اقوام متحدہ وچ پاکستان دے ہیرو … مخدوم شاہ محمود قریشی

وزیر خارجہ شاہ محمود قریشی نے فلسطین دے حق وچ مضبوط موقف پیش کر کے پوری دنیا نوں جھنجھوڑ دتا

لكهت:بلال بٹ

مخدوم شاہ محمود قریشی وزیر خارجہ پاکستان نوں اپنے بزرگاں ولوں بڑی جائیداداں، قامہ، سجادہ نشینی، عزت، دولت تے شہرت ورثے وچ خوب ملی پر اج سیاست وچ اوہناں نے جیہڑا مقام بنایا اے اوہ ایہناں دی ذاتی محنت، لگن تے عوامی خدمات دا ثمر اے۔ ہاں البتہ ایہناں دے بزرگاں دی دعائواں ہر حال وچ ایہناں دے نال شامل حال رہیاں نیں۔ قومی سیاست دا آغاز اوہناں نے 1985ء وچ غیر جماعتی سیاست نال کیتا تے اوہ ممبر صوبائی اسمبلی و قومی اسمبلی متعدد مرتبہ بن چکے نیں تے ایسے طرح اوہ صوبائی وزیر، وفاق وچ وزیر مملکت تے فل منسٹر وی رہ چکے نیں۔ اوہناں نے اپنی ذاتی محنت تے ایمانداری نال اپنے خانوادے دی سیاسی روایات نوں خوب پروان چڑھایا تے اپنے آبائی شہر ملتان دا ناں روشن کیتا۔ ایہو وجہ اے کہ اج ایہناں دے مخالفین وی ایہناں اُتے کرپشن دا الزام نہیں لا سکدے۔ مخدوم شاہ محمود قریشی نے بطور وزیر خارجہ دوجی وار 20 اگست 2018ء نوں حلف اٹھایا۔ ایہہ اوہ دور سی جدوں پاکستان ہر پاسے توں تابڑ توڑ حملے ہو رہے سن۔ ایہناں وچ سیاسی تے معاشی خصوصاً پاکستان دی بین الاقوامی برادری وچ کوئی خاص مقام نہیں سی ۔ ملک معاشی طور اُتے دیوالیہ ہون دے نیڑے سی تے فلیف نے وی پاکستان دا ناں گرے لسٹ وچ پا دتا ہویا سی۔ ایہہ اک انتہائی تکلیف دہ تے مشکل ترین لمحہ سی کہ پاکستان نوں گرے لسٹ توں کنج کڈیا جائے؟ کیوں جے ایس وجہ نال پاکستان بین الاقوامی سطح اُتے کوئی امداد یا سرمایہ کاری دا معاہدہ وی نہیں کر سکدا سی۔ بھارت بڑے زوراں اُتے سی۔ امریکہ توں علاوہ مسلم ملکاں جنہاں وچ یو اے ای، سعودی عرب، کویت تے بحرین شامل سن، نال پاکستان دے تعلقات سرد مہری دا شکار سن جد کہ بھارت دے وزیراعظم مودی نوں یو اے ای نے دوبئی وچ مندر دی چابی پیش کیتی تے سعودی عرب نے مودی نوں اپنے ملک دے سب توں وڈے اعزاز نال نوازیا۔ ایہناں حالات وچ کسے وی وزیر خارجہ لئی کم کرنا نہ صرف مشکل سی بلکہ ناممکن وی سی۔ پر بقول مخدوم شاہ محمود قریشی کہ میں کم شروع کرن توں پہلے اپنے پروردگار دے حضور تے بوسیلہ کملی والی سرکار دعا منگی کہ پروردگار ایس عاجز نوں اینے بڑے بحران وچ کامیابی عطا فرمایا۔ وزیر خارجہ مخدوم شاہ محمود قریشی نے پچھلے تن ورھیاں وچ پوری دنیا دے سربراہواں تے اپنے ہم منصبیاں نوں پاکستان دی تاریخ وچ سب توں زیادہ فون کالز، خطوط تے دورے کیتے تے فیر ہولی ہولی برف پگھلنا شروع ہوئی جس دے نتیجے وچ نہ صرف امریکہ رام ہویا بلکہ سی پیک دے حوالے نال چین پاکستان دے قریب ترین ہو گیا اوہ ای یو اے ای تے سعودی عرب جیہڑے اپنے قرض واپس منگ چکے سن۔ اج الحمداللہ وزیراعظم پاکستان عمران خان نوں ایئر پورٹ اُتے خود لین آندے نیں۔ بہترین فارن پالیسی دی وجہ نال مردہ معیشت سنبھلنا شروع ہو گئی تے اج پاکستان دے قومی ذخائر تے شرح نمود وچ وادھا ہو چکیا اے جیہڑا مصنوعی نہیں حقائق اُتے مبنی اے تے جس دی تعریف بین الاقوامی مالیاتی ادارے کر چکے نیں تے اج ایس دیوالیہ ہون والے پاکستان وچ کامیاب خارجہ پالیسی دی وجہ نال مالی امداد تے سرمایہ کاری دے درجناں معاہدے ہو چکے نیں تے مزید ہو رہے نیں۔ جی ہاں ایہہ وی پاکستان دی خارجہ پالیسی دی کامیابی دا ثبوت اے کہ جنوبی ایشیاء وچ روس، چین، ترکی تے ایران اُتے مشتمل اک نواں بلاک وجود وچ آ چکیا اے جیہڑا خطے وچ طاقت دے توازن نوں برقرار رکھن وچ سنگ میل ثابت ہوئے گا۔ ایس دے علاوہ ترکی تے ملیشیا پاکستان دے اینے نیڑے آ چکے نیں کہ ہن پاکستان ایس خطے وچ امریکہ دی زبان توں ڈومور دے الفاظ نہیں سن سکدا تے خارجہ پالیسی دی سب توں وڈی کامیابی ایہہ وے کہ ہن سعودی عرب تے ایران اک دوجے دے نیڑے آ چکے نیں تے بوہت جلدی دونویں ملکاں دے نہ صرف وجود دا تبادلہ ہوئے گا بلکہ سربراہواں دی ملاقات تے اک دوجے دے ملکاں دے دورے وی ہون گے۔
ایہہ امر قابل ذکر اے کہ نیو یارک روانہ ہون توں پہلے ای وزیر خارجہ شاہ محمود قریشی نے کہیا سی کہ اسرائیلی مظالم روکن لئی اقدامات چکے جان تے غزہ دی مخدوش صورتحال اُتے بین الاقوامی افواج غزہ دے اندر تعینات کیتیاں جان۔ غزہ دی صورتحا اُتے نیویارک وچ بلائے گئے اقوام متحدہ دے جنرل اسمبلی اجلاس نال خطاب کردے ہوئے وزیر خارجہ شاہ محمود قریشی نے کہیا کہ ویلا آ گیا اے کہ ہن اسرائیل نوں کہیا جائے کہ بس بوہت ہو گیا۔ اسرائیل نوں انسانیت دے خلاف ایہناں جرائم دی معافی نہیں ملنی چاہیدی۔ انسانی حقوق دے عالمی ادارے جنگی جرائم اُتے اسرائیل توں باز پرس کرن۔ اوہناں نے کہیا کہ اسرائیل نے مظلوم فلسطینی باشندیاں اُتے ظلم دی انتہا کر رکھی اے، اسرائیلی نال درجناں فلسطینی شہید تے سینکڑے زخمی، پجاہ ہزار بے گھر ہو گئے، بمباری دے سبب غزہ وچ اشیائے خوردونوش دی قلت اے، غزہ ہنیرے وچ ڈوب چکیا تے روشنی صرف اسرائیلی میزائل حملیاں دی اے۔ اوہناں نے کہیا کہ اسرائیلی مظالم روکن لئی فوری اقدامات دا ویلا آ چکیا۔ سلامتی کونسل دی ولوں اپنی ذمہ داریاں توں غفلت افسوس ناک اے، اج اسیں انسانی ہمدردی دی بنیاد اُتے کجھ کردے نیں یا نہیں ایہہ تاریخ دا حصہ بن جائے گا، اسرائیلی جارحیت دا فوری خاتمہ عالمی برادری دی ترجیح ہونی چاہیدی اے۔ وزیر خارجہ شاہ محمود قریشی نے مسجد اقصیٰ دی بے مزمتی و غیر قانونی اسرائیلی آبادکاریاں دی مذمت کردے ہوئے کہیا کہ عالمی برادری دی ذمہ داری بن دی اے کہ اوہ فلسطینیاں اُتے صیہونی جارحیت دا خاتمہ کرائے۔ ایہناں وچکاراں دا اظہار وزیر خارجہ شاہ محمود قریشی نے کویتی ہم منصب ڈاکٹر احمد نصرال محمد الصباح نال ملاقات دے دوران کیتا، ایس دوران دونویں وزرائے خارجہ دے مابین فلسطین دی وگڑدی صورتحال اُتے تبادلہ خیال ہویا۔ ایس موقعے اُتے شاہ محمود قریشی نے فلسطین وچ کشیدگی وچ کمی لئی کویت دی کاوشاں نوں سراہندے ہوئے کہیا کہ فلسطینیاں اُتے مظالم نال مسلم امہ حالت اضطراب وچ اے، پاکستان عبادت وچ مشغول فلسطینیاں اُتے حملے دی شدید مذمت کردا اے۔ سعودی وزیر خارجہ فیصل بن فرحان دا کہنا اے کہ اسرائیل فلسطین تنازع خطہ نوں غلط سمت وچ دھکیل رہیا اے جس دی وجہ نال پائیدار امن دا رستہ مشکل ہو رہیا اے اک انٹرویو وچ سعودی وزیر خارجہ فیصل بن فرحان دا کہنا سی کہ اسرائیل تے فلسطین دا تنازع خطہ نوں غلط سمت وچ دھکیل رہیا اے جس پاروں امن دا رستہ مزید مشکل ہوندا جا رہیا اے تاں عالمی برادری کشیدگی ختم کرن لئی سفارتی کردار ادا کرے، ایس تنازع دی وجہ نال خطے وچ دیگر طاقتاں مضبوط ہو رہیاں نیں۔ سعودی وزیر خارجہ فیصل بن فرحان نے کہیا دونویں ملکاں دے درمیان کشیدگی ختم کرن لئی سب توں پہلے تشدد نوں ختم کرنا ہوئے گا تے انتہائی سنجیدگی نال امن دی گل کردے ہوئے مسئلے دا حل کڈنا ہوئے گا ساڈا پہلا مقصد اسرائیل تے فلسطین دے وچکار امن مذاکرات نوں شروع کروانا اے کیوں جے پائیدار امن دا ایہو واحد رستہ اے۔ اقوام متحدہ دے سیکرٹری جنرل انتونیو گوتریس نے غزہ وچ فوری جنگ بندی دا مطالبہ کر دتا۔ تفصیل دے نال فلسطین دی صورت حال اُتے اقوام متحدہ دی جنرل اسمبلی دے اجلاس وچ سیکرٹری جنرل انتونیو گوتریس نے غزہ وچ فوری جنگ بندی دا مطالبہ کردے ہوئے کہیا کہ مغربی کنارے وچ جاری تشدد نوں روکنا ہوئے گا۔ اسرائیل تے فلسطین دے وچکار تنازع نوں نظر انداز نہیں کیتا جا سکدا۔
ایہہ حقیقت اے کہ اج توں پہلے حضرت محمد مصطفیﷺ دی ذات اقدس اُتے حملے تے توہین آمیز خاکے چھاپن دے خلاف بین الاقوامی سطح اُتے اک منظم تے مضبوط اواز کدی نہیں اٹھائی گئی سی جس طرح پاکستانی وزارت خارجہ نے اٹھائی۔ ایسے طرح مخدوم شاہ محمود قریشی وزیر خارجہ پاکستان نے 27 رمضان المبارک نوں فلسطین دی عوام اُتے ہون والے حملے تے فیر مسلسل اسرائیلی مظالم دے خلاف دنیا بھر وچ فلسطین دا مقدمہ لڑ کے ایہہ ثابت کر دتا اے کہ پاکستان واحد ملک اے جیہڑا فلسطین دی جدوجہد دے نال ایسے طرح کھڑا اے جس طرح کشمیریاں دی جدوجہد دے نال اقوام متحدہ دی جنرل اسمبلی توں پاکستانی وزیر خارجہ نے 21 مئی نوں اک دھواں دھار تقریر کیتی جس نے پوری دنیا دے حکمراناں دی اکھاں کھول دتیاں کیوں جے ماضی وچ تے صرف رسماً مذمتی قرار داداں وی پیش کیتیاں جاندیاں سی پر ایہہ واحد دن جس دن پاکستانی وزیر خارجہ نے دنیا دے حکمراناں دی اکھاں وچ اکھاں پا کے نہ صرف گل بلکہ ٹھوس تے واضح الفاظ وچ کہیا کہ دنیا فلسطین اُتے مظالم بند کرا کے تے اسرائیل نوں جگی جرائم اُتے سزا دتی جائے ایہہ اوہ الفاظ سن جیہڑے جنوبی ایشیا توں سلامتی کونسل دے اجلاس وچ پہلی وار اٹھے سن۔ آئو اک نظر شاہ محمود قریشی دی سلامتی کونسل وچ تقریر اُتے پانے آں۔
٭٭٭