سفیرِ امن عنایت حسین بھٹی

اوہناں پنجابی زبان تے ثقافت دے ودھا لئی بہت خدمات سر انجام دِتیاں

عتیق انور راجہ

گجرات شہر نوں ایہہ اعزاز حاصل اے کہ ایس ضلعے دے تن بہادر فوجی افسراں ’’میجر راجہ عزیز بھٹی،میجر محمد اکرم تے میجر شبیر شریف ‘‘نے دفاع وطن دا فریضہ ادا کردے ہوئے بہادری و دلیری دی انج دی کہانیاں لکھیاں کہ نہ صرف اپنیاں بلکہ دشمناں نے وی ایہناں دی وطن پرستی نوں تسلیم کیتا تے حکومت پاکستان ولوں ایہناں نوں وطن دے سب توں وڈے اعزاز نشان حیدر نال نوازیا گیا تے ایس دے بعد ناں آندا اے، گجرات وچ پیدا ہون والے تن عظیم ترین لوک گلوکاراں یعنی عالم، لوہار، عنایت حسین بھٹی تے شوکت علی خان دا ایہناں تناں نے ماں بولی دی محبت دا کجھ ایس طرح حق ادا کیتا کہ انپڑھ ہوئے یا پی ایچ ڈی ہر کوئی ایہناں دی صلاحیتاں تے خدمات دا معترف اے ، میں کہنا ایہہ چاہنا واں کہ ماں بولی پنجابی دی خدمت کرن وچ ایہناں تناں نے اوہ مقام حاصل کیتا اے کہ قیامت تیکر ایہناں دا ناں لوکاں دے دِلاں وچ عزت و محبت نال باقی رہوے گا۔
31مئی معروف فلمساز، اداکار، گلوکار، کالم نگار، ٹی وی اینکر،اسکالر تے سفیر امن عنایت حسین بھٹی دا یوم وصال اے۔ مرحوم 12 جنوری 1928 ء وچ گجرات برطانوی ہند وچ پیدا ہوئے۔ ابتدائی تعلیم شہر گجرات دے پبلک ہائی اسکول توں حاصل کیتی فیر وکیل بنن لئی لہور چلے آئے پر قدرت نوں کجھ ہور ای منظور سی تے آپ نوں دوران تعلیم ای وائی ایم سی اے وچ بطور اداکار پہلی اسٹیج اُتے پرفارمنس دین دا موقع مل گیا۔ ایس پرفارمنس دے بعد ایہناں نوں ریڈیو اُتے گانے دی پیشکش ہوئی تے فیر ہدایتکار نذیر نے عنایت حسین بھٹی دا گانا سنیا تے اپنی فلم وچ گانے دی پیشکش کر دتی۔ایس دے بعد موسیقار جی اے چشتی نے عنایت حسین نوں اپنی فلم ‘’پھیرے‘ وچ گانا گان لئی کہیا، جس دا گیت ’او اکھیاں لاویں ناں‘نے کافی مقبولیت حاصل کیتی۔ نامور موسیقار فیروز نظامی دے مشورے اُتے عنایت حسین بھٹی نے بطور گلوکار اپنے فلمی سفر دا آغاز کیتا تے ایہناں نوں ہتھوں ہتھ لیا گیا۔

گجرات شہر نوں اعزاز حاصل اے کہ ایس دھرتی دے 3 بہادر سپتراں میجر راجہ عزیز بھٹی،میجر محمد اکرم اور میجر شبیر شریف نوں نشانِ حیدر ملیا

