انسانیت دی پکار

رابعہ رحمٰن

ساڈے فلسطینی بھین بھرا جس اذیت توں لنگھ رہے نیں تے جس بریریت دا نشانہ ایہناں  نوں  بنایا جا رہیا اے ایس دی نظیر نہیں ملدی۔ اج انسان دی زندگی کنہی ارزاں ہو گئی کہ ریت دے ذریاں دی مانند ہر پاسے بکھری نظر آندی اے۔ اوہ انسان جس لئی فرشتیاں نوں سجدہ واجب کیتا گیا۔ جنہوں اشرف المخلوقات دا درجہ عطا کیتا گیا جس لئی رب کائنات نے فرمایا، میرا بندہ ، میرا مومن، انسانیت دا علمبردار، تے اج ایس رب دے بندے نال کنج دا سلوک روا رکھیا جا رہیا اے۔ ظلمت کدے دے دن تے اوہ سن جدوں جہالت سی۔ جدوں لوک پتھر رگڑ کے اگ ساڑدے سن جدوں غاراں تے خیمیاں وچ گزر ہوندی سی جدوں سفر طوالت پاروں مہینیاں وچ طے ہوندے سن۔ رستیاں دا تعین ستاریاں دی سمت نال کیتا جاندا سی۔ جدوں انسان انسانیت تے اپنے رب توں بے خبر سی۔ ظلم دی داستاناں نال تاریخ دے اوراق تے بے شمار کالے ہوئے پر ایس دور نوں اج دے دورنال مماثل نہیں کیتا جا سکدا۔ اودوں نہ انسان چن اُتے اپڑیا نہ ایٹمی طاقت دا کوئی امکان نظر آندا سی ، نہ علم دی روشنی چار سو پھیلی سی نہ شعور و آ گہی دی منزلاں طے کر کے انسان ستاریاں اُتے کمند پان نکلیا سی، نہ اک بٹن دبان نال دنیا ساڈے ساہمنے آ جایا کردی سی۔ پر ایس بے شعوری دے زمانے وچ اینا فشار، اینا ظلم، اینی ستم ظریفی، اینی انسانیت سوزی فیر وی نہیں سی جو کہ ایس علم دی روشنی،فصاحت و بلاغت،عقل و دانش، شعور و آگہی، نے اج زمین اُتے پھیلا رکھی اے۔ حرص و ہوس ہمیشہ دی محتاجی اے۔ کیہ لنگھے ورھیاں دے تاجدار اج نیں یا کہ اج دے تاجدار کل ہون گے۔ ہر گز نہیں۔ کیہ ایہناں نوں ثریا نے زمیں اُتے نہیں دے ماریا جنہاں نے اپنا مذہب بھلا دتا تے اسلاف دی تعلیم و تربیت نال رو گردانی کیتی۔ مسلماناں نے جدوں وی اسلام دے ناں اُتے زمین دا کوئی ٹوٹا فتح کیتا تے صوفیا کرام نے محبت نال عملاً اسلام پھیلایا۔ ایسے طرح اسلامی ملکاں دا رقبہ ودھدا تے مسلماناں دی فتوحات تیز ہوندیاں گئیاں۔ تے بے شمار اسلامی ملک صفحہ ہستی اُتے نظر آن لگے۔ ایس وچ کوئی شک نہیں کہ مسلماناں نوں اپنا آپ منوان وچ لازوال قربانیاں دینیاں پیاں۔ بالاں، بڈھیاں، عورتاں تے جواناں نے اپنی جاناں دی پرواہ کیتے بغیر آئندہ آن والی مسلمان نسل لئی خون دی آبیاری نال تن تے شجر لائے تاں جے آن والی اللہ دی مخلوق نوں غلامی توں نجات مل جائے پر کیہ اج دا مسلمان آزاد اے ، کیہ اج دا مسلمان پابہ زنجیر نہیں۔ پر انج کیوں اے۔ کیہ مذہب تے عقیدے دے طور و اطوار وی کدی بدلیا کردے نیں۔ کیہ اللہ دے بندے دی صفات پانی دے بلبلے دی صورت ہویا کردی اے نہیں تے فیر آخر انج کیوں اے۔ کیوں مسلمان ای ہر تھاں اُتے تحقیر و ذلت دے گڑھے وچ ڈگدا جا رہیا اے۔

