پِنڈ وچ نِکی عید

عتیق انور راجہ

اسلامی تہواراں دا بنیادی مقصد باہمی ایثار و محبت دے جذبات نوں فروغ دتا جانا اے۔ رمضان وچ ہر نیکی دا اجروثواب کئی گنا ودھ جاندا اے ایس لئی رمضان شروع ہوندے ای صاحب حیثیت مسلمان کوٰۃ خیرات تے صدقات دے ذریعے معاشرے وچ موجود مسکین، غریب تے مستحق مسلمان بھراواں دی مدد کردے نیں۔ روزے جدوں شروع ہوندے نیں تے گھراں وچ موجود نکے نکے پیارے پیارے معصوم بچے وی روزہ رکھن دی کوشش کرن لگدے نیں۔ شام نوں افطاری دے موقعے اُتے سب گھر والے اک دستر خوان اُتے جمع ہوندے نیں جیہڑے ایہناں دے رزق وچ وادھے دا سبب بن دا اے۔ چن ویکھن دی جنہی خوشی وڈیاں نوں ہوندی اے ایس توں کدھرے زیادہ ایہہ خوشی بالاں نوں ہوندی اے۔ کیوں جے ایہناں دے ذہن وچ صبح عید پڑھ کے عیدی وصولی ہوندا اے۔

ایہو وجہ اے کہ جنہے خوش عید والے دن بچے ہوندے نیں وڈے ہو وی نہیں سکدے۔ اپنے پیو ، وڈے بھراواں توں بار بار عیدی دا تقاضہ کردے ایہہ معصوم پھول اپنے چہریاں اُتے معصوم مسکراہٹ دے کئی رنگ سجائے ہوئے ہوندے نیں۔

اپنے کھلونے تے کھان پین دیاں شیواں نہ جانے کس جذبے نال دوجیاں بچیاں نال شیئر کیتے چلے جاندے نیں۔روایت رہی اے کہ بوہت سارے پاکستانی جیہڑی روزی روٹی ئی شہراں وچ بس جاندے نیں اوہ چار پنج دن لئی اپنے آبائی پنڈ نوں جاندے نیں پر ایس وار وبا دی وجہ نال سرکار نے پبلک ٹرانسپورٹ بند کر دتی پر ایس دے باوجود لوک کسے نہ کسے طرح اپنے پیاریاں نال ملن اپنے آبائی علاقیاں نوں اپڑن وچ کامیاب رہے۔ آبائی علاقے وچ عید منان دا سب توں زیادہ فائدہ ایہہ ہوندا اے کہ اک پاسے سانوں اپنے سگے رشتہ داراں دے نال ویلا لنگھان دا موقع ملدا اے تے نال ای اپنے بچپن دے ساتھیاں تے سکول و کالج دے فیلوز نال وی ملاقات دی راہ نکل آندی اے۔ میں تے کہنا واں کہ عید اللہ پاک دا بوہت وڈا تحفہ اے کہ شہراں وچ روزی روٹی لئی آ وسن والے میرے جہے لوک کجھ دیر لئی ای سہی پر بچپن دے ساتھیاں نال مل کے قدرت دے حسین نظاریاں دے وچکار کجھ ویلا ہر طرح دی پریشانیاں توں ہٹ کے لنگھا لیندے نیں۔

ایس سال بوہت خوشی دی گل ہوئی کہ سارے ملک وچ اک ای دن سب نے روزے رکھنے شروع کیتے پر بدقسمتی نال ایس وار ملک وچ تن تن عیداں منائیاں گئیاں۔ جس قوم نوں قرآن وچ غور و فکر دی ترغیب دتی گئی۔ جس قوم دے لوکاں نے دنیا نوں سائنس دی تعلیم دتی سی، ہر سال رمضان دے شروع تے عید دے موقعے اُتے پاکستانیاں نوں گومگو دی کیفیت وچ رکھیا جاندا اے۔ پاکستان اک اسلامی ملک اے ایتھے مذہبی تہواراں دا اعلان حکومت وقت نوں کرنا چاہیدا اے پر کیہ کریئے کہ انتہائی محترم مفتیان صاحب کئی دہائیاں توں ملک دے عوام نوں تقسیم کیتے ہوئے نیں۔ ٹھیک اے چن نوں ویکھن دا ثواب اے پر جدوں دور بین نال ای ویکھنا اے تے موبائل فون توں ملن والی شہادتاں اُتے یقین کرنا اے تے موسمیاتی نظام توں مدد لین وچ کیہ قباعت اے۔چن ویکھن والی ایہہ کمیٹیاں ہن ختم کر کے حکومت نوں علما اکرام نوں اعتماد وچ لیندے ہوئے کوئی انج دا انتظام کرنا چاہیدا اے کہ عوام سارے مذہبی تہوار اک ای دن منا سکن۔

ہن بوہت ضروری ہو چکیا اے کہ اسیں اپنی نویں نسل دا رُخ تعلیم سپورٹس تے ٹیکنالوجی ول موڑ دیئے۔ ساڈی بہادر فوج اپنی جاناں دے نذرانے پیش کر کے دہشت گردی نوں شکست دے رہی اے ہن ایہہ سوچنا اے کہ ہجوم نوں قوم کنج بنانا اے ، کنج لوکاں دی اخلاقیات نوں بہتر کرنا اے۔ ایس وار ٹرانسپورٹ بند سی پر ماں جی نے کہیا کہ چونکہ تعلیمی تے کاروبار ادارے کافی دن بند رہن گے ایس لئی عید پنڈ وچ ای کرنی اے۔

حکم دی تعمیل کردے ہوئے پنڈ اپڑے تے شام افطاری توں بعد کجھ دیر انتظار کیتا کہ شاید کدھرے چن نظر آن دی خوش خبری ملے تے اسیں چاند رات دی یاداں تازہ کر سکیے پر انج نہ ہو سکیا۔ بارش نے موسم نوں اینا خوشگوار بنا دتا سی کہ پتہ ای نہ چلیا کہ ماں جی نال گلاں کردے کردے نیند آ گئی فیر رات 12 وجے دے نیڑے نصف بہتر نے آ جگایا کہ ٹی وی والے دس رہے نیں کہ چن نظر آ گیا اے سویرے عید ہوئے گی۔ سویرے سویرے میٹھی سویاں کھان توں بعد عید دی نماز پڑھن توں بعد بوہت سارے رشتہ داراں، دوستاں تے پنڈ دے لوکاں نال سلام دعا ہوئی تے لگیا جویں روح اک وار فیر تازہ ہو چکی اے۔ نکھری نکھری فضا ، ہوا تے سرسبز کھیتاں دی سیر کردے ہوئے تے بچپن دے ساتھیاں نال ملاقات نے میٹھی عید دا لطف دوبالا کر دتا۔