پہلے اپنے آپ نوں تے ٹھیک کر لوو؟

لكهت:ڈاکٹر اختر شمار

اسرائیلی بربریت‘ سفاکی تے ستم دیاں ساریاں حداں ختم ہو چکیاں نیں تے اسیں اجہے ’’ناں‘‘ دے مسلمان صرف قرارداداں تے اسرائیلیاں نوں بددعاواں دین توں علاوہ اج تک کجھ نہیں کر سکے۔ چوداں سو ورھیاں وچ اسیں چنگے مسلمان وی نہیں بن سکے حالاں کہ مسجداں‘ مبلغین تے عبادتاں دی کوئی کمی نہیں۔ اسیں تے اک اللہ‘ اک رسولؐ نوں منن والے کدی اک نہیں ہو سکے تے ہن تک رنگ‘ نسل‘ زبان تے فرقہ واریت دے نال دنیاوی حرص و ہوس وچ نکونک پھسے ہوئے آں۔ اسیں تے تھوڑے جنے لالچ وچ اپنا ایمان وی داء تے لان وچ کدی نہیں جھکے۔ اسیں وکھرے وکھرے فرقیاں تے دھڑیاں وچ تقسیم کرکے آپس وچ لڑوا کے تباہ کرن دی کوشش ہمیشہ توں جاری رہی اے۔ ہن تے غیرمسلم سانوں طعنے دیندے نیں کہ ’’جے تہاڈا ایمان اے کہ اللہ ساڈا اے‘ رسولؐ سب توں ارفع و اعلیٰ نیں (تے بے شک اسیں سارے ایہدے تے دل و جان نال یقین وی رکھنے آں) تے فیر مخالفین کہندے نیں کہ من لیا تہاڈے نبیؐ ساریاں توں چنگ ینیں پر تسیں اپنے نبیؐ دی پیروی کردے ہوئے‘ اوہناں دے اسوئہ حسنہ تے عمل کرکے‘ کیوں چنگے نہیں بن سکے‘‘۔
تسیں مسلمان آ پس وچ کیوں لڑدے او۔ کرپشن تسیں کردے او‘ ملاوٹ تے جعل سازی (کھانے پینے دیاں شیواں تک) تسیں سب کردے او‘ رشوتاں‘ کمیشناں لیندے او‘ لٹ مار چور بازاری کہڑا عیب جو تہاڈے وچ نہیں‘ تسیں اپنے نبی کریمؐ نوں من دے او تے چنگے اخلاق والے کیوں نہیں بن سکے؟ چوداں سو ورھیاں وچ تہانوں تے سب توں اعلیٰ قوم بن جانا چاہیدا سی۔ ایثار‘ ہمدردی‘ قربانی تے محبت دے پیکر تسیں کیوں نہیں۔ بددیانت‘ مکار‘ جھوٹے کیوں او؟ کہڑی برائی اے جہڑی تہاڈے لوکاں وچ نہیں جد کہ تہاڈا دین اسلام اک مکمل ضابطہ حیات اے۔ تسیں کہندے او رمضان وچ ابلیس قید کر دتا جاندا اے تے فیر رمضان وچ سب توں ودھ لٹ مار‘ مہنگائی تے ملاوٹ کیوں ہوندی اے؟۔
پیارے قارئین! یقین کرو‘ میرے کول ایہناں سارے سوالاں دا کوئی جواب نہیں۔ میں وی اپنے آپ نوں اک سچا عاشق رسولؐ سمجھنا واں۔ میں اپنے آپ نوں ٹھیک نہیں کر سکیا تے کیویں دوجے مسلمان بھراواں نوں کیویں الزام دے سکنا واں۔ میں وی سڑکاں تے لاٹھی لے کے‘ لبیک یا رسول اللہؐ دے نعرے تے لا سکنا واں آن جان والیاں دیاں گڈیاں‘ رکشے‘ کاراں بھن سکنا واں۔ اپنی قومی املاک نوں نقصان اپڑا سکنا واں پر اپنے ول انگلی اٹھان والے یاں تنقید کرن والے نوں کدی معاف نہیں کر سکدا۔ سگوں میں تے ایس توں وی اگے جا کے ایویں ای کسے تے وی توہین رسالت دی تہمت لا کے انتقام لین توں وی باز نہیں آ سکدا۔ میں ای نہیں میرے سامنے اجیہاں کئی مثالاں نیں۔ اسیں اپنے پیارے نبی کریمؐ ہوراں خلاف اک لفظ نہیں سن سکدے تے مینوں میرے رسول دی قسم جے کوئی میرے سامنے میرے رسولؐ خلاف نعوذباللہ اک لفظ وی منہ چوں کڈھے تے میں ’’غازی علم الدین‘‘ بنن وچ دیر نہ لاواں۔ ایہ میرا ایمان اے آزمائش شرط اے۔ پر مجموعی طور تے جدوں اپنی قوم دے نوجواناں نوں ویکھنا واں یاں اپنی قوم دے رہنماواں نوں ویکھنا واں تے افسوس ہوندا اے کہ اساں کشمیر یاں فلسطین لئی کیہ کیتا اے؟۔ کشمیر کمیٹی نے پچھلے کئی ورھیاں توں کہڑی کارکردگی وکھائی اے؟ پارلیمنٹ وچ بیٹھن والیاں نے اسلام نوں لاگو کرن لئی کیہ کیتا اے؟ موجودہ حکومت ’’مدینے دی ریاست‘‘ دے قیام دی گل کردی اے مینوں ذاتی طور تے عمران خان دی نیت تے کوئی شک نہیں پر کیہ اوہناں دے آل دوالے بندے صرف دنیاوی آسائش لئی پیسہ بنان دے چکر وچ الیکشن نہیں لڑے؟ کہڑا اسمبلی دا ممبر اے جو صرف لوکاں دی خدمت لئی انتخابات وچ حصہ لیندا اے سارے دولت‘ آسائش‘ مراعات تے سرکاری خرچ تے عیش کرن لئی حکومت وچ آنا چاہندے نیں۔ سارے اپنے اثاثے ودھان لئی پارلیمنٹ دا حصہ بن دے نیں غریب لئی کوئی سوچن والا نہیں۔
ساڈا سارا نظام ای اوہناں لوکاں دے ہتھاں وچ اے جو اپنے ذاتی مفادات لئی اکٹھے ہو کے وطن عزیز دا لہو چوس رہے نیں۔ ایہو وجہ اے پاکستان غریب اے عوام غریب‘ صرف اسمبلی ممبران تے سیاستدان دولت مند نیں کل تک جو سائیکل‘ سکوٹراں تے سن او ہائوسنگ سوسائٹیاں تے فیکٹریاں دے مالک نیں۔ اوہ سمجھدے نیں کہ ایس دنیا وچ جو مرضی کر لوو عمرہ حج کرن نال بالکل معصوم تے پاک صاف ہو جان گے۔ حالاں کہ ایہ سراسر غلط اے انج نہیں‘ ساریاں سیاسی جماعتاں بیروزگار نوجواناں نوں لالچ یاں خواب وکھا کے استعمال کردیاں نیں۔ قنون صرف کمزور‘ لاچار تے ماڑے لوکاں لئی اے۔ جج ہون‘ سیاستدان‘ صحافی ہون یاں وڈے وڈے ٹائیکون یاں تاجر‘ ایہو حکومتاں نوں بدلدے نیں۔ جرنیل وی ایہدے وچ شامل ہون گے پر جرنیلاں نوں موقع کون دیندا اے۔ عدلیہ‘ سیاستدان‘ بیوروکریسی تے میڈیا جے ٹھیک سمت وچ ہووے تے شاید فوج کدی سیاست وچ مداخلت نہ کرے۔ ایس ساری بحث وچ پئے بناں سب توں پہلاں ایس قوم دی اخلاقیات ٹھیک کرن دی لوڑ اے۔ تعلیم دی لوڑ اے‘ پر تعلیم لئی اک اجہے نظام دی لوڑ اے جہدے وچ اخلاقی تربیت ہو سکے۔ دین دی روح نوں سمجھان والے استاداں دی لوڑ اے۔ نہیں تے نام نہاد عاشقان رسول دی گنتی وچ تے وادھا ہوندا رہوے گا پر حق و صداقت دی آواز تے لبیک کہن والا کوئی نہیں ہووے گا۔ سارے وکائو مال ہون گے جیویں اسیں اج آں۔ اسیں کشمیر لئی کجھ نہیں کر سکے جہنوں اسیں اپنی شہ رگ قرار دینے آں۔ شہ رگ تے چھرے چل رہے نیں پر اسیں فلسطین لئی دعاواں تے احتجاج کر رہے آں پہلے اپنے گھر نوں ٹھیک کرو‘ ساریاں دا احتساب کرو‘ عدل تے قائم کر لوو جتھے بلاخوف تے لالچ قاضی انصاف کر سکے پر ایتھے واقعتاً قنون کھڈونا اے تے اوہدی اکھاں تے پٹی بنھی اے نہیں تے سوشل میڈیا تے زبان خلق تے دھیان دتا جاندا۔ نتانے کشمیریاں تے فلسطینیاں لئی اک ایٹمی طاقت کیہ کر سکدی اے پر پہلے کر لوو اخلاقی طور تے ساڈے سیاستدان تے صاف ستھرے کر لوو‘ نیٹ اینڈ کلین۔٭