عید الفطردا چَن تے یاراں دِیاں گلاں

پروفیسر حکیم شفیق کھوکھر

ایس وار عید الفطر دا چن کجھ عجب انداز نال نکلیا اے۔ یار لوکاں نے عید وی منائی تے گلاں وی کیتیاں۔ اوہناں نے ایہہ نہ سوچیا کہ عید دا اعلان کرن والی شخصیت کون اے؟ کیہ ایس نے ایہہ اعلان اپنی خوشی لئی کیتا اے یا قومی مفاد وچ۔ ایس موقعے اُتے اک وفاقی وزیر دا بیان وی معنی خیز سی جیہڑا ہن وزارت سائنس و ٹیکنالوجی نال وابسطہ نہیں رہے پر اوہناں نے مرکزی روئیت ہلال کمیٹی دے کم وچ مداخلت توں ہتھ نہیں اٹھایا۔ حالانکہ ایہہ کم ایہناں نوں مرکزی روئیت ہلال کمیٹی دی صوابدید اُتے چھڈ دینا چاہیدا سی۔ ہاں جے کمیٹی ایہناں توں رائے منگدی تے اوہ ایس دا اظہار کردے تے ’’جس کا کام اُسی کو ساجھے ‘‘ دے مصداق کمیٹی دے فیصلے دا انتظار کرنا چاہیدا سی۔ ایہہ ایس لئی کہ ایہہ کمیٹی ان پڑھ، ناسمجھ تے دینی امور توں ناواقف بندیاں اُتے مبنی سی؟ حالانکہ ایہہ گل روز روشن وانگوں عیاں اے کہ ایہہ کمیٹی وی ماضی وانگوں ذمہ دار، دیندار، ہوشیار، معاملہ فہم علماء کرام تے افسراں اُتے مشتمل سی۔ ایس نے اپنے فیصلے نال ثابت کر دتا کہ ’’ہوئی تاخیر تو کچھ باعث تاخیر بھی تھا‘‘۔ کمیٹی دے چن دی روئیت دے اعلان دا معاملہ صرف اک دن تیکر مشکوک رہندا اے اگلے دن دا چن ایس دی حقیقت نوں ظاہر کر دیندا اے۔ انج ای ایس وار ہویا، اگلے دن دے چن نے ثابت کر دتا کہ مولانا عبدالخبیر آزاد دی سربراہی وچ مرکزی روئیت الہلال کمیٹی نے سنایا سی یار لوکاں نوں ایس گل توں زیادہ ایس گل اُتے اعتراض اے کہ ایہہ فیصلہ اینی رات گئے کیوں کیتا گیا؟ ایس دا معقول تے درست جواب مولانا سید عبدالخبیر آزاد چیئر مین مرکزی روئیت الہلال کمیٹی پاکستان نے محترم مبشر لقمان نوں اک انٹرویو وچ دے دتا اے کہ کمیٹی نوں خیبر پختونخواء تے بلوچستان دے اکثر ضلعیاں توں روئیت ہلال دی شہادتاں مل گئیاں سن۔ ایہناں دی تصدیق کرن وچ کجھ ویلا درکار سی تاں جے کسے قسم دا مغالطہ باقی نہ رہوے۔ چنانچہ انج ای کیتا گیا جس دی تائید وفاقی وزیر مذہبی امور تے مولانا علامہ طاہر اشرفی مشیر وزیراعظم پاکستان نے وی کیتی تے اگلے دن دے چن نے وی ایس فیصلے نوں درست قرار دے دتا۔
مولانا عبدالخبیر آزاد دا تعلق ایسے دینی گھران نال اے جس نے 50 سال توں ودھ تیکر بادشاہی مسجد لہور دی خدمت کیتی اے تے ہن وی ایس وچ مصروف اے ایس توں پہلاں وی بے شمار موقعے آئے جتھے ایس خاندان نے ذمہ داری دا ثبوت دے کے دینی شعار دی بالادستی قائم رکھی تے باطل قوتاں نوں نظرانداز کر دتا۔ ایہناں وچوں اک واقعہ مینوں چنگی طرح یاد اے کہ اک اعلیٰ سیاسی شخصیت نے اپنی مرضی دا بیان حاصل کرن لئی مولانا عبدالقادر آزاد مرحوم نوں بوہت بھاری رقم پیش کیتی پر اوہناں نے ایہنوں قبول کرن توں صاف انکار کر دتا۔ اوہناں نے لہور وچ ہون والی اسلامی سربراہی کانفرنس دے موقعے اُتے بادشاہی مسجد لہور وچ مہماناں نوں اپنی امامت وچ نماز پڑھا کے امامسلاطین دا اعزاز وی حاصل کیتا۔ سعودی عرب دے شاہ فیصل شہید ایہناں دی بوہت عزت کردے سن۔ اوہ اکثر اپنی زندگی دے اہم واقعے سانوں سنایا کردے سن جنہاں وچ ایہناں دے مرکزی روئیت ہلال کمیٹی دے رکن دی حیثیت نال ہون والے تجربات وی اوہ ساڈے نال شیئر کردے سن۔ میں ای نہیں خواجہ جاوید صحاف وی ساڈے شریک محفل ہوندے سن۔ اوہناں نے زندگی وی ملت اسلامیہ دے اتحاد قومی سلامتی تے یکجہتی لئی جدوجہد کیتی تے بادشاہی مسجد لہور نوں وحدت اسلامی دا مرکز بنا دتا۔ اوہناں نے بادشاہی مسجد وچ بغیر رقم وصول کیتے سینکڑاں بندیاں نوں اعتکاف وچ بیٹھن دی سہولت فراہم کیتی ایہناں دے طعام دا اہتمام اوہ اپنے دوستاں دے تعاون نال آپ کردے سن۔ تے ہن ایہناں دے صاحبزادے مولانا سید عبدالاخبیر آزاد ایس روائیت نوں قائم رکھے ہوئے نیں اوہناں نے اپنے والد دی دوجی عظیم روایات نوں وی احسن طریقے نال جاری رکھیا ہویا اے۔ اوہ روئیت ہلال دے سلسلے وچ کسے قسم دے دبائو دا شکار ہو کے غلط فیصلہ کنج کر سکدے نیں؟ ایہو سوال مینوں وی پریشان کر رہیا سی کہ مینوں قاری انیس الرحمان دا فون آیا اوہناں نے دسیا کہ ایس سلسلے وچ تاخیر دی وجہ ایہہ ہو سکدی اے کہ اوہ لوک تحقیق کر رہے نیں۔ ایس دے کجھ دیر بعد ای کمیٹی دے فیصلے دا اعلان آ گیا۔ ایس دے نال ای سید عبدالبصیر آزاد نے ساری حقیقت توں مطلع کر دتا۔
سوال ایہہ پیدا ہوندا اے کہ اسیں ملکی دینی تے معاشرتی معاملات وچ ذمہ داراں دی آراء نوں اہمیت دین دی بجائے افواہواں تے غیر ذمہ دارانہ بیانات نوں اہمیت دین دا سلسلہ کدوں تیکر جاری رکھاں گے؟ امید اے کہ دوجے دن دے چن تے جناب مبشر لقمان دے انٹرویو دے بعد ایس سلسلے نوں بند کر کے دوجے امور نوں پیش نظر رکھیا جائے گا۔