علامہ اقبال اوپن یونیورسٹی دی تعلیمی مساعی وچ ڈاکٹر شیخ محمد انیس دا کردار

آپ نے غریب تے یتیم بالاں دی معاونت لئی سپورٹس فنڈ توں فیس معافی لئی انتظامات کیتے تے بالاں لئی تعلیمی وظائف دا بندوبست کیتا

لکھت: شکیل امجد صادق

شیخ ڈاکٹر محمد انیس ماہر تعلیم تے منجھے ہوئے منتظم ہون دے نال نال ساڈے دوست وی نیں۔ پہلواناں دا شہر گوجرانوالہ آپ دا مرزبوم اے۔آپ معرکہ پاک و ہندو توں اک سال پہلاں ایسے شہر وچ پیدا ہوئے۔ آپ نے 1982 وچ گورنمنٹ تعمیر ہائی سکول توں میٹرک کرن بعد 1984 وچ گورنمنٹ کالج گوجرانوالہ توں ایف۔ ایس۔ سی پری انجینئرنگ تے 1988 وچ ب ایس سی دی ڈگری حاصل کیتی۔ ایس دے بعد آپ ایشیا دی سب توں وڈی یونیورسٹی (پنجاب یونیورسٹی) وچ داخل درس رہے۔ 1988 وچ آپ نے پنجاب یونیورسٹی توں ایم ایس میتھ کرن توں بعد گوجرانوالہ دے ای اک پرائیویٹ سکول (البدر سکول) وچ بطور استاد دے اپنی عملی زندگی دا آغاز کر دتا۔ چار ورہے دی درس و تدریس دے بعد 1993 وچ آپ پنجاب پبلک سروس کمیشن دے ذریعے ایس ایس ٹی سائنس منتخب ہو گئے تے آپ دا پہلا تقرر گورنمنٹ فخر اسلام ہائی سکول وزیرآباد وچ ہویا۔ ٹھیک 8 مہینے بعد قسمت نے اک وار فیر یاوری کیتی تے فیر پبلک سروس کمیشن دے ذریعے سبجیکٹ سپیشلسٹ منتخب ہو کے گورنمنٹ ہائر سیکنڈری سکول ڈومیلی (جہلم) جا بسے۔ آپ نے ایس اُتے اکتفا نہیں کیتا۔ درس و تدریس دے نال نال آپ نے اپنی تعلیم وی جاری رکھی تے ’’ستاروں سے آگے جہاں اور بھی ہیں‘‘ دی تلاش وچ سرگرداں ہو گئے۔ آپ نے 2000ء وچ علامہ اقبال اوپن یونیورسٹی اسلام آباد توں ایم فل میتھ کیتا تے 2005 وچ ایرڈیونیورسٹی موجود ہ پیر مہر علی شاہ یونیورسٹی توں پی ایچ ڈی میتھ دی ڈگری حاصل کیتی۔14 سال بطور سینئر سبجیکٹ دی سروس دے بعد آپ 2007 وچ ڈپٹی ریجنل ڈائریکٹر علامہ اقبال اوپن یونیورسٹی اسلام آباد منتخب ہو گئے۔ شومئی قسمت نال آپ دا پہلا تقرر آپ دے اپنے شہر گوجرانوالہ ای ہو گیا۔ آپ نے اپنی بھرپور کوششاں نال گوجرانوالہ دے ریجنل کیمپس لئی شہری حلقے وچ تھاں خریدی۔ آپ نے کیمپس دے پلان تے نقشہ جات دی تیاری تے دیگر معاملات وچ بھرپور معاونت کیتی۔ کیمپس دی تعمیر توں پہلاں پروانہ آ پہنچیا تے آپ دا تبادلہ اسلام آباد ہیڈ کوارٹر ہو گیا۔ کجھ عرصہ بعد آپ نوں ریجنل ڈائریکٹر میرپور آزاد کشمیر لا دتا گیا۔ کجھ ورھیاں بعد آپ فیر واپس گوجرانوالہ کیمپس آ گئے۔ گوجرانوالہ 9 تحصیلاں اُتے مشتمل ڈویژن اے۔ آپ نے ہر تحصیل نوں ہر لحاظ نال ٹرانسپیرنٹ کیتا تے یونیورسٹی دی انرولمنٹ وچ حیران کن وادھا کیتا۔ ’’اڑنے بھی نہ پائے تھے کہ گرفتار ہم ہوئے ‘‘ تے آپ دا تبادلہ بطور ریجنل ڈائریکٹر شہر مجید امجد ساہیوال ہو گیا۔ ساہیوال آندے ای آپ نے کیمپس لئی دو ایکڑ زمین بعوض 4 کروڑ (معاوضہ ہیڈ آفس نے ادا کیتا) دے لبِ جی ٹی روڈ خریدی جیہڑی طالب علماں دی اپروچ وچ نیں۔ ساہیوال ڈویژن ایس ویلے 7 تحصیلاں اُتے مشتمل اے۔ آپ نے یونیورسٹی دی انرولمنٹ لئی انتھک محنت کیتی۔ آپ نے مین ٹو مین ملاقاتاں کیتیاں تے عوام نوں یونیورسٹی ہذا دی ترجیحات توں آگاہ کیتا۔ آپ نے ڈویژن ہذا دے سارے سکولاں تے کالجاں دا وزٹ کیتا تے غریب بالاں نوں روزگار دے نال نال تعلیم دی اہمیت و افادیت توں وی آگاہ کیتا۔ تے یونیورسٹی ہذا وچ داخلے دی ترغیب دتی جدوں آپ ساہیوال ریجن وچ تشریف لیائے تے ایس ویلے ایس ریجن وچ 28000 طالب علم ایس یونیورسٹی وچ زیر تعلیم سن۔ آپ دی شبانہ روز محنت نال ایس ویلے 42000 طالب علم علامہ اقبال اوپن یونیورسٹی ساہیوال ریجن وچ زیور تعلیم نال آراستہ و پیراستہ ہو رہے نیں۔ آپ نے طالب علماں دی سہولتاں لئی ہر تحصیل وچ ’’سہولت سنٹر‘‘بنا دتے تاکہ طالب علم اپنی اسائنمنٹس ڈائون لوڈ کر سکن۔
آپ نے غریب تے یتیم بالاں دی معاونت لئی سپورٹس فنڈ توں فیس معافی لئی انتظامات کیتے تے بالاں لئی تعلیمی وظائف دا بندوبست کیتا۔ آپ نے امتحانات تے دیگر معاملات نوں شفاف تے ٹرانسپیرنٹ بنان لئی ایماندار تے فرض شناس لوکاں دا انتخاب کیتا تے کرپٹ تے غیر ذمہ دار لوکاں دا قلع قمع کیتا۔ آپ نے آن لائن نظام نوں بہتر بنان تے کمپیوٹر توں غیر مانوس طالب علماں دی مدد دے فری ٹیوٹر مہیا کیتے۔ آپ ایس سلسلے وچ اداریاں دے سربراہان نال ملے تے طالب علماں دی مشکلاں اُتے قابو پان لئی مختلف طریقیاں نوں متعارف کروان اُتے آمادگی دا اظہار کیتا۔ آپ دی ایہناں کوششاں، جدوجہد تے تعلیم نال محبت ایس گل دا عملی ثبوت اے کہ انسان ہمت کرے تے وڈے توں وڈا پہاڑ سر کرنا تے دودھ دی نہر کڈنا ایس لئی کوئی مشکل عمل نہیں۔ اللہ آپ نوں اپنے مقصد نوں عملی جامہ پہنان لئی مزید حوصلہ تے استقامت عطا کرے۔