پروفیسر جنید اکرم … الوداع!

میں بوہت گھٹ اِنج دے پڑھے لکھے، دین دار تے سراپا انکسار لوک ویکھے نیں

عطاء الحق قاسمی

ساڈے ملک وچ مادری زباناں وچ کم کرن والے اکثر گمنام رہندے نیں پر ایہہ وی سچ اے کہ مادری زباناں وچ لکھن والے عموماً درویش منش ہوندے نیں۔ پروفیسر جنید اکرم وی ایہناں وچوں ای سن۔ پنجابی نال ایہناں نوں عشق سی تے سارے نقصان دے باوجود سہ ماہی رسالہ، پنجابی شائع کردے رہے تے اردو وچ لکھن والے پنجابی ادیباں نوں مسلسل قائل کردے رہے کہ تسیں پنجابی وچ وی لکھیا کرو۔ جنید اکرم معروف پنجابی شاعر ڈاکٹر فقیر محمد فقیر دے دوہترے سن جنہاں نوں بابائے پنجابی وی کہیا جاندا اے۔ گوجرانوالہ نال تعلق ہون دی وجہ نال جنید اکرم خوش خوراک ہون دے نال نال خوش مزاجی دی نعمت نال وی مالا مال سن۔ ہر سال اپنے گردے فیل ہون دی سالگرہ منایا کردے سن تے باقاعدہ کیک کٹیا کردے سن۔ جنید اکرم نوں فقیر محمد فقیر دا دوہترا ہون دا شرف تے حاصل ای سی ایس دے نال نال اوہ معروف اداکار سہیل احمد عرف عزیزی تے پروفیسر اورنگزیب دے بھرا وی سن۔ میں بوہت گھٹ اِنج دے پڑھے لکھے، دین دار تے سراپا انکسار لوک ویکھے نیں۔

پنجابی دے نال جنید اکرم دی محبت لازوال سی۔ سجن بیلی کئی وار ایہناں نوں مذاق وچ کہیا کردے سن کہ آپ دے اختیار وچ ہوئے تے آپ پنجابی نوں پاکستان دی سرکاری زبان قرار دے دین۔ جواب وچ جنید اکرم قہقہہ لاندے ہوئے کہندے کہ میرے اختیار وچ ہوئے تے پنجابی نوں عالمی زبان قرار دے دیواں۔ جنید اکرم نے متعدد کتاباں تالیف تے تحریر کیتیاں جنہاں دی تعداد 70 توں ودھ اے۔ ایسے توں اندازہ لا لوئو کہ اوہناں دے اندر تخلیقی جوہر کس قدر کُٹ کُٹ کے بھریا ہویا سی۔ جنید اکرم دا اک بوہت وڈا کم جیہڑا ذاتی طور اُتے کجھ زیادہ ای پسند آیا اوہ علامہ اقبال دی کجھ نظماں دا پنجابی ترجمہ سی۔ اپنے ادبی کم دے علاوہ اوہ عام زندگی وچ اک ملنسار تے عاجزانہ طبیعت دے مالک سن۔ ناممکن سی کہ ایہناں دی سنگت وچ بیٹھن والا ایہناں دی محبت نال سرشار نہ ہوئے۔ شوگر تے بلڈ پریشر دا مریض ہون دے باوجود اوہناں نے کدی ایہناں بیماریاں نوں اپنے سر اُتے سوار نہیں کیتا۔ 2006 وچ جدوں گردے فیل ہوئے تے اوہ یکدم قومہ وچ چلے گئے۔ ادبی حلقیاں وچ اک کہرام جہیا مچ گیا پر فیر معجزہ ہویا تے اوہ دوبارہ زندگی ول آ گئے۔ ہن اوہناں دی زندگی ڈائلسز دی محتاج ہو کے رہ گئی سی۔ ایس دے باوجود اوہ سوشل میڈیا اُتے متحرک رہے۔ سولہ سال باقاعدگی نال ڈائلسز تے بدپرہیزی دا سلسلہ جاری رکھیا، نہ خوش خوراکی وچ کمی آن دتی نہ بیماری نوں سر اُتے سوار کیتا۔ فیس بک اُتے ایہناں دی پوسٹاں ویکھ کے کوئی وی ایہہ نہیں کہہ سکدا سی کہ ایہہ بندہ جسمانی طور اُتے اینے خطرناک حالات توں لنگھ رہیا اے۔مینوں انج دے زندہ دل لوک پسند نیں جیہڑے موت آن توں پہلے نہیں مردے۔ حیرت انگیز گل ایہہ وے کہ اینی سخت بیماری دے باوجود اوہ اپنے سرکاری فرائض نمٹاندے رہے تے 2019 وچ گورنمنٹ کامرس کالج اقبال ٹائون دے وائس پرنسپل مقرر ہوگئے۔

