کینیڈا وسدی ہرکیرت کور چاہل ہوراں دا سفر نامہ ’’لٹھے لوک لہور دے‘‘

ہرکیرت کور چاہل دا ناول’’ تیجی مخلوق‘‘ گر مکھی توں شاہ مکھی وچ اُلتھا کر کے بابا فرید بک فاؤنڈیشن لہور نے 2019 چہ چھاپیا

ندیم افضل ندیم

اپنیاں کجھ سطراں
نہیں ریساں شہر لاہور دیاں اے جانے کل جہان
ایتھے وچ اکھاڑیاں گھلدے پئے اج وی نے پہلوان
ایتھے بہت مزار تے مسجداں لاہور دی جو نے شان
ایتھے افضل تھاں تھاَں وکدے پئے مَن بھانے پکوان
ایتھے راتاں جگمگ کردیاں پئے چلدے کاروبار
اے شہر ہے پورے جگ تے اک مَن کِچھواں شہکار
سب توں پہلے تے ڈھیر مبارکاں ہرکیرت کور چاہل ہوراں نوں جو اونہاں دا سفر نامہ ’’لٹھے لوک لہور دے‘‘ چھپیا اے
ہرکیرت کور چاہل دا ناول’’ تیجی مخلوق‘‘ گر مکھی توں شاہ مکھی وچ اُلتھا کر کے بابا فرید بک فاؤنڈیشن لہور نے 2019 چہ چھاپیاتے اوس ناول دے مکھ وکھالی اکٹھ چہ رلت کرن واسطے ہرکیرت جی کنیڈا توں پاکستان آئے اس سفر وچ اونہاں دے بہتے دن لہور گزرے۔ مکھ وکھالی اکٹھ توں اگلے دن میری اونہاں دی ملاقات لہور پریس کلب چہ ہوئی اس ملاقات وچ میں اونہاں دا پنجابی زبان تے لہور آؤن بارے انٹرویو کیتا اونہاں دے وچار بہت ودھیا لگے تے فیر اونہاں نال رابطے دا سلسلہ وچ وچالے چلدا رئیا۔
مینوں اونہاں لہور توں جاندیاں ہی دس دتا کہ میں لہور دی یاترا تے اک سفر نامہ لکھوں گی کیوں جے مینوں لہور تے لہور چہ وسن والے پنجابیاں بہت متاثر کیتا اے۔اونہاں دا لکھیا ناول تیجی مخلوق میں پڑھیا تے اونہاں دی قلم چہ مینوں بہت طاقت نظر آئی اوہناں دی سوچ چہ بہت گہرائی دسی ہرکیرت کور چاہل جی زمانے تے گہری نظر رکھدیاں نے معاشرے چہ وسن والے لوکاں دے دکھ درد وی اپنے دکھ سمجھ کے الیکدیاں نے اونہاں دے ناول نوں بہت سارے مان سمان پتر تے ایوارڈ ملے پاکستان دی پنجابی ادبی تنظیم دل دریا پاکستان ولوں وی،تیجی مخلوق، نوں ایوارڈ نال نوازیا گیا۔
’’ لٹھے لوک لہور دے‘‘ ایس سفر نامے وچ اونہاں نوں جو محبت لہور چوں ملی اوس نوں بیان کیتا اے۔میں آس کردا ہاں کہ اے ناول تہانوں پڑھ کے بہت انند آوے گا تے دوجی گل پورے یقین نال کردا ہاں کہ کہ پاکستان توں باہر وسدے پنجابیاں نوں ایہ سفر نامہ پڑھ کے لہور آؤن دی ہور کھچ ودے گی۔ کیوں جو ہرکیرت کور چاہل ہوراں نوں مل کے سانوں وی بہت خوشی ہوئی سی تے اوس خوشی نوں اسی اجے تیک محسوس کردے ہاں تے اوسے طراں اونہاں وی پاکستان دے پنجابیاں نوں مل کیاونہی خوشی محسوس کیتی۔ رب کرے ایہ اسی سدا اک دوجے نوں مل کے خوش ہندے رئیے۔
اخیر تے میں ہرکیرت کور چاہل جی مبارکاں دے نال نال شکر گزاری وی کردا ہاں کہ اونہاں اپنی اک تخلیق دا نام پنجابیاں دی محبت دے ناں کیتا اے
رب سدا ساڈی ماں بولی پنجابی تے مان کرن والیاں تے مہر رکھے آمین
اپنیاں کجھ ہور سطراں لہور دی محبت چہ
باراں دروازے لہور دے ہِن لوک شہزادے لہور دے
ہر دن دیہار مناوندے ایہ زندہ دل سداوندے
ایتھے علم دے دیوے جگدے ایتھے میلے واواہ لگدے
ایتھے ودھ توں ودھ فنکار جی ایہ شہر وی اک شہکار جی
ایہ مالک سوہنی شان دا ایہ دل ہے پاکستان دا
کیہ دساں انگ لہور دے سب سوہنے رنگ لہور دے