اللہ نوں کیہ جواب دیو گے؟

حناپرویزبٹ

دو ورھے‘ دس مہینے ضائع ہو گئے‘ مجال اے کوئی دن اجیہا گزریا جدوں وزیراعظم دے کسے بیان پاروں کھچاء پیدا نہ ہویا ہووے ہن موصوف نے اک ای جملے وچ صنف نازک نوں مجرم ٹھہرا دتا‘ پتہ نہیں کہ کہڑا کم عقل سکرپٹ رائٹر اے جو ہر انٹرویو تے خطاب توں پہلاں سوال و جواب دی فہرست مرتب کردا اے‘ جے واقعی کوئی ایس کم تے فائز اے تے اوہنوں ایہ وی پتہ نہیں کہ خطاب تے انٹرویو دے بعد فیڈ بیک کیہ آ سکدا اے؟۔
کہن والے تے ایہہ کہہ رہے نیں کہ ایہ پلانٹڈ انٹرویو سی جہدے وچ جنسی زیادتی بارے مخصوص بیانیہ پھیلا کے کسے وڈے ایجنڈے دی تکمیل کیتی جا رہی اے اوہ وڈا ایجنڈا کیہ اے اہو وی چھیتی ای سامنے آ جاوے گا پر جنسی زیادتی دا جواز سن کے دنیا بھر توں پاکستانی تے غیرملکی عوام‘ میڈیا دا ردعمل بڑا ای شدید ویکھیا جا رہیا اے سوشل میڈیا تے سوالاں دی بھرمار نے مجبور کر دتا کہ ایس موضوع نوں احاطہ تحریر وچ لیاندا جاوے جے واقعی زیادتی دی وجہ عورت دے گھٹ کپڑے نیں تے کے پی سنے دنیا بھر وچ زیادتی دے شکار منڈیاں تے کھسریاں دا کیہ قصور اے؟ ایہناں کیساں وچ نہ تے عورت موجود ہوندی اے تے نہ مختصر کپڑے؟ مناں مٹی تھلے دفن کفناں وچ ملبوس پامال ہون والیاں مردہ بچیاں تے عورتاں دا کیہ قصور اے؟ کیہ واقعی کفن وچ ملبوس اوہناں دے مردہ جسم عریانیت پھیلان دے جرم دا ارتکاب کردے نیں؟ جہنوں جواز بنا کے ہوس زدہ زانی اوہناں دے بے جان جسماں نوں پامال کرن توں گریز نہیں کردے۔ اکثر لواحقین تے اجہے واقعات نوں رپورٹ ای نہیں کردے جہدی وجہ نال ایہ واقعات چھپدے ای نہیں۔
ننھی فاطماواں‘ جنتی زینباں تے بڈھیاں ماواں دے کپڑے مختصر نہیں ہوندے تے فیر کہڑا اجیہا بدترین جذبہ یاں جنون ہوندا اے جو ایہناں درندہ نما انساناں دے جذبات نوں بے قابو کر دیندا اے تے اوہ ظلم دا شکار ہو جاندیاں نیں۔ پنڈاں تے کھیتاں وچ کم کرن والیاں بھیناں‘ دھیاں تے ماواں دے چہرے مطلوب چمک دمک تے جسم خشبوئواں توں محروم ہوندے نیں اوہ کیویں کسے دے جذبات نوں ہوا دے سکدے نیں؟ تے فیر کیہ وجہ اے کہ ایہ جنسی درندے اکلا ویکھ کے بلاتامل اوہناں نوں اپنی ہوس دا نشانہ بنا دیندے نیں؟ سمجھیا جاندا اے کہ شہری زیادہ جنس پرستی دے غلبے تھلے دبے ہوندے نیں جد کہ پنڈاں دے رہن والے شریف شرفے ہوندے نیں فیر پنڈاں وچ جانوراں دی وی عصمت دری کیوں رکن وچ نہیںآ رہی؟۔
برقعے وچ ملبوس عورتاں نوں آسان شکار سمجھ کے معاف نہ کرن والیاں نوں کیویں مرد پکاراں؟ میرا اوہناں اگے سوال اے کیویں دے انسان او کہ تہانوں اپنی بھکھ تے قابو نہیں؟ کیسے نام نہاد طاقتور مرد او کہ معمولی جہی جنبش تے تہاڈے جنسی جذبات ابل پیندے نیں؟ کیوں تسیں جنس دا ناں سن کے ای اپنے ہوش و حواس کھو بیٹھدے او؟ کیسے بہادر او کہ کمزور غریب جسماں نوں پا کے پاگل پن تہاڈے تے سوار ہو جاندا اے؟ کیسے بدقسمت او کہ تہاڈے توں تہاڈیاں اپنیاں دھیاں تے بھیناں وی محفوظ نہیں؟ ایہ پکار اے اک دھی دی‘ اک بھین دی تے اک ماں دی کہ کدوں تک ساڈے معاشرے وچ گندگی دا ایہ گھنائونا کھیڈ جاری رکھیا جاوے گا؟ کدوں تک نام نہاد مسلط ارباب بست و کشاد متاثرین نوں گنہگار قرار دے کے مجرماں نوں تحفظ دیندے رہن گے؟ یاد رکھو تسیں وی سارے قوم لوط وانگوں اللہ ول ضرور لٹائے جائو گے تے اوس ویلے کیہ جواب دیو گے؟۔٭٭