کھال اور مال بچانا

جہانگیر ترین گروپ نے عمران خان نال ملاقات دے دوران انصاف ہون دی یقین دہانیاں حاصل کیتیاں

تحریر حمید اللہ بھٹی

کھال تے مال بچان دی حکمتِ عملی صرف سیاستداناں تیکر ای محدود نہیں ہر شعبے دی اولین ترجیح رہی اے نظام انصاف اُتے گل کردے ہوئے توہین عدالت لگن دا خطرہ رہندا اے تادیبی کاروائی دے خدشات دی بنا اُتے فوج تے پولیس دے خلاف گل کردے ہوئے احتیاط کیتی جاندی اے کسے بااختیار بابو دے خلاف لب کشائی توں وی نقصان دا دھڑکا رہندا اے ایسے لئی سیاستداناں نوں آسان ہدف جان کے تنقید و تبصرے کیتے جاندے نیں پر ساری برائیاں تے خامیاں سیاستداناں دے کھاتے وچ شمار کرنا دانشمندی نہیں چاہے جیہڑا وی شعبہ ہوئے انسان نوں انسان ای کہنا تے سمجھنا بہتر اے کسے نوں ڈر نال فرشتہ کہنا یا ثابت کرنا غلط اے انج دا طرز عمل شخصیت پرستی دے زمرے وچ آندا اے حق گوئی نہیں کہہ سکدے ایہہ نہیں کہندے کہ سارے سیاستدان چنگے نیں بلکہ دیگر شعبیاں وانگوں سیاسی اکھاڑے وچ شریک بوہت سارے لوک ابن الوقت تے مفاد پرست وی نیں کہن دا مقصد ایہہ وے کہ دیگر شعبیاں وچ فرشتے نہیں اوہ وی انسان نیں ایہناں وچ وی خامیاں تے کوتاہیاں ہو سکدیاں نیں ممکن اے ایہناں وچ وی کجھ کھال تے مال بچان دی حکمتِ عملی اُتے عمل پیرا ہون۔
جہانگیر ترین دھڑا خود نوں ہم خیال گروپ کہوے یا تحریک انصاف نظریاتی کہلوائے سچ ایہو اے کہ کھال تے مال بچان دی جدوجہد اے حرص و ہوس دی جنگ اے حاکم وقت توں ایہناں دی جماعت دے کافی لوک خفا نیں تے حکومتی جماعت توں وکھری سیٹاں دے خواہاں نیں مقصد دبائو پا کے کھال تے مال بچان دی منزل حاصل کرنا اے۔ خفا لوک کامران ہوندے نیں یا ناکامی مقدر بن دی اے ایہہ تے ویلا دسے گا پر ایس وچ شائبہ نہیں کہ حکمران جماعت شکست و ریخت نال دو چار اے جویں جویں الیکشن دی منزل نیڑے آ رہی اے خفا لوکاں دے بین بلند ہو رہے نیں ایہہ لوک جہانگیر ترین دا موہڈھاملن نوں نعمت سمجھدے ہوئے اکٹھے ہو گئے نیں پر ایہہ تصور کر لینا کہ حکومتی جماعت وچ صرف ایہو لوک غلط تے باقی سب متقی پرہیز گار نیں انج ہر گز نہیں جس دا جتھے دا چل رہیا اے اوہ اخلاق تے اصول یا ایمانداری نوں خاطر وچ نہیں لیاندا جے خاطر وچ لیاندے تے پٹرول ، چینی، دوائیاں تے آٹے دے بحران جنم نہ لیندے بحراناں دی وجہ با اختیار لوکاں دی ناتجربے کاری دے نال ذاتی اثاثیاں وچ وادھے دا جنون اے جنہاں دے کول اختیار نہیں یا آمدن دے ذرائع محدود نیں اوہ آہ و بکا وچ مصروف نیں ایہہ لوک اپنی جماعت یا جہانگیر ترین کسے نال مخلص نہیں سب دے اپنے اہداف نیں ایہہ آمدہ الیکشن توں پہلاں انتخابی مہم لئی بکثرت وسائل دے طلبگار نیں جے حکومت خفا لوکاں دے کھال و مال اُتے انگلی نہیں چکدی تے ایہہ ہم خیال یا تحریک انصاف نظریاتی گروپ تحلیل ہون وچ لمحہ بھر دی تاخیر نہیں کرے گا۔
حکومتی جماعت وچ دھڑیاں دی بھرما رہے جنہاں دی ترجیحات وکھری تے اک دوجے دی ضد نیں جہانگیر ترین گروپ نے عمران خان نال ملاقات دے دوران انصاف ہون دی یقین دہانیاں حاصل کیتیاں پر خدشات تے حقائق دا جائزہ لین لئی علی ظفر نوں دتی گئی ذمہ داری دے بارے واقفانِ حال دا کہنا اے کہ سینٹر علی ظفر نے چینی بحران توں فائدہ چُکن دے حوالے نال لگن والے الزامات دی تصدیق کر دتی اے جس اُتے کاروائی اگے ودھان دا گرین سگنل دتا جا چکیا اے ایسے بنا اُتے ہم خیال یا تحریک ِ انصاف نظریاتی الگ نشستاں دا مطالبہ کر دتا اونج تے تحریک انصاف توں ہم خیال گروپ انصاف دا طلب گار اے پر تحریک انصاف دے کئی دھڑے ہن جہانگیر ترین نوں منطقی انجام تیکر اپڑانا چاہندے نیں ایسے سوچ دے تحت ملتان جلسے دے دوران عمران خان دی موجودگی