اسرائیلی مظالم تے امتِ مسلمہ

فلسطینیاں دے کول لڑائی دے وسائل یعنی ہتھیار تے تجربہ
کار فوج نہیں بس جذبہ ایمانی نال برسر پیکار نیں

تحریر حمید اللہ بھٹی

اُمتِ مسلمہ لئی عید الفطر دا تہوار بوہت اہم اے۔ ایہہ اہل اسلام لئی خوشیاں نال بھرپور انعام و اکرام دا دن اے پر امسال ایہہ دن فلسطینیاں نے لاشاں و زخمی اٹھاندے لنگھایا۔ 27 رمضان نوں نماز تراویح دے دوران اسرائیل نے مسجد اقصیٰ اُتے حملہ کیتا تے اگ لا دتی جس دے دوران نہتے نمازی شہید و زخمی ہوئے فلسطینیاں نے بندوقاں و بماں دا جواب پتھراں نال دے کے غم وغصے تے بے بسی دا اظہار کیتا پر ظالم و دہشت گرد اسرائیلی فوجیاں نے خواتین و بچیاں نوں وی نہ بخشیا تے بہیمانہ تشدد دا نشانہ بنایا اسرائیلی وزیراعظم نیتن یاہو نے حملے روکن دی عالمی اپیلاں مسترد کردے ہوئے فوج نوں کاروائیاں مزید تیز کرن دا حکم دتا اے ساری عالمی تنظیماں یو این او، او آئی سی تے عرب لیگ اسرائیلی دہشت گردی دے ساہمنے بے بس وکھائی دیندیاں نیں کئی دہائیاں توں فلسطینی و کشمیری مسلماناں دی نسل کشی جاری اے پر کوئی عالمی ادارہ مداخلت دی ہمت نہیں کر رہیا۔ ہن وی عرب لیگ نے عالمی عدالت انصاف نال مداخلت دا مطالبہ کیتا اے پر کوئی شنوائی نہیں نوے لکھ دی آبادی اُتے مشتمل اسرائیل کسے دی سنن اُتے آمادہ نہیں وڈی وجہ تے امریکی سرپرستی اے جیہڑی ہمیشہ سلامتی کونسل نوں فیصلہ کن اقدام توں باز رکھدا اے ہن وی سلامتی کونسل دا اجلاس موخر کرا دتا اے جس دی وجہ امت مسلمہ دا نفاق اے۔
فلسطینیاں دے کول لڑائی دے وسائل یعنی ہتھیار تے تجربہ کار فوج نہیں بس جذبہ ایمانی نال برسر پیکار نیں وطن تے قبلہ اول دے دفاع دا فریضہ حماس دیسی ساختہ راکٹ حملیاں نال ادا کرن وچ مصروف اے پر جدید ہتھیاراں دے مقابلے وچ ایہہ راکٹ حملے کوئی معنی نہیں رکھدے محض جذبات دے اظہار تے ایمانی جذبہ کہہ سکنے آں ایہہ جذبہ ای اے کہ حملے دے دوران 11 سالہ ننھا حمزہ ہسدے مسکراندے موت گلے لا لیندا اے تے ایہہ مسکراہٹ کفن وچ وی قائم رہندی اے۔ مسجد اقصیٰ دی بے حرمتی دے خلاف شیخ جراح وچ جاری مظاہرے اُتے اسرائیلی فوجیاں دا گھڑ سوار دستہ حملہ کردا اے جس نال بھگدڑ مچ جاندی اے اک بچے نوں فوجی پھڑ کے کے بندوقاں دے بٹ مارن لگدے نیں ایہہ ظلم ویکھ کے اک کُڑی مریم عفیفی بچے نوں بچان اگے ودھدی اے فوجی ایس دا حجاب نوچ کے زمین اُتے ڈیگ دیندے نیں تے عین شاہراہ اُتے مارن تے گھسیٹن لگدے نیں نہتی کُڑی نوں بکتر بند گڈیاں وچ لے جایا جاندا اے جدوں فوجی ایہنوں ہتھکڑی پہنا دیندا اے تے اوہ مسلح فوجیاں دی بزدلی اُتے کُڑی مسکرا دیندی اے۔
