جہانگیر ترین دی کہانی

احمد وقاص ریاض

تحریک انصاف نوں حکومت وچ آئے کجھ ای عرصہ ہویا سی اوہناں دیہاڑیاں اک صوبائی وزیر دی دھی دے ویاہ دی تقریب وچ شرکت دا موقع ملیا جو اوہناں دے آبائی علاقے وچ ہو رہی سی۔ وسیع پنڈال وچ وفاقی تے صوبائی وزراء‘ ممبران اسمبلی تے دوجے مہمان سینکڑوں گنتی وچ موجود سن تے برات وی اپڑ چکی سی کہ اچانک خبر آئی جہانگیر ترین دا پرائیویٹ جہاز قریبی ایئرپورٹ تے لینڈ کرن والا اے۔ تقریب دے میزبان صوبائی وزیر فوراً اوہناں نوں ریسیو کرن ایئرپورٹ ٹر گئے تے جدوں اوہ اوہناں نوں لے کے واپس پرتے تے ترین ساریاں دی نگاہواں دا مرکز سن خاص کر سرکاری تے سیاسی شخصیات اوہناں دے نیڑے آن نوں بے قرار سن۔ فیصل آباد ڈویژن توں آئے دو صوبائی وزیر تے اک خاتون مشیر اوہناں د ے نال نال چمڑے ہوئے سن۔ سارے اہم وزراء تے اعلیٰ شخصیات دی کوشش سی جہانگیر ترین لئی مختص خصوصی ٹیبل تے تھاں مل جاوے۔ ترین صاحب وی ایس خصوصی پروٹوکول توں محظوظ ہو رہے سن۔
پی ٹی آئی دی حکومت آن دے بعد جہانگیر ترین دی اہمیت تے پذیرائی صرف ایس اک تقریب تک محدود نہیں سی اوہ جتھے وی جاندے اوہناں دا بڑازبردست استقبال ہوندا سارے اوہناں نوں عمران خان دا قریب ترین دوست تے کنگ میکر سمجھدے سن۔ الیکشن توں پہلاں جنوبی پنجاب دے محاذ راہیں جہانگیر ترین دی پوزیشن تے اہمیت سائوتھ پنجاب وچ گھٹ کرن دی کوشش کامیابی نال توڑ نہ چڑھ سکی۔ 2018ء دے الیکشن وچ جنرل تے خصوصی سیٹاں لئی جہانگیر ترین تے علیم خان دی سفارشات نوں حتمی حیثیت حاصل سی۔ تحریک انصاف دی حکومت بنن دے بعد جہانگیر ترین نوں پہلا جھٹکا اوس ویلے لگا جدوں صوبہ پنجاب دا وزیراعلیٰ اوہناں دی مرضی دے بناں لگ گیا۔ وزیراعظم عمران خان نے جنوبی پنجاب نال ای تعلق رکھن والے عثمان بزدار نوں جہانگیر ترین نال اوس ویلے متعارف کروایا جدوں اوہ اوہناں نوں وزیراعلیٰ پنجاب بنان دا فیصلہ کر چکے سن۔ دل شکستہ تے حیرت زدہ جہانگیر ترین نے شروع وچ تے لوکاں نوں دسیا کہ عثمان بزدار نوں وزیراعلیٰ بنان وچ اوہناں دی مرضی شامل سی پر بعد وچ اوہناں نے منیا کہ عثمان بزدار نوں وزیراعلیٰ بنان وچ اوہناں دا کوئی کردار نہیں سی۔
پنجاب دی کابینہ وچ جہانگیر ترین دے نزدیکی کجھ ممبران صوبائی اسمبلی نوں ا کاموڈیٹ کیتا گیا پر اہم وزارتاں توں اوہناں نوں دور رکھیا گیا۔ جہانگیر ترین جہڑے انتخابات دوران لہور توں پارٹی دے اہم رہنما دے نال رَل کے اپنے حریف شاہ محمود قریشی نوں صوبے دی سیاست تے وزارت اعلیٰ توں بے دخل کر چکے سن بزدار سرکار دے اگے اپنے آپ نوں بے بس محسوس کرن لگ پئے تے ایس طرح ترین کیمپ تے بزدار کیمپ وچ وِتھاں ودھدیاں گئیاں جہدا نقصان عمران خان تے اوہناں دی پارٹی نوں ہویا۔ اک پاسے پنجاب وچ اقتدار تے پاور لئی چپقلش جاری سی دوجے پاسے مرکز وچ بااثر شخصیات جہانگیر ترین دی طاقت تے اثرورسوخ نوں ختم کرن لئی پچھے پئیاں سن جہدے لئی منظم طریقے نال کم کیتا گیا۔
سرکاری وسیلیاں نوں اوہناں دے خلاف ثبوت اکٹھے کرن تے لا دتا گیا تے فیر اپوزیشن دے احتساب نوں بیلنس کرن لئی اوہناں دے خلاف وی مقدمے بنا دتے گئے۔ کھلی ڈلھی زرعی زمین‘ جدید ترین ڈیری فارمنگ یونٹس‘ شوگر ملاں تے پاور جنریشن پلانٹس تے مشتمل ترین فیملی دا ملک دے کجھ وڈے صنعتی گروپاں وچ شمار ہوندا اے۔ دنیا بھر دے وڈے کاروباری لوکاں وانگوں ہو سکدا اے جہانگیر ترین وچ وی کمزوریاں ہون یاں معاملے پوری طرح شفاف نہ ہون جہناں دی تحقیقات لئی سرکاری ادارے تے عدالتاں موجود نیں۔ ملکی سیاست وچ جہانگیر ترین نے تحمل‘ بردباری‘ رواداری تے افہام و تفہیم دی سیاست نوں فروغ دتا تے شاید ایہو وجہ اے کہ اج ڈگدی صحت‘ کمزور ہوندی سیاسی قوت تے اپنیاں دی بے رخی دے باوجود اوہناں دے دوست تے رفیق اوہناں دے نال کھڑے نیں۔٭