پاکستان۔۔۔۔ گھبرانہ نہیں

رمضان وچ مہنگائی وچ وی کئی گنا وادھا ہو چکیا اے تے ہر کوئی اپنے من مانے ریٹ وصول کر رہیا اے پہلے ای مہنگائی نے عوام دا بھرکس کڈ دتا اے

تحریر۔محمد سلیمان بٹ

جنہی پارٹیاں اقتدار وچ آئیاں اوہناں نے عوامی خدمت دا نعرہ لا کے اقتدار دی کرسی حاصل کیتی پر پاکستانی حکومتاں دا وطیرہ اے کہ جیہڑی وی پارٹی برسر اقتدار ہوندی اے اوہ اپنے توں پہلے والی حکومت نوں ساری برائیاں دا ذمہ دار ٹھہراندی اے چاہے ایس دور توں پہلے ایہناں دی اپنی ای حکومت کیوں نہ ہوئے ایہہ سلسلہ پچھلی ست دہائیاں توں جاری و ساری اے تے ہر آن والی حکومت اپنے توں پہلی والی حکومت نوں کوسن وچ کوئی کسر اٹھا نہیں رکھدی تے ایہنوں ساری برائیاں تے خامیاں پچھلی حکومتاں وچ نظر آندیاں نیں تے ساری محرومیاں تے پسماندگیاں دی ذمہ دار پچھلی حکومت نوں کہندے نیں پر جے غور کیتا جائے تے ایہو چہرے تے خاندان پچھلے چوہتر ورھیاں توں حکومت کر رہے تے اوہناں نے ای آپس وچ وریاں بنا رکھیاں نیں تے حکومت وی ایہو کر رہے نیں حکومت تے اقتدار توں دوری ایہناں نوں کسے صورت گوارہ نہیں ہوندی تے ایس مقصد دے حصول لئی جے پارٹی بدلنی پئے تے ایہہ عام جہی گل اے بلکہ بار بار پارٹیاں وی بدلنی پین تے کوئی مسئلہ نہیں کیوں جے ہر وار فائدہ اپنا ای ہوندا اے پر ایہہ کہہ کے پاکستانی عوامی نوں ’’چونا‘‘ لایا جاندا اے کہ ’’وسیع ملکی مفاد دی خاطر ‘‘اسیں ایہہ کم کر رہے آں تے ایس ملک نوں جیہڑا فائدہ ایہہ نمائندگان اپڑا رہے نیں اوہ وی کسے توں لُکیا نہیں ہر حکومت توں ایہو کجھ سنن نوں ملدا اے کہ پچھلی حکومتاں نے بلوچستان نوں بوہت پسماندہ رکھیا کسے نے ایہناں دی محرومیاں دا ازالہ نہیں کیتا کدی سندھ تے کراچی والے ریلیاں کڈدے نظر آندے نیں کہ ’’حق دو کراچی کو ‘‘ تے کدی خیبر پختونخواہ تے قبائلی علاقہ جات والے اپنی محرومیاں دا رونا روندے نظر آندے نیں سب کجھ ہون دے باوجود سب کجھ ملن دے باوجود ہر دور وچ ایہو گلاں تے نعرے سنن نوں ملدے نیں آخر انج کیوں اے کیوں کوئی وی حکومت پاکستان تے ایس دے باسیاں دی بہتری دا نہیں سوچدی تے صوبیاں دی محرومیاں دا ازالہ کیوں نہیں کیتا جاندا کیوں آئے دن عوام احتجاج کرن اُتے مجبور ہوندے نیں جدوں ایہہ لوک حکومت وچ ہوندے نیں تے عوامی فلاح و بہبود دے منصوبے کیوں نہیں بناندے جدوں اپوزیشن وچ ہوندے نیں تے فیر ایہناں نوں سارے حق حقوق یاد آ جاندے نیں تے فیر کدی کسے تہوار اُتے کدی کسے چوک اُتے تے کدی کسے عوامی تھاں اُتے دھرنے تے ریلیاں کڈنیاں شروع کر دیندے نیں فیر دنیا دی بُرائی ایہناں نوں حکومت وچ نظر آندی اے جدوں خود حکومت وچ ہوندے نیں تے ایہناں نوں سب چنگا وکھائی دیندا اے ایہناں نوں کئی قسم دا کوئی مسئلہ نظر نہیں آندا تے نہ ای ایہناں دی سوچ تے ذہن ایس بارے وچ کجھ سوچدا اے اج کل مہنگائی زوراں شوراں اُتے اے۔ رمضان وچ مہنگائی وچ وی کئی گنا وادھا ہو چکیا اے تے ہر کوئی اپنے من مانے ریٹ وصول کر رہیا اے پہلے ای مہنگائی نے عوام دا بھرکس کڈ دتا اے آئی ایم ایف اپنی نویں شرطاںوی لاگو کر چکیا اے۔ عمران خان ہر وار ایہو الفاظ دہراندا اے کہ ’’میرے پاکستانیوں گھبرانا نہیں‘‘پر انج لگدا اے کہ ہن تے ایہہ لفظ ’’گھبرانا‘‘ خود گھبراہٹ دا شکار ہو گیا ایحیرانگی ایس گل اُتے وے کہ جدوں مہنگائی دا طوفان برپا کیتا جاندا اے تے ایس ویلے سب چپ تماشائی بنے رہندے نیں بعد وچ ایہنوں کنٹرول کرن لئی عدالتاں دے دروازے کھٹکانے شروع کر دیندے نیں تے عوام نوں بیوقوف بنانا شروع کر دیندے نیں سوچن والی گل ایہہ وے کہ جدوں چینی 52 روپئے توں سو تیکر اپڑی ایس ویلے کسے ادارے کسے حکوت تے کسے شوگر مل نے کوئی واویلا نہیں کیتا پر اج صرف سو توں 85 روپئے کرن دا شور مچایا جا رہیا اے تے ہر پاسے ایہہ ہنگامہ برپا اے کہ اسیں سو وچ خرید کے 85 روپئے وچ ویچ نہیں سکدے پر جدوں 52 روپئے وچ خرید کے سو روپئے ویچی گئی تے ایس ویلے کوئی دلیل تے جواز پیش نہیں کیتا گیا کیوں جے ایس توں پہلے حکومت جس شے دا نوٹس یا ایکشن لیندی اے تے یا تے اوہ دوگنا مہنگی ہو جاندی اے یا فیر اونج ای نایاب تے ناپید ہو جاندی اے کاش حکومت صرف چینی نہیں ساری ضروری شیواں دی قیمتاں کنٹرول کرن لئی کجھ عملی اقدامات کرے۔
سانوں اپنی سوچ تے رویے نوں بدلنا ہوئے گا تے دوجیاں اُتے الزام تراشی دی بجائے اپنے گریبان وچ جھانکنا ہوئے گا تے عوامی فلاح و بہتری لئی خود بارش دا پہلا قطرہ بننا ہوئے گا ایسے نال تبدیلی تے عوام دی بہتری دا نعرہ عملی شکل اختیار کرے گا جے انج نہ کیتا تے فیر اوہ ای الزام تراشیاں جاری رہن گیاں جس نال کجھ حاصل نہ ہوئے گا۔