اسیں اسلام مطابق حیاتی کیوں نہیں گزاردے

طلعت عباس خان

کجھ دوستاں نے سوچیا آئو سکھ علاقے وچ تبلیغ کرن چلیے‘ شاید سکھ تبلیغ نال مسلمان ہو جان اک دن سکھاں دے کول تبلیغ لئی حاضر ہوئے تے اوہناں نوں پیاریاں پیاریاں گلاں سنائیاں۔ ساریاں نے اوہناں نوں غور نال سنیا۔ کہیا تسیں بڑیاں پیاریاں گلاں کیتیاںنیں پر ایہ گلاں تہاڈے وچ کیوں نہیں وکھائی دیندیاں۔ کل اسیں اکٹھے سکھاں تے مسلماناں دیاں دکاناں تے جاواں گے۔ اوہناں دے ترازو تے کھان پین والیاں شیواں نوں چیک کراں گے جہڑیاں دکاناں وچ ناپ تول دا نظام ٹھیک ہویا تے اوہناں دیاں شیواں وچ ملاوٹ نہ ہوئی جہڑے جھوٹ نہ بولدے ہون‘ اجہے دکانداراں دی گنتی جہناں دی زیادہ ہوئی تے فیر سارے اوہدے مذہب وچ شامل ہون دے پابند ہوواں گے۔ بولو منظور اے؟ ایہ سن کے اسیں چپ کرکے اوتھوں ٹر پئے۔ جاندے جاندے سکھاں نے کہیا بہتر ایہو اے تسیں اپنیاں نوں ای تبلیغ کرو جو اسلام توں بڑے دور نیں۔
اسیں اسلام دیاں گلاں کرنے آں‘ عبادت کرنے آں پر انج نہیں کردے جیویں اسلام کرن نوں دسدا اے۔ اجے حال ای وچ جو کجھ اسلام دے ناں تے ہویا یاں ماضی وچ وی اسلام دے ناں تے کجھ مذہبی جماعتاں کردیاں رہیاں کیہ ایہو اسلام اے؟ سمجھ نہیں آ رہی کہ سانوں شرمندہ ہونا چاہیدا اے یاں سر فخر نال اُچا ہونا چاہیدا اے۔ ایہدا جواب غصے نال نہیں‘ خدا نوں سامنے رکھدے ہوئے تسیں خود دیو‘ جہناں نے جلوس کڈھے‘ سڑکاں بلاک کیتیاں‘ گڈیاں ساڑیاں‘ سرکاری تے پرائیویٹ املاک نوں نقصان اپڑایا۔ اپنے ورگے مسلماناں تے ڈنڈے سوٹے چلائے‘ اپنے ای مسلم بھراواں نوں جانوں ماردے رہے۔ دوجے پاسے پولیس مین ملزم دے پلاس نال نونہوں کھچدے رہے۔ اوہناں تے گولیاں چلاندے رے‘ زمین تے لٹا کے چھترول کردے رہے‘ انج کرکے اسلام دا ناں روشن ہویا یاں بدنام؟ جہناںنے تن دن تک جینا اوکھا کیتی رکھیا‘ ایس لئی کہ حکومت نے اجے تک فرانس دے سفیر نوں ملک چوں نہیں کڈھیا۔ ایہدا سانوں غصہ اے ایہ جو کجھ مار دھاڑ جلائو گھیرائو اساں کیتا ایہ ساڈے غصے دا اظہار سی۔ کیہ اسیں عاشق رسول آں؟ اوتھے اک گورا وی کھڑا سی جو سب کجھ ویکھ تے سن رہیا سی۔ گورے نے کہیا میں وی مسلمان آں۔ تسیں مینوں دسو جنہے توہین کیتی اے کیہ اوہنوں پاکستان دیاں سڑکاں تے کسے نے ویکھیا سی کیہ اوہنوں کسے نے کار بس ٹرک وچ سوار ویکھیا سی جہدی وجہ نال تسیں روڈ تے ٹریفک بلاک کر دتی۔ گڈیاں نوں ساڑ دتا‘ کہیا مارن والے وی مسلمان تے مرن والے وی مسلمان سن جد کہ اسلام کہندا اے تسیں مسلمان آپس وچ بھائی بھائی او فیر تسیں اپنے بھائیاں دا لہو کیوں روڑھیا؟ اوہناں دیاں گڈیاں‘ اوہناں دیاں جائیداداں نوں کیوں ساڑنا ضروری سمجھیا جد کہ اوہ تے سارے مسلماناں دی ملکیت سن۔
