خودنوشت

لکھت:تنویر ظہور

پچھلے دیہاڑے 19 اگست نوں میری 75ویں سالگرہ سیۃ پون صدی گزارن دے بعد ایہ سوچ ضرور آئوندی اے کہ چنگی حیاتی گزارن دی خواہش دے باوجود گل اوتھے دی اوتھے ای اے۔ ذہن تے ایہدا کڑوا جیہا اثر تے ہے پتہ نہیں کہ باقی حیاتی وچ ایس کڑواہٹ وچ وادھا ہونا اے یاں کمی؟ والد محترم ظہورالدین بھٹی ن ے اپنی ڈائری وچ میری تریخ پیدائش ایہ لکھی اے۔ 19 اگست 1946 مطابق 11رمضان المبارک بروز جمعہ پر سکول وچ داخلے ویلے 26فروری 1947ء لکھائی گئی تے ایہو تریخ پیدائش میٹرک دے سرٹیفکیٹ تے شناختی کارڈ تے لکھی گئی۔ وکھووکھ تاریخ پیدائش لکھان دی وجہ میں والد صاحب توں پچھ نہ سکیا۔ اوہ جلالی طبیعت دے مالک سن۔ میرے والد دا ویاہ یکم جولائی 1945ء وچ ہویا تے وفات 11دسمبر 1974ء وچ یعنی میرے ویاہ دے دس مہینے بعد۔ میرا ویاہ 22فروری 1974ء نوں جمعہ دیہاڑے ہویا۔ جس دن لہور وچ اسلامی کانفرنس سی۔ ایہ ذوالفقارعلی بھٹو دا دور حکومت سی۔ میری والدہ زہرہ بیگم دا ویہہ ورھے دی عمر وچ ویاہ ہویا۔ ویاہ دے 14 ورھے بعد 34 ورھے دی عمر وچ 13جنوری 1959ء نوں وفات پا گئیاں۔ بھین بھراواں وچ سب توں وڈا آں۔ اوس ویلے میں چھیویں جماعت دا طالب علم سی والد صاحب اوس ویلے 34 ورھے دے سن۔ اوہناں دا راشن دا ڈپو سی۔ اوہناں نے دوجا ویاہ نہیں کیتا۔
حضرت اویس قرنیؓ توں کسے نے پچھیا۔ تہانوں اللہ تعالیٰ نے اچے مرتبے نال نوازیا اے۔ تسیں کہڑے وظیفے کیتے نیں‘ سانوںوی دسو۔ آپ نے فرمایا کہ میں کوئی وظیفے نہیں کیتے میں ساری حیاتی صرف ماں دی خدمت کیتی اے۔
ماں لئی میری نظم اے:
توں سیں ساڈے سراں تے چھاں
پر تیرے مر جان دے مگروں
کوئی نہیں، ایس جگ دے اتے
جیہڑا دیوے چھاں
دھپاں دے وچ پیر نیںسڑدے
کتھوں لیاواں ہن اوہ جنت
دل دی ٹھنڈک
میں تے تیرے کچھڑے پلیا
ول بولن دا سکھیا
نالے سدھے رستے اتے ٹرنا سکھیا
توں سیں میری ماتا
موت کدے وی توڑ نہیں سکدی
تیرا میرا ناتا
ماں دی وفات ویلے میں مسلم ماڈل ہائی سکول اردوبازار دا طالب علم سی۔ ساڈی رہائش ہجویری محلہ عقب داتا گنج بخش وچ سی۔ داتا گنج بخش دے مزار دے ساہمنیوں لنگھ کے کربلا گامے شاہ دے راہیں باہر نکلدا تے نال ای سنٹرل ماڈل سکول اے۔ سڑک پار کرکے مسلم ماڈل ہائی سکول اپڑ جاندا۔ ہن کربلا گامے شاہ دے اندروں گزرنا تے دور دی گل داتا گنج بخش دے مزار تک اپڑن لئی چیکنگ دے کئی مرحلیاں چوں گزرنا پیندا اے۔ ایم اے عزیز مسلم ماڈل ہائی سکول دے ہیڈماسٹر سن۔ سابق وزیر خزانہ ڈاکٹر محبوب الحق‘ ایم اے عزیز دے صاحبزادے سن۔ ایم اے عزیز دی رہائش گاہ قلعہ لچھمن سنگھ وچ سی۔ ریٹائرمنٹ دے بعد ایہ اپنے بیٹے ڈاکٹر محبوب الحق دے کول اسلام آباد ٹر گئے۔ 1993ء وچ اوتھے انتقال کر گئے۔ پر اوہناں دی تدفین لہور وچ ہوئی۔ مسلم ماڈل ہائی سکول وچ محمد اسحاق میرا کلاس فیلو سی جو بعد وچ محمد اسحاق ڈار دے ناں توں معروف ہوئے تے وزیرخزانہ دے عہدے تک اپڑے۔ محمد اسحاق ڈار دی آبائی رہائش چونامنڈی وچ سی۔ سکول دے زمانے وچ اوہ ساڈے آبائی گھر تے میں اوہدے گھر اکثر جایا کردا۔ طارق فاروق وی میرا تے اسحاق ڈار دا کلاس فیلو سی۔ بی اے دے بعد ایہ صحافت نال وابستہ ہو گیا روزنامہ جہاں نما دے ناں توں اخبار چھاپدا رہیا۔ ایس اخبار دے بانی اوہدے والد شریف فاروق سن جو پشاور وچ شفٹ ہو گئے تے اوتھوں روزنامہ ’’جہاد‘‘ دا اجرا کیتا۔ طارق فاروق نوائے وقت وچ کالم وی لکھدے رہے۔ طارق فاروق دی رہائش تے اخبار دا دفتر بیڈن روڈ تے سی۔ اوتھے اوہدی وفات ہوئی۔ جناب مجیدنظامی نے طارق فاروق دی نماز جنازہ وچ شرکت کیتی۔ اوہناں دیہاڑیاں طارق فاروق دے والد شریف فاروق حیات سن۔ سعیداحمد وی ساڈا کلاس فیلو رہیا جو میاں نوازشریف دے دور حکومت وچ ڈپٹی گورنر سٹیٹ بینک تے بعد وچ نیشنل بینک دا صدر رہیا۔ ایہ عہدے اوہنوں محمد اسحاق ڈار نال یاری پاروں ملے۔ ہن اوہ اپنے دوست دی منی لانڈرنگ دے سلسلے وچ کیس بھگت رہیا اے۔
سب ٹھاٹھ پڑا رہ جائے گا
جب لاد چلے گا بنجارا