دلچسپ لوکاں دیاں دلچسپ کہانیاں

طلعت عباس خان

بابا کرمو دے کول اج بن بلائے ای آ گیا اوتھے پہلے توں تن چار نویں چہرے موجود سن۔ بابا کرمو نے کہیا ایہ وی ہنے ای آئے نیں ایہناں ساریاں دی اپنی اپنی سوچ اے۔ میں پچھیا سی کہ تہاڈے وچ ہر کوئی اپنے اپنے پسند دے بندے بارے دسو۔ ہن ہر اک دے ہتھ وچ چائے دا کپ سی تے کہیا کہ جو واقعہ سنائے گا اوہ سناندے ہوئے چاہ نہیں پیوے گا تاں جے پوری توجہ نال سن سکیے۔ ایہدے تے ساریاں نے شرط نوں من لیا۔ کہیا سانوں خوشی ہوئی کہ ہر وار دی طرح ایس وار وی اساں کجھ سکھیا اے۔ بابا کرمو دے سجے پاسے نوجوان بیٹھا سی کہیا ملائیشین سابق وزیراعظم مہاتیرمحمد میرے آئیڈیل نیں۔ مہاتیرمحمد اک واری جدوں انگلینڈ دے دورے تے گئے سویرے اک مقامی اخبار وچ مہاتیرمحمد دا کارٹون چھپ چکیا سی۔ جدوں مہاتیرمحمد نے برطانوی وزیراعظم نال ملاقات کیتی تے سب توں پہلاں مہاتیر محمد نے کارٹون ٹیبل تے رکھ کے پچھیا کیہ برطانیہ وچ مہمان دے استقبال کرن دا ایہو طریقہ اے کہ اوہدا مذاق اڑایا جاوے؟ جواب وچ برطانوی وزیراعظم نے کہیا ایتھے میڈیا آزاد اے جہدے تے مہاتیرمحمد نے جواب دتا ٹھیک اے جدوں تسیں میڈیا دی آزادی وچ تمیز ویکھ لوو تے فیر ساڈی ملاقات ہووے گی ایہ کہہ کے ملاقات ختم کر کے مہاتیر چلے گئے۔ مہاتیرمحمد نے باہر نکلدیاں ای اپنے آفس ملائیشیا فون کیتا تے انگلینڈ دے باشندیاں دے ملائیشیا وچ کاروبار چھیتی بند کرن تے اوہناں ساریاں دے اکائونٹ سیل کرن دے احکامات جاری کیتے۔ ایہدے نال انگریزاں نوں چوی گھنٹے دے اندر اندر ملائیشیا نوں چھڈن دے احکامات جاری کر دتے۔ مہاتیرمحمد دے حکم تے فوراً عمل ہویا۔ مہاتیر واپس اپڑے تے اوہناں دے دفتر وچ برطانوی وزیراعظم دا معافی نامہ اوہناں توں پہلاں دفتر وچ اپڑ چکیا سی۔ نال ای جس اخبار نے کارٹون چھاپیا سی اوہنوں وی جیل وچ سٹ دتا گیا۔ ایس واقعے دے بعد مہاتیرمحمد نوں پسند کرنا واں۔ دعا کرنا واں کوئی ساڈے ایتھے وی اجیہالیڈر آوے جو اپنی تے لوکاں دی عزت کرانا جان دا ہووے۔
ایہدے بعد دوجے ساتھی دی واری آئی کہیا مینوں شخصیت تے نہیں پر اک ریڈیو دا پروگرام پسند آیا جہنوں میں جدوں آ رہیا سی تے سنیا‘ کہیا ایف ایم ریڈیو تے پروگرام جاری سی جہدے وچ کسے نویں فنکار نوں کہیا گیا کہ تسیں کرکٹ کمنٹیٹر او تے تسیں میچ دی انج دی کمنٹری کرنی اے جیویں تسیں کوئی میچ ویکھ رہے او‘ فیر اوس میزبان نے فن دے گل کھلائے اوہ پیش خدمت نیں۔ اوہنے فیر ایہ کمنٹری انج سنائی کہیا بالر گیند نوں رگڑدا ہو ہویا وکٹ ول نسیا‘ فیر ہوا وچ پہلے آپ اچھلیا تے فیر گیند نوں اچھالدا ہویا اکھاں بند کرکے وکٹ ول سٹ دتی۔ بیٹسمین اک اڑیلو گٹا سی اوہنے اکھاں بند کردے ہوئے اوسے زور نال بیٹ نوں ہوا وچ لہراندے ہوئے بال نوں ماریا‘ گیند پہلے اک ارب درختاں دے اُتوں گزردی ہوئی اک کروڑ نوکریاں دے منتظر لوکاں دے سراں نوں چھوہندی ہوئی‘ پنجاہ لکھ گھراں دے چھتاں نال ٹکراندی ہوئی مجھاں دے واڑے وچ کھلوتے کٹے دے سر تے لگن مگروں ککڑیاں دے پولٹری فارماں وچ انڈیاں نوں توڑدی ہوئی گیند لنگر خانیاں دیاں پلیٹاں ٹچ کردی ہوئی‘ ڈیم دے کنڈھے مچھی دا کنڈا لا کے بیٹھے بابا رحمت دے سرنال ٹکرائی تے فیر ڈیم دے ڈونگھے پانی وچ انج ڈُبی جیویں کوئی شرم نال چلو بھر پانی وچ ڈب جاندا اے۔
ایس موقعے تے بابا کرمو نے کھنگدے ہوئے اگلے ساتھی نوں کہیا ہن تسیں سنائو‘ کہیا سلطان محمود غزنوی دے کول اک بندہ چکور لے کے آیا جہدا اک پیر نہیں سی۔ اوہنے چکور دی قیمت پچھی تے اوس بندے نے اوہدی قیمت بہت زیادہ دسی۔ کیہا ایہدی قیمت اینی زیادہ کیوں اے؟کہیا ایہ چکور سپیشل خوبیاں دا مالک اے۔ میں چکوراں دے شکار نوں جدوں جانا واں تے ایس چکور نوں اپنے نال لے جانا واں۔ فیر اوتھے جال دے نال ایہنوں بنھ دینا واں۔ ایہ ایس موقعے تے عجیب جہی آوازاں کڈھدا اے جہنوں سن کے دوجے چکور اوہدے نیڑے آئوندے نیں تے جال وچ پھس جاندے نیں۔ سلطان محمود غزنوی نے اوس بندے نوں اوہدی دسی گئی قیمت دے کے اوہدے سامنے ای اوس چکور نوں ذبح کر دتا۔ اوس بندے نے پچھیا تسیں ایہنوں مہنگے مُل خریدن دے باوجود ایہنوں کیوں ذبح کیتا۔ سلطان محمود غزنوی نے ایس موقعے تے تاریخی ایہ الفاظ کہے۔ جو دوجیاں دی دلالی لئی اپنیاں نال غداری کرے اوہدا ایہو انجام ہونا چاہیدا اے۔
ہن تریجے ساتھی دی واری سی۔ اک واری لہور دے لکشمی چوک وچ اک پولیس والے نے حبیب جالب نوں لاوارث سمجھ کے بے عزتی کر دتی۔ آغاشورش کاشمیری دے ہفت روزہ دا دفتر نیڑے ای سی۔ جدوں ایہ خبر آپ ن ے سنی تے فوراً لکشمی چوک اپڑ گئے۔ ویکھیا پولیس والا کھڑا حبیب جالب نوں ذلیل کر رہیا سی۔ ایہ ویکھ کے آغا شورش کاشمیری نے اک ٹانگے چوں چھانٹا کڈھ کے اوس پولیس والے نال مخاطب ہوئے‘ کہیا تیری ایہ جرأت کیویں ہوئی۔ کیہ توں نہیں جان دا کہ ایہ کون اے۔ ایہ عوامی شاعر حبیب جالب اے۔ پولیس والے نوں اپنے نال تھانے لے آئے ایس ایچ او نوں کہیا ایس پولیس والے دے خلاف ایکشن لوو‘ جے ایہ جالب توں معافی نہیں منگے گا میں ایتھے دھرنا دیواں گا‘ فیر دھرنا دتا۔ ایہدے بعد تھانے وچ دھرنا دین والیاں دا ہجوم لگ گیا۔ گورنر نے تھانے فون کیتا آغا صاحب نال گل کیتی پر آپ نے گورنر دی گل نہ منی۔ فیر ذوالفقارعلی بھٹو نے آغاشورش کاشمیری نال آپ گل کیتی جہدے بعد دھرنا ختم ہویا۔ حبیب جالب نے ایس واقعے دے بعد کہیا شورش نے میری عزت بچائی۔ کہیا ہن ایسے شہر وچ رہیا جا سکدا اے۔ ایتھے ایہ دسدا جاواں کہ آغاشورش کاشمیری تے حبیب جالب وچ ڈاڈھا نظریاتی اختلاف سی پر جدوں کسے نظریاتی مخالف تے مشکل آن پئی تے ن ظریاتی اختلاف بھلا دتے جاندے سن۔
بابا کرمو نے کہیا ہن تسیں سنائو۔ میں کہیا کہ میں کیہ سناواں بس رمضان دا مہینہ تے ایہہ سب نوں مبارک ہووے۔٭٭