القدس فیر اک صلاح الدین ایوبی دی اُڈیک وچ

لكهت:مطلوب وڑائچ

کرونا توں پوری دنیا پریشان اے۔ بھارت اُتے کرونا قہر تے قیامت بن کے ٹُٹ رہیا اے۔ برطانیہ وچ بھارتی ویرینٹ مچ چکیا اے۔ برطانیہ نے کرونا دی لھویٹ وچ شدت نال آئے ہوئے ملکاں دی ریڈلسٹ جاری کیتی تے اوہدے وچ پہلے مرحلے وچ بھارت نوں شامل نہیں کیتا گیا۔ جدوں شامل کیتا گیا تے پانی سروں لنگھ چکیا سی۔ اج بھارتی ورژن کرونا برطانیہ وچ تباہی کھلار رہیا اے۔ میرٹ توں ہٹ کے سیاسی بنیاداں تے فیصلیاں دے انج دے ای بھیانک نتیجے نکلدے نیں۔ پاکستان بھارتی ویرینٹ کرونا توں بچن دی ہر ممکن کوشش کر رہیا اے۔ عید تے تھوڑا سخت لاک ڈائون لایا گیا سی جہدے وچ ہن ریلیف دتا گیا اے پر خطرے بدستور موجود نیں۔ کرونا دوران عید صرف رسمی طور تے ای منائی جاندی اے۔ ایہنوں ہور بے مزا رویت ہلال کمیٹی دے فیصلے تے تنقید نے کر دتا۔ جدوں رویت ہلال کمیٹی دے کول مصدقہ تے مستند شہادتاں آ گئیاں تے اوہناں نوں کیویں روکیا جا سکدا اے۔ مفتی منیب الرحمن بڑے عالم و فاضل نیں اوہناں ولوں اک قضا روزہ رکھن دا پیغام دتا گیا۔ تعجب خیز گل ایہہ وے کہ اک وزیر ولوں وی رویت ہلال کمیٹی دے خلاف سخت زبان استعمال کیتی گئی۔ عید بہرحال عید ہوندی اے کسے نہ کسے طور تے منا لئی جاندی اے پر ایس عید دے موقعے تے مسلماناں دے دِلاں دلاں نوں اسرائیلی فوجاں دے فلسطینیاں تے ظلم نے چیر کر رکھ دتا اے۔ ایہدے تے میڈیا وچ بہت کجھ لکھیا تے نشر کیتا جا چکیا اے تے بدستور سب کجھ کیتا جا رہیا اے۔ فلسطینیاں خلاف اسرائیلی فوجاں دیاں کاروائیاں بدستور جاری نیں۔ ہن تک مرن والیاں دی گنتی ساڑھے تن سو تے زخمیاں دی ہزاراں وچ ہو گئی اے۔ امریکہ اسرائیل دی کنڈ اُتے اے۔ ایسے طرح مسلم ملک وی باور کرا رہے نیں کہ فلسطین دے نال آں۔
ایس حوالے نال او آئی سی دا سعودی عرب وچ اجلاس ہویا جہدے وچ اسرائیل نوں چتاونی دتی گئی کہ اوہ وحشیانہ حملے بند کرے۔ او آئی سی دے وزرائے خارجہ اجلاس وچ فلسطینیاں دے حق وچ تے صیہونی ظلماں دے خلاف قرارداد منظور کیتی گئی۔ اودھر اقوام متحدہ دے سیکرٹری جنرل انتونیوگوئترس نے آکھیا اے کہ لڑائی بند تے ثالثی ہونی چاہیدی اے۔ ایمنسٹی انٹرنیشنل نے اسرائیلی اقدام نوں جنگی جرماں دا ارتکاب قرار دتا اے۔ سب توں ودھ شرمناک بیان گوئترس دا اے جو اسرائیل دے یکطرفہ حملیاں نوں لڑائی کہہ رہے نیں۔ او آئی سی دی قرارداد تے عالمی شخصیات دے بیانات کیہ بمب سٹدے اسرائیلی جہازاں تے گولے برساندے ٹینکاں دے سامنے رکھ دتے جان تے فلسطینی شہید تے زخمی ہون توں بچ جان گے۔ ہر پاسیوں منافقت ہو رہی اے اپنے وی کر رہے نیں غیر وی کر رہے نیں۔ اسرائیل اک معمولی جیہا ملک اے جہنوں اپنی بقاء دی فکر اے جہنوں عرب ملک اپنے مفادات لئی یقینی بنا رہے نیں۔ اج اسرائیلی اقدامات دے خلاف مذمتی قرارداد لیان والے کل اوہنوں منن لئی اڈی چوٹی دا زور لا رہے سن۔
دوستو! ہر پنج چھ ورھے بعد اک منظم سازش دے تحت قبلہ اول دے تقدس نوں پامال کیتا جا رہیا اے۔ کروڑاں مسلماناں دے دل تے جذبات نوں پیراں تھلے مدھن دی کوشش کیتی جاندی اے تے ہر واری فلسطینیاں دے انفراسٹرکچر نوں تباہ کر دتا جاندا اے تے ایہ نقصان ارباں کھرباں دا ہوندا اے۔ دوستو کجھ ورھے پہلاں اوس ویلے دے اسرائیلی وزیراعظم شمعون پیریز نال میریاں کجھ ملاقاتاں ہوئیاں یاد رہوے ایہناں ملاقاتاں تے مذاکرات دا شیڈول محترمہ بینظیر بھٹو دی مرضی تے ہویا سی۔ تے انج دی اک ملاقات دوران میں اسرائیلی وزیراعظم توں پچھیا کہ آخر تسیں فلسطینیاں نوں اک چھوٹی جہی ریاست بنا کے عالمی امن نوں سرپرائز دے سکدے او۔ میری ایہ گل سن کے اسرائیلی وزیراعظم مسکرائے تے کہن لگے کہ اسیں تے فلسطین نوں اک آزاد تے خودمختار جمہوری ملک ویکھنا چاہنے آں پر ساڈے عرب دوست جہڑے مشرق وسطیٰ دے آل دوالے ریاستاں تے قابض نیں تے ہر ریاست وچ انارکی دی بنیاد تے بادشاہت یاں سلطنت قائم اے۔ اک جمہوری تے آزاد فلسطین اوہناں عرب دوستاں نوں ایس لئی قابل قبول نہیں کہ فلسطین دی دیکھا دیکھی کدھرے اوہناں دیاں ریاستاں وی آزادی دی ڈیمانڈ شروع نہ کر دین۔
دوستو! موجودہ دور وچ حکومت پاکستان‘ افواج پاکستان تے سلطنت ترکی قبلہ اول دی آزادی لئی سرگرم نیں تے ترکی دے سربراہ طیب اردگان دی قبلہ اول دی آزادی لئی تڑپ ویکھ کے اندازہ ہوندا اے کہ انشاء اللہ بڑی چھیتی فلسطین اک آزاد تے خودمختار ریاست دے طور تے وجود وچ آ جاوے گا۔ بس‘ القدس فیر اک صلاح الدین ایوبی دی اڈیک وچ اے۔٭٭