ایجنسیاں دے کہوٹہ ایٹمی پلانٹ اُپر خفیہ حملے دا انکشاف

تابندہ خالد

انڈیا نے پہلا ایٹمی دھماکہ 1974 نوں کیتا تے جنوبی ایشیاء وچ ایٹمی ہتھیاراں دی دوڑ دی بنیاد رکھ لئی۔ فیر انڈیا نوں نہ جانے کیہ سوجھی کہ ایس نے 11 مئی 1998ء نوں راجھستان دے صحرا پوکھران وچ اک وار فیر 5 دھماکے کر کے خطے وچ امن دے توازن نوں وگاڑدے ہوئے للکاریا۔ ایٹمی دھماکے کرن دے علاوہ کشمیر دی کنٹرول لائن اُتے فوج جمع کر دتی۔ کئی دن لنگھ جان دے بعد جدوں پاکستان ولوں کوئی جواب نہ آیا تے روایتی حریف انڈیا نے عالمی سطح اُتے ایہہ گھٹیا تاثر پھیلانا شروع کر دتا کہ پاکستان دے کول شاید ایٹم بم ای موجود نہیں۔ ایس ویلے چرب زبانی پاروں انڈیا دی زبان باہر نکل رہی سی۔ ایس دے تیور ای بدل گئے سن۔ طاقت و اختیار دے گھمنڈ وچ اوہ آپے توں باہر ہو چکیا سی۔ آخر کار قوم دی بے چینی و اضطراب دی گھڑیاں ختم ہوئیاں تے بھارت ولوں ایٹمی دھماکیاں دے جواب وچ 28 مئی 1998 نوں پاکستان نے ایٹمی دھماکے کر کے ملکی دفاع نوں مضبوط توں مضبوط تر بنا دتا۔پاکستان پہلی مسلم ایٹمی طاقت بن گیا۔ اسیں 5 دھماکے کیتے تے انج دا طمانچہ بھارت نوں رسید کیتا جس نے اج تیکر ایس دا ذہنی توازن درست کیتا ہویا اے۔ پاکستان ولوں دشمن نوں واضح پیغام دتا گیا کہ پاکستان جغرافیائی حدود دے تحفظ دی پوری صلاحیت رکھدا اے۔ پاکستان نے ایس ویلے تیکر دھماکے نہیں کیتے جدوں تیکر بھارت نے پہل نہیں کیتی۔ پاکستان نے ایٹمی دھماکہ کیتا تے انڈونیشیا توں شمالی افریقہ تیکر امن و تحفظ دا اک چراغ روشن ہویا۔ فلسطینی بالاں نے خوشی نال نعرے لائے کہ ہن اسرائیل دی چیرہ دستیاں توں اسیں محفوظ رہ سکاں گے۔ مقبوضہ کشمیر ترانیاں نال گونج اٹھیا۔ مسلم امہ نوں عسکری تشخص حاصل ہویا۔ قارئین !پاکستانی سول حکومت تے پاک فوج نے جدوں مل کے اپنا ایٹمی منصوبہ شروع کیتا تے کہوٹہ وچ لیبارٹری دا قیام عمل وچ لیایا گیا۔ کہوٹی ایٹمی پلانٹ دشمناں خاص طور تے انڈیا تے اسرائیل دی اکھاں وچ کھٹکھدا سی۔ ایہہ گل ذہن نشین کر لوئو کہ موساد، سی آئی اے تے دیگر ایجنسیز اپنے ٹارگٹ ملک دی حساس معلومات چرا کے جدوں ایس ملک دے خلاف اپریشن دا اعادہ رکھدیاں نیں (خواہ ایہناں نوں کامیابی ہوئے یا نہ ہوئے) تے کجھ عرصے دے بعد اپنی نہایت اہم کلاسیفائیڈ، پوشیدہ دستاویزات یا سنسنی خیز انکشافات منظر عام اُتے لیاندیاں رہندیاں نیں۔ مشہور زمانہ امریکن تھنک ٹینک بروکنگرانسٹی ٹیوشن دا ذیلی ادارہ، بروکنگزانڈیہ، جس وچ بھارتی نژاد امریکہ محقق واہ گروپال سنگھ اک عرصے توں سینئر فیلو دی حیثیت نال کم کر رہے سن۔ اوہناں نے انکشاف کیتا کہ جولائی 1981 وچ بھارتی فضایہ کہوٹہ اُتے حملہ کرن لئی پلان تشکیل دے چکیا سی۔ قارئین بھارت نوں انج کرن دی جرات ایس لئی ہوئی کہ اسرائیلی فضایہ 1981 وچ عراقی ایٹمی پلانٹ نوں تباہ کر چکی سی جد کہ دوجے اسلامی ملک مصر دے اہم ایٹمی سائنسداناں نوں سازش دے تحت قتل کروا کے ایٹمی پروگرام ختم کروا دتا سی۔
اسرائیل دا ایہہ زعم سی کہ نویں ابھردی ایٹمی طاقت پاکستان دی ایٹمی تنصیبات نوں وی آسانی نال تباہ کر سکدا اے۔ بھارت تے پہلے ای کہوٹہ پلانٹ دا سب توں وڈا دشمن سی تاں دونویں ایسے ساز باز وچ سرگرم رہے۔ بھارتی دفاعی مبصر کرناڈ دے مطابق 1980 وچ عراق دے ایٹمی مرکز تے ریسرچ سنٹر اُتے اسرائیلی حملے نال اک سال پہلے بھارتی فضائیہ نے کاغذی مشقاں شروع کر دتیاں سن جس اُتے نشان زدہ علاقہ کہوٹہ سی۔اریان لیوی تے کیتھرین اسکاٹ کلارک ممتاز برطانوی اخبار گارڈین نال منسلک معروف تفتیشی صحافی جنہاں نے 2007 وچ اپنی کتاب Deception: Pakistan The US and The Global Weapons Conspiracy وچ لکھیا کہ فروری 1983 وچ بھارتی افواج دے اعلیٰ افسراں نے اسرائیل دا خفیہ دورہ کیتا ایہہ انج دے الیٹرانک آلات خریدن آئے سن جیہڑے کہوٹہ دے فضائی دفاع نوں جام کر سکن۔ ایس دے علاوہ اسرائیلی اخبار یروشلم پوسٹ نے 23 فروری 1987 نوں ایہہ انکشاف کیتا کہ اسرائیل نے تن وار بھارتی حکومت نوں کہوٹہ حملے لئی منان دی کوشش کیتی پر بھارت نے پاکستان دے تباہ کن رد عمل دے خوف نال ایس ایڈونچر توں انکار کر دتا۔ یروشلم پوسٹ دے ڈیوڈ ہارووٹز نے عالمی مبصرین دی رپورٹس دا حوالہ دے کے دسیا کہ اسرائیلی سوچ بچار کرن والے اداریاں دی رو نال پاکستان دا ایٹمی پروگرام 1987وچ جوہری ہتھیاراں دی تیاری دے قابل سی تے اسرائیل خفیہ معلومات دی فراہمی وچ کوشاں رہیا۔ قارئین اکستان اللہ رب العزت دے رازاں وچوں اک راز اے۔ ایس دا بننا معجزہ اے۔ ایہہ اللہ دا کرم فضل تے ایس دی عنایت اے کہ دشمن اپنے مذموم مقاصد وچ ہمیشہ ناکام رہیا اے تے رہوے گا۔ پاکستان ایٹمی بمباں دی تعداد تے کوالٹی وچ انڈیا توں برتری رکھدا اے تے پاکستانی میزائل سو فیصد ہدف نوں تباہ کرن دی صلاحیت رکھدا اے۔ بولٹن آف دی اٹامک سائنٹسٹس نامی ادارے دا کہنا اے کہ پاکستان دے کول جوہری ہتھیاراں دی تعداد ہندوستان توں کدھرے زیادہ اے ساڈا ملک پاکستان دنیا دے ایہناں ملکاں وچوں اے جتھے ہر شے دی فراوانی اے بس جے فقدان اے تے موثر لیڈر شپ دا ۔ خدا کرے کہ ایہہ سبز ہلالی پرچم تاقیامت انج ای لہراندا رہوے۔