخر کارکردگی دے دعویاں دی آزاد ذرائع تصدیق نہیں کردے بلکہ بہتری کیہ ملک دی خراب معاشی حالت نوں مزید خراب کرن دا ذمہ دار موجودہ حکومت نوں ٹھہراندے نیں۔
اپوزیشن دا تے کم ای حکومت اُتے تنقید کرنا اے پر پاکستان وچ تنقید توں گل اگے ودھ چکی اے حزب مخالف تے حزب اقتدار وچ ورکنگ ریلیشن نہ ہون دی وجہ نال عملاً ڈیڈ لاک دی کیفیت اے ایسے بنا اُتے سیاسی استحکام ناپید اے پر ایہہ اپنے نویں وزیر خزانہ شوکت ترین حکومت دی بجائے اپوزیشن دی زبان بولن لگے نیں۔ اوہناں نے قائمہ کمیٹی خزانہ نوں بریفنگ دیندے ہوئے واضح کیتا اے کہ معیشت دا پہیہ رُک چکیا تے جی ڈی پی گروتھ ریٹ پنج فیصد تیکر نہ لے کے گئے تے آن والے چار ورھے وچ ملک دا اللہ ای حافظ اے۔اوہناں نے کرپشن وچ وادھے دی وجہ بجلی دی قیمت ودھان نوں قرار دیندے ہوئے ایس حوالے نال آئی ایم ایف دے مطالبات نوں ناجائز کہیا اے اوہ ٹیکس ودھان دی بجائے وصولی بہتر بنان اُتے زور دیندے نیں ایہہ ایس شوکت ترین دے خیالات وچ جیہڑے موجودہ وزیراعظم دے بوہت پسندیدہ نیں جنہاں نوں وزارت خزانہ حوالے کردے ہوئے ملک نوں معاشی گرداب توں کڈن دی ذمہ داری دتی گئی اے ہن معاشی حالت بہتر ہوئے گی مہنگائی تے بے روزگاری وچ کمی لیان دے حوالے نال شوکت ترین دی پالیسیاں ہون گیاں یا نہیں؟ فی الحال وثوق نال کجھ کہنا مشکل اے کیوں جے قبل ازیں وی اوہ ایسے منصب اُتے رہے پر معاشی حالت بہتر نہ کر سکے ہن وی کسے معجزے دا تے کوئی امکان نہیں ہاں البتہ وزیراعظم کجھ جد کہ وزیر خزانہ کجھ ہور فرماندے نیں ہن کس دے کہے اُتے اعتبار کریئے کجھ سمجھ نہیں آندا کپتان دا اہم کھلاڑی اپنے ای کپتان دی کیوں نفی کر رہیا اے؟ توں اخلاص نہیں غیر سنجیدگی ہویدا اے۔
تن سالہ دور اقتدار وچ کپتان چار وزرائے خزانہ نوں بیٹنگ دے چکے نیں اسد عمر، حفیظ شیخ تے حماد اظہر دی ناکامیاں عیاں حقیقت نیں پر کیہ ہن شوکت ترین معیشت بحال کر سکن گے یا کجھ عرصہ بعد گھر گھل دتے جان گے حتمی طور اُتے کوئی وی کجھ کہن دی پوزیشن وچ نہیں خیر حتمی طور اُتے تے ایہہ وی نہیں کہیا جا سکدا کہ اوہ کنہی مدت تیکر کپتان دا اعتماد برقرار رکھ سکن گے کیوں جے کسے نوں اگے لیاندے ہوئے جنہی وارفتگی وکھائی تے توقعات وابستہ کیتی جاندیاں نیں ایہنوں کِک آئوٹ کردے ہوئے خامی تیکر دسنا گوارہ نہیں کیتا جاندا بلکہ شاہانہ مزاج دا مظاہرہ کیتا جاندا اے پر موجودہ حکومت نے اک نویں روایت قائم کیتی اے کہ اوہ اپوزیشن دی ذمہ داریاں وی آپ ای سرانجام دین لگی اے حکومتی سربراہ دی تردید دا ذمہ وی وزرا نے لے لیا اے پر ایتھے اک سوال پچھنا تے بن دا اے کہ حکومتی سربراہ دے دعوویاں دی تردید دا فرض جدوں چہیتے ادا کرن لگن تے کون اعتبار کرے گا اپوزیشن دے الزامات دی کیہ حیثیت رہ جائے گی؟ ہن تے انج دے حالات بن گئے نیں کہ اپوزیشن چپ وی رہوے تے وزراء ای اپنی حکومت دی ناکامیاں دس دیندے نیں۔