عشق رسول ﷺ اہناں دی ذات دا خاصا سی۔ سو عمرہ کرناچاہندے سن پر مسئلہ ایہہ سی کہ اوہ ڈائلسز اُتے سن۔ ایس دا حل اوہناں نے اِنج کڈیا کہ اپنے اک دوست دی مدد نال مکہ مکرمہ وچ ای ڈائلسز دا بندوبست کیتا تے پوری عقیدت و احترام دے نال عمرہ دے فرائض سرانجام دِتے۔ جرات دا ایہہ عالم کہ پچھلے سال انتہائی نقاہت وچ ہون دے باوجود رمضان وچ روزے وی رکھدے رہے۔ شاید جان دے سن کہ ایہہ اوہناں دی زندگی دے آخری روزے نیں۔ احباب گواہ نیں کہ اوہناں دی زبان اُتے ہمیشہ درود پاک رواں رہیا۔عشقِ رسول ﷺ تے عشقِ انسانیت اوہناں دا طرہ امتیاز رہیا۔ میں کدی اوہناں دی زبان توں کسے لئی کوئی بُرا کلمہ نہیں سنیا۔ اوہناں دے نال بوہت سارے لوکاں نے ہتھ کیتے پر طاقت ہوندے ہوئے وی اوہناں نے کسے توں مڑ کے بدلہ نہیں لیا۔ اوہناں نے ساری زندگی اک عجیب جہی سرشاری دے عالم وچ بسر کیتی۔ شعر کہے، کتاباں لکھیاں، رسالہ کڈیا، درس و تدریس دے فرائض سر انجام دتے تے خلق خدا دی آسانی لئی راہواں تلاش کیتیاں۔ تسیں جنید اکرم دے جانن والے کسے وی بندے نال مل کے ویکھ لوئو،کوئی وی انج دا نہیں ہوئے گا جیہڑا وہناں دے جان دے غم وچ نہ ہوئے۔ میں زندگی وچ بوہت سارے لوک ویکھے نیں جیہڑے آخری ویلے وچ اچانک نیک ہو جاندے نیں، معافیاں منگن اُتے اتر آندے نیں تے دنیاداری توں یکدم کنارہ کش ہو جاندے نیں۔ جنید اکرم انج دے نہیں سن، اوہ اپنی موت تیکر اوہ ای سن جیہڑے زندگی وچ سن۔ اُچا لمبا بھرپور جسم دا مالک انسان جس دے اندر صرف تے صرف انکساری بھری ہوئی سی۔ اپنے ماتحتاں تے ملازماں دے نال ایہناں دا رویہ ہمیشہ دوستانہ رہیا۔ ایہناں دی شفقت تے انسان دوستی دے قصے تسیں ایہناں دے ماتحتاں توں پچھ کے ویکھو۔ سچی گل اے کہ جنید اکرم دی صورت وچ ساہنوں اک انج دا انسان میسر سی جیہڑا دل دا بادشاہ سی، اپنی گرجدار اواز دے باوجود ایس دے اندر محبت دا سمندر موجزن سی، کدی کدی میں سوچنا واں کہ دنیا انج دے شاندار لوکاں توں کیوں خالی ہوئی جا رہی اے؟ اوہ لوک کیوں نہیں مردے جیہڑے دن رات صرف نفرتاں تے کدورتاں کھلارن وچ لگے رہندے نیں۔ فیر خود توں ای جواب ملدا اے کہ شاید جنت وچ جنید اکرم جہے لوکاں دی زیادہ لوڑ اے جیہڑے خوبصورتی دے سارے تقاضیاں اُتے پورے اتردے ہون۔ میں پوری کوشش دے باوجود جنید اکرم نوں مرحوم لکھن توں قاصر واں۔ انج دے بندے توں صرف اسیں ، محروم ہوئے آں۔ دل دی گہرائیاں نال دعا اے کہ اللہ تعالیٰ جنید اکرم نوں اپنے سایہ عافیت وچ پناہ دیوے، اوہناں دی مغفرت فرمائے تے ایہناں دے لائے ہوئے پنجابی دے پودیاں دا تناور درخت بنائے۔ آمین… ثم آمین!