ترقی دے دعوے تےغربت وچ وادھا

ملک دے 80 فیصد عوام نوں تے شاید ایہہ تیکر معلوم نہیں کہ اسٹاک ایکسچینج ہوندا کیہ اے

نسیم شاہد

اک پاسے سٹاک ایکسچینج بلندیاں اُتے جا رہی اے تے دوجے پاسے غربت اسمان نوں چھو رہی اے۔ ایہہ دونویں تے اک دوجے دے برعکس تے مقابل نیں فیر ایہہ کنج بیک وقت اپنی اپنی تھاں اُتے جمعی ہوئیاں نیں۔ ادارہ شماریات دے مطابق 38 فیصد لوک پہلے توں زیادہ غریب ہو گئے نیں۔ پہلے توں مراد ایس حکومت دے آن توں پہلے ، انھے نوں وی نظر آ رہیا اے کہ عام بندے دی قوت خرید بوہت گھٹ ہو گئی اے ، اینی گھٹ کہ اوہ جسم و جاں دا رشتہ وی بڑی مشکل نال برقرار رکھ پا رہیا اے آخر کدھرے تے خرابی اے کہ ترقی ہوندی تے نظر آرہی اے پر عام بندے نوں ایس دا کوئی فائدہ نہیں اپڑ رہیا۔ تسیں اہنوں مبالغہ آرائی نہ سمجھو کل مینوں اک منظر نے حد درجہ افسردہ کر دتا۔ میں اک پھل والے دی ریڑھی اُتے خوبانی لین لئی کھڑا سی کہ اک سفید پوش عورت اپنی دھی دے نال آئی تے پچھن لگی خوبانی دے دو دانے کنہے دے مل جان گے۔ ریڑھی والے نہیا کہ 30 روپئے دے کیوں جے اوہ اڑھائی سو روپئے کلو خوبانی ویچ رہیا سی۔عورت نے دو خوبانیاں خریدیاں تے چلی گئیاں۔ میں سوچ دا رہ گیا کہ ایہہ چنگی خاصی سفید پوش عورت سی تے ایس دے کول کلو ادھا کلو خوبانیاں خریدن دے پیسے نہیں سن۔ ایس توں تھلے جیہڑے غربت وچ زندگی لنگھا رہے نیں ایہناں دا حال کیہ ہوئے گا۔ ایہہ معاملہ غربت یا مہنگائی دا اے یا فیر بُری گورننس دا ایہہ اندھیر نگری کس نے مچا رکھی اے کہ سو روپے کلو وکن والا پھل اڑھائی سو روپے کل ویچیا جا رہیا اے کدھرے نہ کدھرے تے گڑ بڑ اے کہ اُتے دی سطح اُتے خوشحالی تے ترقی دے دعوے کیتے جا رہے نیں تے نچلی سطح اُتے غربت لوکاں توں آخری نوالہ تیکر کھوہ رہی اے۔
ملک دے 80 فیصد عوام نوں تے شاید ایہہ تیکر معلوم نہیں کہ اسٹاک ایکسچینج ہوندا کیہ اے جتھے اک دن وچ ارباں روپئے اُتے چلے جاندے نیں تے اگلے ای دن ارباں روپئے تھلے آ جاندے نیں۔ ایہہ خوشحالی دا انڈکس ہو ای نہیں سکدا۔ اصلی خوشحالی تے اودوں نظر آندی اے جدوں لوکاں نوں پیٹ بھر کے کھانا ملدا اے، جدوں ایہناں دی محدود آمدنی وچ اینی قوت خرید ہوندی اے کہ اوہ اپنے بالاں نوں روٹی، سالن دے نال دے سکن۔ اج ضروریات زندگی دی ہر شے نوں پَر لگ گئے نیں۔ لوکاں دی آمدنی تے ودھی نہیں، سرکاری ملازماں دی تنخواہواں نہیں ودھ سکیاں ہن ایس بجٹ وچ 10 فیصد تنخواہواں ودھان دا فخریہ اعلان کیتا جا رہیا اے۔ دو سال وچ 10 فیصد تنخواہواں ودھن دا مطلب ایہہ وے کہ اک سال وچ پنج فیصد دا وادھا، جد کہ ایس دوران مہنگائی وچ وادھا 30-40 فیصد ہو چکیا اے کسے نوں ایس دا احساس ہے کہ ایہہ مخلوق آخر گزار کنج کردی ہوئے گی۔ وزیراعظم صاحب نے کجھ دن پہلے فرمایا سی کہ جتھے کجھ لوکاں دا جزیرہ ترقی کر رہیا ہوئے تے عوام دا سمندر غربت وچ ڈبیا رہوے تے اوہ ملک ترقی نہیں کر سکدا۔ ہن ایہناں توں دست بستہ پچھن دی جسارت تے کیتی جا سکدی اے کہ ایہناں دی حکومت نے غریباں دے سمندر نوں خوشحال بنان دا کیہڑا کم کیتا اے۔ حقیقت تے ایہہ وے کہ ایس سمندر دی وسعت وچ کجھ ہور وادھا ہو گیا اے۔ ادارہ شماریات دی رپورٹ اکھاں کھول دین لئی کافی اے۔ تلخ حقیقت ایہہ وے کہ ایس ویلے ملک وچ سفید پوش مڈل کلاس طبقہ ختم ہو کے رہ گیا اے۔ اک پاسے اسٹاک ایکسچینج والی خوشحالی و امارت اے تے دوجے پاسے معاشرے دے پسے ہوئے طبقیاں دی غربت اے، جتھے ایہناں نوں مناسب غذا مل رہی اے تے نہ زندگی دا اوہ سکون جیہڑا فلاحی معاشرے وچ انسان دی بنیادی ضرور ت سمجھیا جاندا اے۔