اسرائیل نے عالمی قوتاں دے اشارے اُتے ای مسلماناں دے خلاف اعلان جنگ کیتا اے کیوں جے استعماری طاقتاں مسلماناں دے جذبہ جہاد خاص طور تے فلسطینیاں دی نویں نسل توں خوفزدہ نیں کئی دہائیاں توں وسائل نہ ہون دے باوجود ڈٹے ہوئے نیں پر شکست تسلیم کرن نوں تیار نہیں گولیاں دا جواب پتھراں نال دے کے وی مطمئن نیں۔ ترکی، ایران، پاکستان تے سعودی عرب جہے طاقتور فوج رکھن والے ملک وی مظلوم فلسطینیاں دی حمایت وچ بیان دین تے تشویش دا اظہار کرن تیکر محدود نیں۔ مصر ، نائجریا، ملائیشیا، انڈونیشیا جیہڑی وڈی عسکری طاقتاں نیں پر عملی طور اُتے کجھ نہیں کردے حالانکہ سارے مسلم ملک متحد ہو جان تے کسے ملک دی گستاخانہ خاکے شائع کرن دی ہمت نہ ہوئے تے نہ ای کسے نوں مسلم علاقے اُتے چڑھائی دی جرات ہو سکدی اے کیوں جے ڈیڑھ ارب مسلماناں دی منڈی نظر انداز کرنا ممکن ای نہیں پراج صورتحال اینی خراب اے کہ سوشل میڈیا تعصب دا مظاہرہ کردے ہوئے نظر انداز کر دیندا اے۔ ٹوئٹر، انسٹاگرام تے فیس بک اُتے فلسطینیاں دے اکائونٹس ڈیلیٹ تے مواد مٹادتا جاندا اے۔ احتجاج اُتے تکنیکی وائرس نو ں ذمہ دار ٹھہرا دتا جاندا اے سوچن والی گل ایہہ وے کہ ایہہ کنج دا سمجھدار وائرس اے جیہڑا سماجی رابطیاں دی ویب سائٹس اُتے مسلماناں دے حق وچ پوسٹاں ویکھ کے ای متحرک ہوندا اے تے اسرائیل دی گل ہوئے تے ایہہ وائرس کیوں زیادہ ای فعال ہو جاندا اے؟
صیہونی قیادت پوری دنیا توں یہودی لیا کے اسرائیل وچ آباد کر رہی اے کیوں جے عرباں دے وچکار ہون دی وجہ نال قومی سلامتی نوں غیر محفوظ سمجھدی اے حالانکہ کسے عرب ملک وچ حملے دی سکت نہیں اونج وی ہر اسرائیلی مرد تے عورت فوجی تربیت لازمی حاصل کردے نیں نوے لکھ دی آبادی وچ نصف توں ودھ نفوس کسے نہ کسے حوالے نال فوج نال منسلک نیں ایہو وجہ اے کہ فلسطینیاں اُتے فوج دے نال عام یہودی وی حملے کردے تے ایہناں نوں تشدد دا نشانہ بناندے نیں فوج ہجرت کر کے آن والے یہودیاں نوں آباد کرن لئی فلسطینی علاقے خالی کرا رہی اے حالاکہ اسرائیلی دے کول وسیع بے آباد علاقہ اے جتھے بے گھر یہودیاں نوں بسانا بوہت آسان اے پر صیہونی قیادت دی ضد اے کہ فلسطینیاں نوں کڈ کے ای وسانا اے ، ایسے وجہ نال خطے وچ اک وار فیر جنگ دا امکان ودھ گیا اے مسجد اقصیٰ دی بے حرمتی دی وجہ نال نحیف و نزار فلسطینی مسلماناں اُتے تشدد روکن وچ عرب ملک وی متفق نہیں متحدہ عرب امارات نے تے سفارتی تعلقات استوار کردے ہوئے بغیر ویزہ آمد و رفت دا معاہدہ کر لیا اے جیہڑا اسرائیلی حوصلے نوں مہمیز دیندا اے۔