آئی ایم ایف نوں پاکستان دی خراب معاشی حالت دی بنا اُتے دتے قرض دی وصولی دے حوالے نال خدشات نیں ایہو کڑی شرطاں دی وجہ نال ایوب خاں دور وچ ملک نے پہلی وار ایس ادارے توں قرض لیا پر بروقت ادائیگی ہون تے ترقی دی بہتر رفتار دی بنا اُتے مزید قرض ملدا رہیا پر ہن ترقی دی شرح منفی ہو چکی اے قرضیاں دی قسطاں تے سود دی ادائیگی مشکل تر ہو رہی اے۔ ایس توں علاوہ گردشی قرضے وی تشویشناک سطح اُتے اپڑ چکے نیں ایسے لئی مالیاتی ادارے قرض دین وچ ہچکچاہٹ محسوس کرن لگے نیں ایس ورہے جون تیکر ملک اُتے کل قرض مجموعی معیشت دا 94 فیصد تیکر اپڑ جان دا وکھرا خدشہ اے اسد عمر دے بعد جدوں حفیظ شیخ نوں وزارت دتی گئی تے اوہناں نے آئی ایم ایف دی شرائط بغیر کسے رد و قد دے تسلیم کر لیاں بجلی و گیس دی قیمتاں وچ مرحلہ وار وادھے دے نال سبسڈیز دے خاتمے ول تیزی نال کم دا آغاز کیتا گیا پر سینٹ دا الیکشن حکومت دی نظراں وچ رائندہ درگاہ کرن دا موجب بن گیا پر حیران کُن گل ایہہ وے کہ وزیراعظم کدی ایہناں دی پالیسیاں دی وی تحسین کردے سن پر جوں ای الیکشن ہریا تے سب دیاں نظراں توں اچانک ڈگ گئے ہن شوکت ترین چہیتے نیں پر کس دی گل دا اعتبار کریئے کیوں جے حفیظ شیخ دی پالیسیاں نال ملکی معیشت دی بحالی دا ویکھیا جان والا سپنا ہن شوکت ترین نال وابستہ کر لیا گیا اے موجودہ دور وچ ہر آن والے دی تعریف ہوندی اے تے جان والے نوں خرابیاں دا موجب قرار دتا جاندا اے تے کیہ انج نہیں ہو سکدا کہ آن تے جان والیاں وچ کیڑے کڈن دی بجائے ناخدا توں ای کجھ پچھ تاچھ کر لئی جائے ممکن اے خرابی دی نشاندہی ہو جائے کیوں جے گڈی چلان لئی انجن دی درستگی پہلی شرط اے۔
شوکت ترین دی تعیناتی بظاہر لمبی مدتی نہیں بلکہ عارضی محسوس ہوندی اے کیوں جے اوہ فی الحال قومی اسمبلی یا سینٹ دے رُکن نہیں تے چھ مہینے دے دوران ایہناں نوں ایوانِ زریں یا ایوانِ بالا وچوں کسے ایوان دا رُکن منتخب کرایا جاندا تے عہدے توں محروم ہون دا قوی امکان ہوئے گا جے اوہ وی حفیظ شیخ دے انجام نال دو چار ہوندے نیں تے ایہناں دی پالیسیاں دا کیہ بنے گا؟ تے خرابی دا ذمہ دار کون ہوئے گا ایہہ سوال ذہناں وچ کلبلا رہے نیں کیوں جے چاہے بجلی و گیس دے ریٹ ودھان یا گھٹ کرن دی تجویز اک پاسے البتہ ہن سارے ایہہ ضرور کہن لگے نیں کہ معیشت دی بحالی تے استحکام لئی سخت فیصلے ناگزیر نیں پر سخت فیصلیاں دا ملک یا قوم نوں کوئی فائدہ نہیں ہو رہیا بلکہ جنہی تیزی نال وزرائے خزانہ نوں تبدیل کیتا جا رہیا اے ایس توں زیادہ تیزی نال ملک دی معاشی حالت خراب ہوندی جا رہی اے شارٹ، میڈیم تے لانگ ٹرم پالیسیاں نہ ہون دی وجہ معاشی حالت اینی وگڑ چکی اے کہ فوری بحالی دے آثار مفقود نیں کیوں جے جیہڑا چہرہ رُخصت ہوندا اے ایس دے نال ای پالیسیاں وی بدل جاندیاں نیں پر کنہوں الزام دیئے تے کس دا اعتبار کریئے؟ کجھ سمجھ نہیں آندا وزیراعظم دے دعویاں دی تردید وزیر خزانہ کردے نیں ہن تسیں ای دسو کس دی گل دا اعتبار کریئے تے انج دے حالات وچ اپوزیشن نوں کجھ کہن دی لوڑ ہے؟