نویں وزیر خزانہ شوکت ترین ایہہ یقین تے دلوا رہے نیں کہ بجٹ وچ مہنگائی گھٹ کرن لئی اقدامات کیتے جان گے۔ غریباں نوں ریلیف دتا جائے گا پر کسے نوں ایہناں دیاں گلاں اُتے یقین نہیں آ رہیا، کیوں جے انج دی روایتی گلاں تے ہر بجٹ تقریر وچ کیتیاں جاندیاں نیں جیہڑا ہن تقریر توں پہلے ای کیتی جا رہی اے۔ جنہاں دا اثر ہمیشہ الٹ ای ہوندا اے۔ اج کل وزیر خزانہ ایس گل اُتے پریشان نیں کہ کساناں توں 4 روپئے کلو وچ لیا جان والا پیاز صارف نوں 40 روپئے کلو وچ کیوں ملدا اے۔ اوہ ایس اُتے کوئی قدم چکنا چاہندے نیں ایہہ گل تے وزیراعظم وی کئی مہینے توں کہہ رہے نیں کہ کھیت توں منڈی تیکر آندے آندے شیواں کئی سو گنا مہنگی ہو جاندیاں نیں۔ ایسے گل دا تے سب نوں علم اے سوال ایہہ وے کہ ایس دا سدباب کنج کیتا جا سکدا اے؟ کیہ ساڈی ضلعی انتظامیہ وچ اینی صلاحیت ہے کہ اوہ ایس لٹ مار نوں ختم کر سکے۔ کیہ کوئی انج دا میکنزم بنایا جا سکدا اے کہ کسان نوں وی ایس دی محنت دا جائز صلہ ملے تے عوام نوں وی شیواں سستے داماں مل سکن۔ نہیں جناب انج کجھ نہیں ہوئے گا کرپشن زدہ نظام انج دا کوئی کم نہیں کر سکدا جیہڑا خود ایس دے پیراں اُتے کلہاڑی بن کے برسے۔ مارکیٹ کمیٹیاں وی بنی ہوئیاں نیں تے ڈپٹی کمشنر اپنے ضلعیاں دی منڈیاں دا دورہ وی کردے رہندے نیں۔پر عوام نوں کوئی ریلیف نہیں ملدا۔ حالیہ دناں وچ مرغی دے گوشت دی مثال سب دے ساہمنے اے۔ ایس دی قیمتاں وچ سو گنا توں ودھ وادھا کنج ہویا کسے نے ایس دا جائزہ لین دی کوشش نہیں کیتی۔ جے کسے حکومتی اقدام یا تھوڑی بوہت ٹیکساں دی چھوٹ نال عوام نوں ایہہ گوشت سستے داماں مل سکدا سی تے انج کیوں نہیں کیتا گیا، کیوں حکومت ایس معاملے توں ہن تیکر اینی لاتعلق اے کہ کسے وزیر مشیر نے ایس موضوع اُتے بیان تیکر نہیں دتا۔
22 کروڑ آبادی دے ملک وچ احساس پروگرام تے لنگر خانیاں دے ذریعے غربت ختم نہیں کیتی جا سکدی۔ بلکہ ایس نال غربت ودھ جاندی اے۔ اصل کم ایہہ وے کہ عوام دی قوت خرید نوں ودھایا جائے ، روپے دی قدر وچ وادھا کیتا جائے، کہن نوں ایہہ روزانہ ای کہیا جاندا اے کہ ساڈا روپیہ تگڑا ہو رہیا اے پر زمینی حقائق ایہہ نیں کہ روپیہ کمزور ہو رہیا اے تے عوام دی قوتِ خرید کمزور توں کمزور تر ہوندی جا رہی اے ۔ بجلی، گیس، پٹرول دی مہنگائی نے ہر شے نوں مہنگا کر دتا اے۔ ایس اُتے انتظامیہ دی نااہلی اپنی تھاں اے کہ اوہ ناجائز منافع خوراں دے اگے بے بس کھڑی اے۔ جس دا جتھے دا لگ رہیا اے اوہ عوام نوں لٹ رہیا اے۔ دوجے پاسے جی ڈی پی دی شرح ودھن دے دعوے تے اسٹاک ایکسچینج دے اسمان اُتے جان دی خبراں نیں جیہڑے عوام دے مسائل توں ماورا اک بیانیہ اے جدوں تیکر معیشت وچ بہتری دے اثرات عام بندے تیکر نہیں اپڑدے تے ایس دی آمدنی وچ مہنگائی دے تناسب توں وادھا نہیں ہوندا یا فیر مہنگائی گھٹ نہیں ہوندی تے ترقی دے سارے دعوے عوام دے زخماں اُتے نمک چھڑکن دا اک عمل ای ثابت ہون گے۔کیہ حکومت ایس وار کوئی انج دا انقلابی بجٹ پیش کر سکدی اے جیہڑا عوام نوں اک وڈا ریلیف دے سکے۔ کیہ بنیادی ضرورت دی شیواں اُتے ٹیکس چھوٹ دے کے ایہناں دی قیمتاں نوں گھٹ کرن دا رستہ اختیار کیتا جائے گا یا صرف اک روایتی اعداد و شمار دے گورکھ دھندے اُتے مبنی بجٹ پیش کر کے عوام دے زخماں اُتے مزید نمک ای چھڑکن دی مشق دہرائی جائے گی۔