چور دا پُتر !

لکھت:ابرار ندیم

جتھوں تک مینوں چیتے پیندا اے پچھلے اِک ورھے تُوں جدوں دا میں کالم لکھنا شروع کیتا اے۔میں ڈھکے چھپے یا کھلے ڈُھلے لفظاں چے حکومت،اپوزیشن،چوراں،ڈاکوئواں،لٹیریاں تے اپنے مخالفاں سنے کدی کسے دے خلاف کجھ نہیں لکھیا۔حالاں جے ایس عرصے چے مینوں انج دے ڈھیراںموقعے لبھے جنھاں پاروں بڑیاں بڑیاں دی بڑی تگڑی’’لتریشن‘‘ کیتی جاسکدی سی پر اپنی راجپوتانہ وضع داری تے مروت پاروں میں ہمیشہ ایہناں موقعیاں نوںنظر انداز کردا رہیا۔ہُن اینی شرافت تے رواداری وکھان دے مگروں وی جے کوئی ناہنجار چور دا پُتردن دیہاڑے میرے ورگے بے ضرر بندے دی کار دا ایک سائیڈ مرمر لے اُڈے تے ایہہ سوچ کے بئی’’میں کسے دا کیہ وَگاڑیا سی‘‘اپنے بے تکے ہون والے نقصان تے حیرت تے افسوس نال نویں پاکستان چے لوکاں دے جان تے مال دی حفاظت دے حوالے نال حکومتی کارکردگی تے نیت تے اِک سوال تے ضرور اُٹھدا اے۔بڑاچر پہلاں میں کسے سیانے کولوں ایہہ گل سُنی سی کہ’’جدوں کسے دی چوری ہُندی اے تے مال دے نال نال اوہدا ایمان وی جاندا اے‘‘ اوس ویلے تے ایہہ گل میرے پلے نہیں سی پئی پر سیانے دی گل تے آملے دے اچار وانگوں اپنے نال ہون والی واردات مگروں ہُن ایہدا سواد انج آیا اے بئی سجن دشمن دی تفریق توں وکھ مینوں ہر کسے تے چور ہون دا بھلیکھا پین لگ پیااے۔ ایدھر اودھر دی کوئی گل کیتے بغیر دساں تے میرا سب توں پہلاں شک حکومت ول جاندا اے کہ خورے مینوں سبق سکھان لئی ایس واردات پِچھے حکومت دا خفیہ ہَتھ ہووے کیوں جے ساڈے ایتھے اکثر حکومتاں اپنے مخالف وڈے وڈے کالم نگاراں نوں سبق سکھان لئی ایسے قسم دے فسطائی حربے ورتدیاں نِیں۔پر فیر ایہہ سوچ آندی اے بئی حکومت مینوں انج دا سبق کیوں سکھانا چاہوے گی جدوں کہ میں تے اپنے کالماں وچ اَج تک سوائے حکومت دیاں جھوٹھیاں تعریفاں دے پل بنھن دے کدی حکومت دے خلاف کوئی گل لکھی ای نہیں۔ایس توں بعد ڈردے ڈردے ای سہی نامعلوم افراد ول وی میرا دھیان جاندا اے کہ خورے کدی بے دھیانی چے لکھی میری کوئی گل اوہناں نوں مندی لگی ہووے جس پاروں اوہناں مینوں یرکان لئی میری کار داا سائیڈ مر مر چوری کرکے شرارتاََ یا اشارتاََ مینوں اِک کن تُوں ہمیش لئی محروم کر کے’’بُچہ‘‘ کرن دی دھمکی دتی ہووے۔پر ایس موقعے تے مینوں اپنے کالماں راہیں نامعلوم افراد دے حضور نوکری لئی لکھیاں میریاں درخواستاں چیتے آکے میرے ایس وہم نوں جھٹلا دیندیاں نِیں۔البتہ اپوزیشن دے حوالے نال مینوں تگڑا یقین اے کہ حکومت دے خلاف اوہدے بیانیے دے حق چے کھل کھلا کے نہ لکھن پاروں اپوزیشن نوںمیرے نال ضرور گلہ ہووے گا پر فیر مینوں ایہہ خیال آندا اے کہ وَن سونیاںپسوڑیاں چے پھسی وچاری ااپوزیشن نوں تے اپنا سبق بُھلیا ہویا اے اوہ مینوں کیہ سبق سکھاوے گی۔