یورشلم وچ یہودی آبادکاری ہر اسرائیلی حکومت دی اولین ترجیح رہی اے موجودہ صیہونی قیادت دی مشرقی یورشلم دے علاقے جراح اُتے نظر اے ایہہ علاقہ صلاح الدین ایوبی دے طبیب شیخ حسام الدین الجراح دے ناں توں منسوب اے جیہڑا صلاح الدین ایوبی ولوں یورشلم فتح کرن دے بعد قبلہ اول مسجد اقصیٰ دی محبت وچ ایتھے آباد ہو گئے ایہناں دے مقبرے دی مناسبت نال ایہہ علاقہ شیخ جراح اکھواندا اے جدوں 1948 دی جنگ وچ اسرائیل نے مغربی یورشلم اُتے قبضہ کر لیا تے اکثر مسلمان اردن دے زیر اثر و انتظام مشرقی یورشلم جا کے آباد ہو گئے پر 1967 دی عرب اسرئایل جنگ وچ اردن دے ہتھ توں ایہہ علاقہ جاندا رہیا ہن اسرائیل دی کوشش اے کہ جلدی توں جلدی یورشلم وچ صیہونی آبادی ودھا کے قبضہ مستحکم کر لیا جائے تاں جے کوئی ایہنوں متنازع علاقہ کہہ ای نہ سکے پر بے سروسامانی دے باوجود فلسطینی مزاحمت جاری رکھے ہوئے نیں۔ 27 رمضان توں ایہہ علاقہ مسلسل میدان جنگ اے مسجد اقصیٰ اُتے نماز تراویح دے دوران اسرائیل نے جس جارحیت دا ارتکاب کیتا اوہ ہن کھلی جنگ دی شکل اختیار کردی جا رہی اے جنہوں روکنا مسلم امہ دی ذمہ داری اے پر ایہہ ذمہ داری عملی اقدامات دی بجائے مزمتی بیان جاری کرن یا تشویش ظاہر کرن تیکر محدود اے ایسے بنا اُتے 16 مئی نوں عرب لیگ تے سلامتی کونسل دے اجلاساں دے نتیجہ خیز ہون دا امکان گھٹ اے۔
اٹلی جہے ملک تازہ جنگی کاروائی دی مزمت کرن دی بجائے اسرائیل دا دفاعی حق قرار دیندے نیں حالانکہ لڑاکا طیاریاں، ٹینکاں، میزائلاں تے بندوقاں دا مقابلہ پتھرائو نال ممکن نہیں پر سوال ایہہ وے کہ فلسطینیاں دی بجائے جے سو ڈیڑھ سو امریکی یا یہودی مارے جاندے اودوں وی عالمی طاقتاں دا انج ای رویہ ہوندا ہر گز نہیں بلکہ جے انج ہوندا تے ہن تیکر دہشت گردی کہہ کے عالمی ادارے متحرک ہو چکے ہوندے تے تادیبی کاروائی لئی اتحاد بن چکیا ہوندا غزہ وچ کیوں جے مرن والے مسلمان نیں تے شیخ جراح وچ مسلم املاک تباہ کیتی جا رہی اے ایس لئی انسانی حقوق تے مذہبی آزادی دی دہائی دین والے چپ نیں۔ اصل وچ پوری دنیا وچ مسلماناں دے خلاف فضا بن چکی اے تے طاقتور نوں کھلی چھٹی دے کے کمزور مسلم ملکاں نوں نشانہ بنایا جا رہیا اے پوری دنیا وچ فلسطین دے حق وچ مظاہرے ہو رہے نیں پر آزادی اظہار دے دعویدار فرانس نے تے اپنے شہریاں اُتے پابندی لا کے ایس حق توں وی محروم کر دتا اے ۔ افغانستان، عراق تے لیبیا دی تباہی مسلم ملکاں نوں تباہ کرن دی مہم دا حصہ اے پر ایس طرز عمل نال دنیا بدامنی دا آتش فشاں بن دی جا رہی اے خیر کسے توں کیہ امید رکھیے۔ امت مسلمہ ای چپ اے پر اسرائیلی مظالم دے خلاف نتیجہ خیز لائحہ عمل مرتب نہیں کیتا جاندا تے مستقل طور اُتے قبل اول توں محروم دے صدمے لئی تیار رہن۔