غصہ فرانس تے جانی و مالی نقصان تسیں اپنے ای مسلمان بھراواں دا کیتا؟ گورے نے کہیا جے تسیں عاشق رسولؐ او تے امت تے انج ظلم نہ کردے۔ مسلماناں لئی آسانیاں پیدا کردے‘ ایمبولینس نوں راہ دیندے۔ تسیں فرانس دیاں چیزاں دا بائیکاٹ کردے؟ کیہ ایہ سچ نہیں کہ ایہ سب کجھ لٹ مار کرن تے حکومت نوں ٹف ٹائم دین لئی کیتا گیا۔ گورے نے کہیا جو کجھ جنہے کیتا اوہدا ہو سکدا اے ایتھے حساب نہ ہووے پر آخرت وچ ایہناں دا ضرور حساب ہووے گا۔ گورے توں پچھیا ایہ تہانوں کیویں پتہ اے کہ میں پیدائش نہیں پڑھ کے مسلمان ہویا واں‘ میں سمجھنا واں انج کرکے تسیں آپ توہین دے مرتکب ہوئے او۔ تہانوں ایہ کیوں دسنا پیندا اے کہ اسیں عاشق رسولؐ آں ایس لئی کہ تہاڈا کردار ایہدی گواہی نہیں دیندا۔ تسیں کالی بلی توں ڈردے او پر اپنے کرتوتاں توں نہیں ڈردے۔ کاش پتہ ہووے کہ ننگے پیریں چلن نال نہیں‘ اطاعت رسول نال عزتاں ملدیاںنیں۔ سنیا سی لوک مذہب لئی لڑدے نیں‘ جھگڑدے نیں تے اوہدی خاطر مردے نیں پر مذہب دے مطابق حیاتی نہیں گزاردے۔ سوائے بدنامی دے اپنے ملک دی معاشی حالت خراب کرن تے مخلوق خدا نوں پریشان کرن توں اڈ کسے نوں کجھ حاصل نہیں ہویا۔ کہیا جاندا اے کہ سڑکاں تے انسانی لہو اوس ویلے پانی طرح رڑھنا شروع کردا اے جدوں اورڈوز سیاست دی ہو جاوے۔
جہڑے ملکاں وچ سیاست تے مذہب وچ اورڈوز ہو جاندی اے اوتھے لوکاں دی نہ جان محفوظ تے نہ اوہناں دا مال محفوظ رہندا اے۔ مولانا‘ قاضی‘ مفتی جہناں دا کم انساناں نوں مذہب بارے دسنا اے جے مسجداں تے اپنے اپنے فورم تے چھوٹیاں چھوٹیاں پیاریاں پیاریاں گلدے دسدے رہندے تے مسجداں وچ لوک لوٹیاں‘ گلاس تے جتیاں دے چوری دے ڈر توں تالے لا کے نمازاں نہ پڑھ رہے ہوندے۔ ڈپٹی اٹارنی جنرل چوہدری اشتیاق مہربان نے دسیا رمضان دی اک رات نوں ایچ الیون قبرستان دی جنازہ گاہ وچ کئی بندیاں دی جیب کٹ گئی تے کئی وچارے موبائل فون توں ہتھ دھو بیٹھے۔ خداخوفی نہیں! جنازے دا احترام اے نہ ریاست دا ڈر۔ ایہدا ذکر جدوں اپنے دوست اظہرالدین عثمانی نال کیتا تے کہیا پہلے ایتھے مردے دے کفن لاہ کے ویچدے سن ہن مردے دے اعضاء تے ہڈیاں وِکدیاں نیں۔ مرن دے بعد وی مردے محفوظ نہیں رہے۔ دسیا کہ 2014ء وچ دو بھائی قبراں چوں انسانی گوشت کڈھ کے لیاندے تے کھاندے ہوئے پھڑے گئے۔ مقدمہ چلیا۔ عدالت نے جرم ثابت ہون تے اوہناں نوں اک ورھے دی سزا دتی۔ انج ایس لئی کہ تعزیرات پاکستان دی سیکشن 297 دے مطابق قبر نوں نقصا ن دی سزا تے ہے پر انسانی گوشت دے کھان دی کوئی سزا نہیں۔ سزا دے بعد لوک گستاخاں نوں جانوں مارن لئی تے تیار نیں پر اوہناں نوں کھانا دین تے اوہناں دا دماغی علاج کروان نوں کوئی تیار نہیں۔ جے ایہ مدینے دی ریاست ہوندی تے اوس گورنر‘ چیف منسٹر‘ کورکمانڈر‘ منسٹر‘ ایم این اے‘ ایم پی اے‘ ڈی سی‘ اے سی نوں قید کر چکے ہوندے اوہناں دیاں جائیداداں نوں حساب لے رہے ہوندے کہ تسیں اوہناں دی بھکھ دا خیال کیوں نہیں رکھیا؟ کون دسے کہ جج دا کم صرف سزاواں دینا نہیں انسانیت دی خدمت وی اے۔ ایہد ااک حل ایہ وی اے کہ قرآن کریم نوں ترجمے دے نال پڑھیا تے سمجھیا جاوے تاں جے اسیں سچے مسلمان بن سکیے۔٭٭