باقی رہے میرے ذاتی مخالف تے اوہناں بارے مینوں تے اپنے بارے خود اوہناں وی بڑی چنگی طراں اندازہ اے کہ میرے لئی اپنے دل وچ بے پناہ کرودھ تے حسد رکھن دے باوجود اوہناں چے ایناں دم خم نہیں کہ’’رانے‘‘ دی کار ول اکھ پُٹ کے وی ایہنوں بھیڑی نظر نال ویکھ سکن۔جتھوں تک سجناں بیلیاں دی گل اے تے سارے شک شُبیاں دے باوجود میں کہواں گا کہ گھٹو گھٹ ایس معاملے وچ شاطر سنے میرے سارے بیلی بری الذمہ نِیں ایس لئی کہ جے اوہناں وچوں کوئی ایس بھیڑی حرکت چے شامل ہندا تے اوہنے میری کار دا اِک نہیں دونویں سائیڈ مر مر لے جانے سن۔ گل بات دے ایس پریشان کن مُڈھ توں بعد یقینا تُسی چاہو گے بئی تہانوں ایس واردات دی تفصیل وی دسی جاوے۔ایس حوالے نال عرض اے کہ وڈی عید تُوں اِک دن پہلے میں اپنے محترم استاد عطاء الحق قاسمی صاحب ہوراں نوں ملن وارث روڈ تے واقع اوہناں دے دفتر’’معاصر انٹرنیشنل‘‘ گیا جتھے کجھ چر اوہناں نال بہن مگروں اوہ تے میں اکٹھے اوہناں دے دفتروں نکلے۔اوہدے بعداوہناں نوں رخصت کرکے جدوں میں اپنی کار ول ودھیا تے کوئی چور دا پُتر اوس ویلے تک میری گڈی دا اِک سائیڈ مرمر لاہ کے لے جا چکیا سی تے میری ’’کن ٹُٹی‘‘ کار اوتھے کھلوتی ملکہ ترم نورجہاں دے گانے’’اے سہیلی تیرا بانکپن لُٹ گیا‘‘ دی جیوندی جاگدی مورت بنی مینوں چینگے لاہ رئی سی۔جیہدے بعد میرے مونہہ چوں چور لئی نہ دَسن والی قسم دے جو جو’’تبرلے‘‘ نکل سکدے سن میں بے اختیار بغیر کسے بریک تُوں اوہنوں اوس ویلے تک کڈھدا رہیا جد تک میرے کولوں’’صرف بالغاں لئی‘‘ ورگی قسم دے لفظاں دا ذخیرہ مُک نہیں گیا۔ ہر اوہ بندہ جنھوں اپنی گڈی نال میرے وانگ حدوں ودھ پیار ہووے اوہ سمجھ سکدا اے بئی دکھ تے نقصان دی ایہو جیہی گھڑی چے انج دے’’حیلیاں‘‘ نال بھلا تڑفدے ہوئے دل نوں کدوںقرار لبھدا اے۔پہلی نظر چے اِک کن توں بغیر اپنی گڈی وَل ویکھ کے میرے دل تے خورے’’کاش‘‘ دیاں کنیاں چُھریاں چل گئیاں جنھاںنوں دَسن لگاں تے خورے’’کاش‘‘ دی اِک پوری کتاب بن جائے۔’’کاش میں اپنی گڈی نوں بھیڑی نظر توں بچان لئی ایہدے بونٹ دے ساہمنے پرانی جُتی لمکائی ہُندی،کاش چور دی نظر میری کار دی تھاں کسے ہور دی گڈی تے پئی ہُندی،کاش پارک کرن توں پہلے میں اپنی کار دے دونویں سائیڈ مرمر لاہ کے اوہناں نوں ٹریکٹر ٹرالی ورگے کسے انج دے ٹول بکس چے بند کرکے باہر اِک تگڑا جیہا جندرا لاہ دیندا جیہدے اُتے چور نوں دھوکھا دین لئی موٹے موٹے لفظاں چے لکھیا ہُندا ئے’’چور دے پُتر ٹول بکس خالی اے‘‘۔پر ہُون پچھتاون دا کیہ فیدا،میری کوتاہی پاروں میرا جیہڑا نقصان ہونا سی اوہ تے ہوگیا۔چور جاندے جاندے میرا قیمتی اثاثہ لے گیا پر مینوں اِک سبق ضرور دے گیا بئی اثاثے بھاویں ذاتی ہون یا قومی جدوں تک اوہناں دی حفاظت لئی کوئی معقول تے ڈھنگ دا بندوبست نہ کیتا جائوے چور،ڈاکو تے لٹیرے ایہناں نوں دن دیہاڑے لُٹدے رہن گے تے اسی اپنے نقصان تے انج ای بے وساں وانگوں ہتھ ملدے رہواں گے۔٭٭