1955ء وچ عنایت حسین بھٹی نوں فلم ’ہیر‘ وچ ہیرو دے طور اُتے کم کرن دا موقع ملیا، گلوکاری دے نال نال ایہناں دی اداکاری نوں وی خاصا سراہیا گیا۔ ایہناں نوں پاکستان دا پہلا سپر اسٹار پلے بیک گلوکار وی کہیا جاندا اے۔ عنایت حسین بھٹی نے متعدد ہٹ گانے گائے۔ چن میرے مکھناں، جند آکھاں کہ جان سجناں، دنیا مطلب دی او یار، دم عشق دا بھرنا پے گیا نی، تے دلبر ملسی کیہڑے وار وغیرہ ایس دی کجھ مثالاں نیں۔ عنایت حسین بھٹی نے1967ء وچ فلم ’’چن مکھناں‘‘ بنائی، جس نے کامیابی دے سارے ریکارڈ توڑ دِتے۔ ایس دے بعد فلم سجن پیارا، جند جان، دنیا مطلب دی، عشق دیوانہ، سچا سودا، ظلم دا بدلہ سنے کئی کامیاب فلماں بنائیاں۔1965 تے 1971دی جنگ دے دوران لازوال ملی نغمے گا کے عنایت حسین بھٹی امر ہو گئے۔ بھٹی صاحب نے بطور پروڈیوسر بوہت ساری فلماں وی بنائیاں جنہاں وچ ’’وارث شاہ‘‘، ’’منہ زور‘‘، ’’ظلم دا بدلہ‘‘ سنے کئی یادگار فلماں پروڈیوس کیتیاں۔ بھٹی صاحب نوں اپنی ماں بولی پنجابی نال بوہت محبت سی۔اوہناں نے پنجابی زبان تے ثقافت دی بہتری لئی بوہت ساری خدمات سرانجام دتیاں نیں۔ ایہناں دا رحجان ابتداء توں ای صوفی شاعری ول سی۔ عنایت حسین بھٹی نوں وارث شاہ ، میاں محمد بخشؒ تے دوجے پنجابی صوفی شعرا نال والہانہ عشق سی۔ عنایت حسین بھٹی کئی ورھیاں تیکر اک اخبار لئی چیلنج دے ناں توں کالم وی تحریر کردے رہے۔ پنجابی زبان دی ترویج لئی اوہناںنے ضیاء شاہد تے مسعود کھدر پوش دے نال مل کے ہفت روزہ میگزین ’کہانی’ شروع کیتا۔

گجرات وچ پیدا ہون والے 3 عظیم ترین لوک گلوکاراں یعنی عالم لوہار، عنایت حسین بھٹی تے شوکت علی خان نے ماں بولی دی محبت دا حق ادا کیتا

مُکدی گل ایہ کہ بوہت گھٹ ویلے وچ عنایت حسین بھٹی فن دے ایس مقام اُتے اپڑے جس نوں حاصل کرن لئی لوک ترسدے نیں۔ 1991ء وچ پی ٹی وی نے صوفیائے کرام، ایہناں دی درگاہواں تے تعلیمات دے حوالے نال ’’چانن ای چانن‘‘پروگرام شروع کیتا تے ایہنوں پیش کرن لئی عنایت حسین بھٹی دا انتخاب کیتا گیا۔ بعدازاں ’’اجالا‘‘ تے فیر ’’تجلیوں‘‘ دے ناں توں ایہہ پروگرام چلدا رہیا۔
صاحبو! اُنج تے عنایت حسین بھٹی مرحوم نے ہر شعبے وچ ای کمال مہارت دا مظاہرہ کیتا اے پر مذہبی ہم آہنگی دے حوالے نال ایہناں دی اک خاص پہچان سی۔ پنجاب حکومت نے ایہناں نوں کئی وار امن کمیٹیاں دا رکن منتخب کیتا۔ ایس دے علاوہ اوہ اتحاد بین المسلمین دے وی رکن رہے۔ اوہ مذہبی انتہا پسندی دے بوہت خلاف سن۔ ایس ناسور دے اثرات دا ایہناں دی دور بین نگاواں نوں ادراک ہو گیا سی۔ ایہناں نوں پتہ سی کہ مسلماناں نوں کوئی وی کسے گل اُتے مشتعل کر کے اک دوجے دے مقابل لیا سکدا اے۔ ایس لئی مذہبی ہم آہنگی، بین المذاہب رواداری بھائی چارے تے فروغ امن لئی عنایت حسین بھٹی صاحب نے عالمی امن تحریک دا آغاز کیتا۔ ایس نیک مقصد دے حصول لئی آپ نے متعدد سیمینار منعقد کروائے۔ ایہناں سیمیناراں وچ اک پاسے آپ مسلماناں دے آپسی اختلافات نوں ختم کرن تے دوجے پاسے مختلف مذہباں دے وچکار پیدا ہون والی نفرت نوں گھٹ کرن اُتے زور دتا کردے سن۔ ایہناں دی خدمات دے اعتراف وچ اج بوہت سارے لوک ایہناں نوں سفیرِ امن دے لقب نال یاد کردے نیں۔