“بحیثیت قوم ساڈے سماجی رویاں وچ بہتری کیویں ممکن اے؟‘‘ دے سر ناویں ہیٹھ بیٹھک

پروگرام دا پربندھ سائبان ویلفیئر سوسائٹی تے روزوار بھُلیکھا دی سانجھ نال کیتا گیا

رپورٹ: آفاق بٹ

گوجرانوالہ سائبان ویلفیئر سوسائٹی تے بھلیکھا دے زیر اہتمام چائے بیٹھک پیپلز کالونی وچ اک بیٹھک ’’بحثیت قوم ہمارے سماجی رویوں میں کیسے بہتری ممکن ہوسکتی ہے؟‘‘دا اہتمام کیتا گیا۔ ایس بیٹھک وچ موضوع گفتگو سی کہ لہور وچ ہون والے حالیہ واقعات دے بعد قوم دے مستقبل یعنی نوجواناں دے رویاں وچ بہتری کنج لیائی جا سکدی اے۔ میزبان بیٹھک عتیق انور راجہ دا کہنا سی کہ جدوں تیکر اسیں اپنے کھیڈاں دے میدان آباد کرنے ہون گے۔ آرٹ اکیڈمیاں آباد کرنیاں ہون گیاں، نوجواناں لئی مصوری، موسیقی تے ادبی تقریبات نوں عام کرنا ہوئے گا۔ تفریح دے سستے پر معیاری ذرائع متعارف کروانے ہون گے۔

صدر بیٹھک سعید احمد تاج نے کہیا کہ بدقسمتی اے کہ جنہاں استاداں نے طالب علماں دی تربیت کرنی اے ایہناں نوں آپ تربیت دی لوڑ اے۔ جے قوم واقعی اک فلاحی معاشرہ چاہندی اے تے پرائمری توں بالاں لئی اخلاقی اسباق ترتیب دینا ہون گے۔ تعلیم و تربیت دی اہمیت نوں سمجھدے ہوئے پرائمری استاداں دی تربیت اُتے خاص دھیان دینا ہوئے گا۔ چوہدری شاہد چیئر مین پرائیویٹ سکول ایسوسی ایشن دا کہنا سی کہ نوجواناں نوں جذبات دے اظہار دے اظہار دے برابر موقعے دینے ہون گے۔ سید عمران حیدر نے کہیا کہ بالاں نوں دوران تعلیم معاشرے توں ہم آہنگ کرن دیاں کوششاں کرنیاں ہون گیاں۔ سینئر نائب صدر سائبان یعقوب انجم مغل نے کہیا کہ بالاں نوں قانون دا احترام سکھان لئی والدین نوں آپ چنگی مثال قائم پیش کرنی ہوئے گی۔ وقاص منیر مغل نے کہیا کہ نوجواناں لئی تقریری مقابلیاں تے روایتی کھیڈاں دا اہتمام کر کے معاشرے وچ سدھار لیایا جا سکدا اے۔ بیٹھک وچ شریک ہون والیاں وچ راجہ حبیب الرحمن آج ٹی وی ،خواجہ امجد،راجہ مشتاق،راجہ افضال عزیز،عاطف ربانی،یسین گجر،ملک عقیل اعوان،کالمنگار(مہر ساجد شاد،عمر اشرف ،بلال باٹھ،مہر امین،شیخ زبیر)،عثمان اشرف،محمد عباس،افتخار شاہدو دیگر شامل سن۔چف آرگنائزر سائبان خرم شہزاد بھٹہ تے یاسر مشتاق مغل معزز مہماناں دی راہ وچ پھُل لئے کھڑے رہے۔