نعمتاں دے قدران تے ترجمان بنو

طلعت عباس خان

بابا کرمو اج بڑے خوشگوار موڈ وچ سی وجہ پچھی تے مسکرا کے جواب دتا عقل نہیں تے موجاں ای موجاں۔ پچھیا ایہ روشنی تہانوں کتھوں ملی؟ کہیا اپنے آل دوالے دی کھٹارہ ماڈل دیاں گڈیاں توں بابا کرمو نے پچھیا کیہ توں چنگیزخان دے پوترے ہلاکو خان نوں جاننا ایں؟ کہیا نہیں بابا جی میں تے صرف اپنے حاکم نوں جاننا واں فیر بابا کرمو نے ہلاکو خان دے بارے دسیا کہ اوہنے بغداد تے قبضہ کیتا سی۔ جتھے لکھاں انساناں دا قتل تے لٹ مار دا بازار گرم کیتا۔ ایہ ساری قیامت صغریٰ بغداد وچ ٹُٹی سی۔ اوہنے اعلان کیتا سی کہ میں بغداد دے کسے وڈے عالم دین نوں ملنا چاہنا واں اوہنوں ملن لئی کوئی عالم دین تیار نہیں سی۔ آخر اک نوجوان ملن تے راضی ہویا اوہدی اجے داڑھی نہیں سی آئی۔ ایہ معلم سی‘ اوہنے اک اونٹ‘ اک بکرا تے اک مرغا نال لیا تے ہلاکو نوں ملن اپڑ گیا۔ اوہنوں ویکھ کے کہیا کیہ بغداد والیاں دے کول تیرے سوا ہور کوئی نہیں سی۔ کہیا جناب جے کسے وڈے نوں ملنا چاہندے او تے باہر اک اونٹ کھڑا اے جے کسے داڑھی والے نوں ملنا چاہندے او تے باہر داڑھی والا بکرا اے جے آواز بلند والے نال ملنا چاہندے او تے باہر اک مرغا وی اے۔ ہلاکو خان زیرک سی اوہ سمجھ گیا کہ ایہ کوئی عام بندہ میرے سامنے نہیں۔ ہلاکو نے نوجوان توں پچھیا ٹھیک ایہ دس کہ میرے ایتھے آن دی وجہ کیہ بنی؟ نوجوان نے اوہنوں بڑا گہرا جواب دتا۔ کیہا ساڈے اعمال تے ساڈے گناہ تہانوں ایتھے لیائے نیں اسیں نعمتاں دی قدر نہیں سی کیتی۔ ساڈے دلاں وچ مال دو دولت رچ بس چکی سی۔ ایس لئی اللہ نے تینوں گھلیا۔ ہلاکو خان نے پچھیا‘ دس ہن مینوں ایتھوں کون کڈھ سکدا اے؟ کہیا جدوں اسیں نعمتاں دی قدر جان لواں گے اوس ذات دا فیر توں شکر ادا کرن لگ پئے آپس دے اختلافات ختم کر لواں گے تے ایہدے بعد فیر تسیں ایتھے بالکل نہیں رہ سکو گے۔
بابا کرمو نے کہیا ہن وی جہڑے جہڑے ملکاں دے حکمران ظالم نیں لوکاں تے مہنگائی دے بمب برسا رہے نیں۔ عدالتی فیصلیاں دی پروا نہیں کردے۔ کرپشن تے ملاوٹ دا بازار گرم رکھے ہوئے نیں تے سمجھ جائو کہ قدرت نے اوتھے حکمران ہلاکو خان ورگے گھل دیندا اے۔ بابا کرمو نے کہیا عمران خان کرکٹ دی فتوحات کردے ہوئے ورلڈکپ جتیا سی فیر اوہناں نوں کوئی سیاست وچ لے آیا۔ آئین دے آرٹیکل 62 دا انٹرپرٹ کردے ہوئے شریف نامی حکمران تے ایہ ثابت کر دتا کہ ایہ بندہ ناں دا شریف اے پر ایماندار نہیں۔ آرٹیکل تے ایہ پورا نہیں اتردے ایس لئی اجہے بندیاں نوں زندگی بھر لئی حکمران بنن توں روک دتا جاندا اے جد کہ ایہ حکمران تن واری وزیراعظم رہیا۔ ملک وچ سڑکاں دا جال وچھایا‘ ملک نوں ایٹمی قوت بخشی جنہوں لاء سیکرٹری بنایا تے فیر اوہنوں جج بنایا فیر اوسے جج دے حکم نال اوہنوں ہمیشہ ہمیشہ لئی حکمران بنن توں روک دین دا فیصلہ سنیا گیا۔ اپوزیشن دے بقول ایہ الیکشن نہیں سلیکشن نال آئے پر سچ تے ایہہ وے ایتھے سلیکشن توں ای حکمران آندے جاندے رہے نیں۔ جدوں تک انج ہوندا رہوے گا اسیں اپنے فیصلے آپ نہیں کر سکاں گے۔
آئی ایم ایف اک ادارہ اے جہدے قرض دین نال ساڈا نظام زندگی چلدا اے۔ ہن تے انڈین نیشنل آئی ایم ایف دے زیرسایہ کم کرن والی گیتا گوپی ناتھ نے پاکستان دے اقتصادی معاملیاں دی نگرانی تے فائز ہو چکیاں نیں۔ بابا کرمو نے کہیا آئی ایم ایف دی پہلی ڈپٹی ڈائریکٹر نوں گورنر سٹیٹ بینک براہ راست اوہنوں رپورٹ کرے گا جے ایہ سلیکشن نال نہ آئے ہوندے تے اج ایہ بل پاس کران دی تھاں آپ ای ایس بل نوں ٹیبل نہ کردے۔ مہنگائی بمب گران دے طریقہ کار اوہ دسدے نیں پر بمب گراندے ایہ آپ نیں۔ آئی ایم ایف توں نجات مشکل ای نہیں ناممکن وی اے۔ بابا کرمو نے ہسدے ہوئے آکھیا لاء منسٹر فروغ نسیم مشکل وچ نیں لگدا اے اوہ وی جان والے نیں۔ ایہ پہلے وزیر قنون بنے جہناں نے وکیلاں تے اپنی جماعت لئی اپنے آفس دے بوہے پوری طرح نہیں ھولے۔ پر الطاف حسین دے خیرخواہ ہن وی نیں بابا کرمو نے کہیا اج کل لندن وچ الطاف حسین وی مشکل وچ نیں تے ایتھے فروغ نسیم وی خوش نہیں ایس لئی ہو سکدا اے ایہ باس دے کہن تے وزیر قنون دا عہدہ چھڈ کے لندن ٹر جان۔ شہزاداکبر تے فروغ نسیم نے برطانیہ توں بیرسٹری دی اعلیٰ تعلیم حاصل کیتی۔ بیرسٹر نوں دوران کورس اٹھن بیٹھن‘ کھان پین‘ بولن دا طریقہ سکھایا جاندا۔ ولیوز تے خصوصی لیکچر دتے جاندے نیں پر بیرسٹر فروغ نسیم ویلیو تے لیکچر دوران اپنے پارٹی لیڈر الطاف حسین دے کول لیکچر سنے جاندے سن۔ ایہناں تن ورھیاں وچ برطانیہ دی ویلیو دا رنگ کدھرے دکھائی نہیں دتا۔ شہزاداکبر تے اپنا عہدہ چھڈ کے جا چکیا ے پر فارغ نسیم لگدا اے پیاز کھا کے جان گے یاں اپنے نال کسے ہور نوں وی لے جان گے۔ فروغ نسیم وی پروٹوکول دے سحر وچ گم نیں۔ یقین نہیں تے ایم کیو ایم دے ساتھیاں توں پچھ لوو جہناں نوں کہندا سی میں تے ایم کیو ایم دا نہیں آں فیر جے پچھنا اے تے ایتھے وکیلاں توں پچھ لوو۔ آخری گل‘ حضرت علیؓ دا فرمان اے جہدی قوت ضعیف ہوندی اے اوہدا غرور زیادہ ہوندا اے۔٭٭