آخر مسلماناں دا قتل عام ای کیوں۔ اسرائیلیاں، یہودیاں، استعماری تے صیہونی طاقتاں نال سلطنتِ روم و شام جاندی نظر آندی اے۔ مسلماناں دا انج قتلِ عام کہ معصوم بالاں دے سر تن توں جدا، ماواں دی گود وچ بے کفن جوان لاشے، حوا دیاں بیٹیاں دی حرمت دی تذلیل دی داستاناں، لہو دریا دی صورت پھٹ رہیا اے۔ بالاں دے عالمی دن اُتے معصوم نوازائیدہ بالاں دے بے جان جسم کلمہ طیبہ دے غلاف وچ لپیٹ کے ماواں دفنان لئی زمین لبھدیاں نیں تے کدھرے پھُلاں جگنوئواں تے ستاریاں جہے کومل جسم خاک بدن ہو رہے نیں۔ کیہ اج ایہہ ظلم کرن والے کل ایس زمین دے تھلے نہیں ہون گے تے کیہ فیر ایہ زمین ایہناں نوں تھاں دیوے گی کہ فاسد مادیاں وانگوں اپنے سینے توں کڈ کے گندے بدبو دار کوڑے دے ڈھیر اُتے اگل دیوے گی۔ حیرت اے کہ انسانیت دا علمبردار اقوام متحدہ تے دوجی این جی اوز اینے وسیع پیمانے اُتے ہون والے مسلماناں اُتے مظالم تے اذیت ناک حالات اُتے چپ کیوں نیں۔ دنیا دے کسے وی کونے وچ دوجے مذہباں دے افراد دے نال ذرا جہی نا انصافی اُتے ہر کوئی متحرک ہو جاندا اے پر میڈٰا دے اینا واویا کرن تے غزہ دے مسلماناں اُتے بے بہا ظلم ڈھان بلکہ ایہناں نوں صفحہ ہستی توں مٹان دی پرزور سازش تے بہیمانہ رویے دے باوجود کسے دی زبان تیکر نہیں ہلی۔ مسلماناں نے کیہ کجھ برداشت نہیں کیتا۔ کشمیر دے مسلماناں اُتے مظالم، جنگ آزادی 1947 دی تباہ کاریاں، بھارت دے بزدلانہ حملے، بنگلہ دیش دے علیحدہ ہو جان دا جان لیوا دکھ، دہشتگردی دی نام نہاد جنگ وچ ان گنت قیمتی جاناں دا ضیاع تے ایہناں دے خانداناں دیاں قربانیاں۔ آخر مسلمان کدوں تیکر برداشت کرے گا۔ اپنی غلطیاں تے گناہواں دا خمیازہ بوہت بھگت لیا۔ مسلمانو۔۔۔۔! اج اکٹھ دا ویلا اے۔ دنیا دے کونے کونے وچ پھیلے ہوئے مسلماناں دا اک پلیٹ فارم ہوئے، کوئی فرقہ کوئی صوبہ، کوئی متعصب فکر کوئی شیعہ سنی نہ ہوئے، سب مسلمان ہون۔ سب دا ایمان اک ہوئے، اللہ ، رسولؐ تے قرآن اک ہوئے ، آزادی منشور ہوئے، انسانیت دستور ہوئے، حکومت پاکستان نے جیہڑی فلسطینی بھین بھراواں لئی اواز چُکی اے تے جس تکلیف دا اظہار پاکستانی عوام نے ایہناں لئی کیتا اے ایہناں دی سچی محبت اے۔ عبدالستار ایدھی مرحوم دے پتر دا ٹیم لے کے فلسطین جانا تے المصطفیٰ ٹرسٹ دے عبدالرزاق ساجد دا فلسطینی مسلماناں لئی امداد اپڑانا اک بوہت وڈا کم اے ۔ ہمیشہ یاد رکھو جیہڑا اپنی ذات دی نفی کر کے لوکاں دی تکلیف وچ ایہناں تیکر اپڑدا اے خدا دے کول اوہ اجر عظیم پاندا اے۔