پاکستان عالمی سازشاں دے جال وچ؟

مطلوب ورائچ

حضرت امام علی علیہ السلام دا فرمان اے جہدے تے احسان کرو اوہے شر توں بچو۔ پاکستان نے ہر مشکل وقت وچ اپنے افغان بھراواں دی ہمیشہ مدد کیتی اے تے سچ پچھو تے افغان ہن ساڈے لئی سر پیڑ بن چکے نیں۔ وطن عزیز وچ 30 لکھ افغان مہاجر 1979ء وچ آئے سن جہناں دی غیر رجسٹرڈ گنتی ودھ کے اک کروڑ ہو چکی اے۔ ساڈی ملکی ترقی دی کوئی سمجھ نہیں آندی کہ اسیں کنک‘ کپاہ تے چاول کناں پیدا کرنا اے کیوں جے چار کروڑ افغاناں نوں وی سمگل ہو کے ساڈا اجناس افغانستان اپڑ جاندا اے۔ افغان اوہ واحد قوم اے جنہے مملکت پاکستان نوں سب توںآخر وچ منیا تے افغانسستان نے اج تک بین الاقوامی سرحد نوں نہیں منیا۔ اوہ ایہنوں ڈیورنڈ لائن ای کہندے نیں۔ افغانستان دے نال پاکستان دی 35 سو کلو میٹر توں وی لمی سرحد ارباں روپیے دی واڑ لان دے باوجود غیرمحفوظ اے۔ آئے دن افغانستان توں دخل اندازی تے حملے معمول بن چکے نیں۔ افغانستان وچ نیٹو فوجاں تے اتحادی امریکی ٹروپس دی اخلاقی مدد کر کے پاکستان نے اپنے اک لکھ توں وی ودھ شہری شہید کروا لئے جد کہ دس ہزار توں ودھ عسکری افسر تے جواناں نے جام شہادت نوش کیتا تے اک محتاط اندازے موجب اک سو پنجاہ ارب ڈالر دا ملکی انفراسٹرکچر تباہ کروا لیا۔
اج وی پوری دنیا نے اجے افغان طالبان دی ایس حکومت نوں نہیں منیا پر ساڈے ہردلعزیز وزیراعظم صاحب غیرملکی سفیراں تے دوست سربراہ مملکتاں توں افغان حکومت نوں منوان لئی ہلکان ہوندے جا رہے نیں۔ توقع سی کہ افغانستان توں نیٹو تے امریکی انخلاء دے بعد بھارت دے افغانستان وچ ویہہ دے نیڑے قونصل خانے تے دہشت گرداں نوں تربیت دین والے ٹریننگ کیمپس بند ہو جان گے جہدے نال پاکستان دی معیشت تے امن و امان نوں استحکام آئے گا پر پچھلے اک مہینے دی سرحد پار مداخلت توں ہن تک درجناں وطن دے رکھوالے جام شہادت نوش کر چکے نیں۔ پاک فوجاں دے بہادر ونڈر سپہ سالار تے حکمراناں نوں ہن چپ دا روزہ توڑنا پوے گا تے ملکی جذبات دی عکاسی کردے ہوئے شرارتی گوانڈھی ملکاں دے خلاف ایکشن لینا ہووے گا یاں فیر کیہ واقعی اسیں گھاہ کے جو نیوکلیئر حاصل کیتا اے اوہ صرف پھل جھڑیاں چلان لئی اے۔ افغانستان ولوں پاکستان دا دوستی ہتھ ہمیشہ جھٹکا جاندا رہیا اے۔ طالبان دی حکومت دے خاتمے مگروں امریکہ نے پہلے حامدکرزئی تے فیر اشرف غنی نوں تخت پردوش کر دتا تے ایہناں دوہاں دی پاکستان نال نمک حرامی واضح ہون لگی۔ افغانستان دے اندر طالبان تے بعد وچ داعش وی سرگرم ہوئی۔ القاعدہ وی موجود سی۔ اوہناں دی دہشت گردی نے امریکہ تے افغان حکمراناں دی نک وچ دم کر دتا۔ ایہدا الزام بھارت دی مرضی تے حامدکرزئی تے اشرف غنی پاکستان تے لاندے سن بعد وچ امریکہ نے وی اپنا کن ہتھ لا کے ویکھن دی تھاں نسنا شروع کر دتا۔ ایہناں ساریاں نوں پاکستان توں دہشت گرد افغانستان وچ وڑدے نظر آن لگ پئے۔ ڈھیٹ پنے دی انتہا کہ پاکستان نوں مطلوب فضل اللہ ورگے دہشت گرداں نوں اوتھے پناہ دتی گئی۔ پاکستان تے دہشت گرداں دی حمایت تے اوہناں نوں افغانستان وچ داخل کرن دے الزامات وچ شدت آئی تے لائی لگ امریکہ نے پاکستان نوں دھمکیاں دا سلسلہ شروع کیتا تے پاکستان نے افغان سرحد تے واڑ لان دا سلسلہ شروع کر دتا۔ ایہدے تے وی افغان حکمران آپے توں باہر ہو گئے۔ ایس واڑ توں اصل وچ افغانستان دی سرزمین توں بھارت لئی پاکستان وچ دہشت گردی دے راہ بند ہو جانے سن۔ بھارت دی مرضی تے افغانستان نے واڑ دی تنصیب دے خلاف رولا پانا شروع کر دتا تے ایسے رولے رپے وچ افغانستان تے طالبان دا اقتدار بحال ہویا تے امریکہ نے اوہناں دے اکائونٹ منجمد کر کے نویں حکومت دی آکسیجن بند کر دتی۔ افغانستان وچ فاقیاں دی نوبت آئی تے پاکستان مدد کرن والیاں وچ آپ سرفہرست تے دنیا نوں وی ایہدے تے تیار کر رہیا سی۔
دوستو! پچھلے دیہاڑے اک امریکی عدالت نے ایہ فیصلہ دتا اے کہ افغانستان دے منجمد اثاثے جہناں دی مالیت دس ارب ڈالر توں وی ودھ اے۔ ورلڈ ٹریڈ سنٹر نائن الیون دے متاثرین تے لواحقین وچ تقسیم کر دتے جان۔ یعنی بھکھ‘ افلاس تے غربت وچ مبتلا چار کروڑ افغانیاں نوں بھکھا رکھیا جاوے تے ایہ بھکھے تے نہتے جنگجو جہناں دے کول اپنے تے ہے ای ہن اوہ امریکہ دے چھڈے ہوئے اسلحہ نال وی لیس نیں۔ ایہ سارے عوام پاکستان تے چڑھ دوڑن تے جدوں اسیں اوہناں نوں بارڈر تے روکاں گے تے اک خوفناک قتل عام ہووے گا جہدا سارا قصور پاکستان تے پا کے پاکستان خلاف معاشی پابندیاں لان دا کارن پیدا کیتا جاوے گا۔ طالبان دور وچ وی سرحد پار توں پاک فوج دیاں چوکیاں تے حملے ہو رہے نیں جو پاکستان نوں بہت کجھ سوچن تے مجبور کر رہے نیں۔
دوستو! ایس ساری گھمبیرتا وچ جد کہ ساڈے چارے پاسے سرحداں تے سرحداں دے اندر شورش برپا کیتی جا چکی اے۔ پنجگور‘ کرک تے چمن دیاں سرحداں تے دہشت گرداں دی دخل اندازی تے درجناں پاکستانی عسکری جواناں دی شہادت ایس گل دی غماز اے کہ بھارت تے امریکہ سی پیک دی مخالفت وچ پاگل ہو چکے نیں جد کہ ساڈی اپوزیشن ایہناں حالات وچ وی اقتدار نوں نوچن وچ مصروف اے۔ حب الوطنی دا تقاضا ایہہ وے کہ جدوں حکومت حالت جنگ وچ ہووے تے سارے لوکاں نوں اوہدے موڈھے نال موڈھا جوڑ کے کھلونا ہووے گا۔ ٭٭