وچ شاہ محمود قریشی نے تنقید دے نشتر چلائے کیوں جے گروپاں دی نظراں عمران خان دے بعد پیدا ہون والے خلا نوں پُر کرن اُتے نیں ایہہ مقصد جہانگیر ترین نوں سیاسی اکھاڑے توں باہر کیتے بنا پورا نہیں ہو سکدا پر پتر سنے نااہل ہون دے بعد ترین دی جدوجہد ہن سیاسی منصب دی بجائے کھال تے مال بچان تیکر محدود ہو چکی اے تاں ای بجٹ توں پہلاں فیصلیاں دا اعلان کیتا گیا مالیاتی بل دی منظور وچ ناکامی اقتدار توں محرومی اُتے منتج ہو سکدی اے ایس لئی دبائو ودھایا گیا اے پر رفقا توں نرم تے حریفاں نال سخت سلوک نوں بحر حل انصاف نہیں کہہ سکدے ۔
تحریک انصاف وچ ایہہ کوئی پہلی ٹوٹ پھوٹ نہیں الیکشن کمیشن دے روبرو وفارن فنڈنگ کیس وی ایس جماعت دے بانی رُکن نے دائر کر رکھیا اے جیہڑا ہجے معرضِ التوا وچ اے پر فیصلہ ہوندا اے تے حکومتی جماعت وچ ہیجانی تے انتشار دی کیفیت ودھ سکدی اے ایس توں علاوہ کراچی پریس کلب دے باہر ایسے جماعت دے بانی اراکین کئی ماہ تیکر احتجاجی کیمپ لا کے ناخوشی ظاہر کر چکے نیں چاہے کھال تے مال بچان دی حکمت عملی دے تحت ای سہی جہانگیر ترین گروپ دا معرض وجود وچ آنا اچھنبے دی گل نہیں بلکہ فہمیدہ حلقے تے اقتدار دے تن ورہے لنگھن اُتے ششدر نیں جس جماعت دا سربراہ اپنے سوا کسے نوں اہمیت نہ دیوے تے مشاورت دی بجائے خوشامدیاں اُتے مشتمل اک انجمن ستائش ِ باہمی بنا کے خوش رہوے اوہ جماعت زیادہ دیر متحد نہیں رہ سکدی جہانگیر ترین دے اردگرد جمع ہون والے بے قدری تے تنگ دستی دا شکار نیں تے جہانگیر ترین دی کھال تے مال بچان دی جدوجہد وچ شامل ہو کے قدر جتان تے تنگ دستی توں نجات حاصل کرن دے متمنی نیں پر جدوجہد وچ شامل کدوں تیکر ثابت قدم تے جہانگیر ترین دے کدوں ہمرکاب رہندے نیں یقین نال کجھ کہنا محال اے کیوں جے اکثر دا وفاقی تے پنجاب حکومت نال رابطہ اے ذرائع دے مطابق اگلے مہینے پیش ہون والے بجٹ وچ حکومتی جماعت دے اراکین نوں آسودہ حال کرن لئی ترقیاتی فنڈز ودھاندے ہوئے ممبر قومی اسمبلی نوں 50 جد کہ ممبر صوبائی نوں 25 کروڑ دی ترقیاتی رقماں جاری کرن دا منصوبہ اے جس دے تحت ترقیاتی منصوبے جمع کران دا عمل جاری اے ہن تے سردار عثمان بزدار وی دوریاں دے دوران ترقیاتی پیکج دا اعلان کرن لگے نیں ایس لئی گروپ وچ ٹوٹ پھوٹ ہون یا بکھرن دا عمل انہونی نہیں ہوئے گا۔
اقتدار دی ادھی مدت لنگھان دے باوجود تحریک انصاف سابق حکمران جماعتاں پی پی تے پی ایم ایل دی اجارہ داری ختم نہیں کر سکی تے نہ ای ملک وچ وڈے پیامنے اُتے کسے قسم دی تبدیلی لیا سکی اے ملکی مسائل گھٹ ہون دی بجائے ودھے نیں معیشت دی صورتحال دگرگوں اے چور تے ڈاکو حکمراناں دی بہ نسبت دیانتداراں دے دور اقتدار وچ نہ صرف فی کس آمدن وچ کمی واقع ہوئی اے بلکہ غربت دی لکیر توں تھلے جان والیاں دی تعداد وچ وی وادھا ہویا اے جس نال حکمران جماعت دی مقبولیت متاثر ہوئی اے تے اراکین اسمبلی اپنے مستقبل دے حوالے نال بے یقینی دا شکار نیں ساری بدنامیاں دے نال الیکٹ ایبلز نوں قبول کرن دا نتیجہ اے کہ احتساب دا عمل محض سیاسی انتقام محسوس ہوندا اے حکومتی امور وچ شفافیت دا فقدان عیاں حقیقت اے پر وزیراعظم کئی کئی گھنٹیاں اُتے محیط خطاب نال مطمئن کرن دی کوشش کردے نیں ظاہر اے گلاں نال مسائل حل نہیں ہوندے عملی طور اُتے وی کجھ کم کرنا پیندا اے رفقا تے حریفاں توں پچھ تاچھ وچ روا رکھی جان والی تفریق نوں غیر جانبدار احتساب نہیں کہیا جا سکدا ایس تناظر وچ جہانگیر ترین دی کھال تے مال بچان دی مہم کامیاب ہو سکدی اے کیوں جے ایہناں دا گروپ جے بجٹ دی منظور دے دوران غیر حاضر رہندا اے یا مخالفت کردا اے تے حکومت اکثریت توں محروم ہو جائے گی۔