چوہدری اورنگزیب دا پاکستان نوں فلاحی ریاست بنائون دا عزم

قومی اسمبلی دے حلقہ 143 تے صوبائی اسمبلی دے حلقہ 167 توں انتخابی معرکے وچ اترن دا فیصلہ
پارٹی سپورٹراں دی وڈی گنتری وچ رلت‘ پنڈال وزیراعظم چوہدری اورنگزیب دے نعریاں نال گونج اٹھیا

ظ عباس

ایہہ حقیقت کسے کولوں لکی نہیں کہ چوہدری اورنگزیب اک ہمہ جہت شخصیت دے مالک نیں۔ اوہناں دی حیاتی دا مقصد کدی بے تحاشا دولت دا حصول نہیں رہیا‘ اوہ خودنمائی توں وی دور رہندے نیں جد کہ پراپرٹی دے کاروبار وچ اپنی صلاحیتاں دا لوہا منوان دے باوجود اوہناں دا اک سُفنا اے جہڑا عوام دی خدمت توں شروع ہو کے اوہدے اتے ختم ہو جاندا اے جہدی تعبیر پان لئی اوہ ہر ویلے کوشاں رہندے نیں۔ اوہ سادہ طبیعت دے حامل نیں مگر اوہناں دی سوچ غیر مبہم تے جدت پسند اے۔ اوہ کاروبار دے باب وچ ہوون یا سیاست تے خدمت دے میدان وچ‘اوہ میڈیا پرسن دے طور تے سماج نوں تبدیل کرن دا عزم ہووے یا پاکستان نوں اک مثالی ریاست بنان دا مقصد‘ چوہدری اورنگزیب دا شمار شہر بے مثل دی اوہناںچند شخصیات وچ ہوندا اے جنہاں نے اپنے عہد نوجوانی وچ ای اوہ سب کجھ حاصل کر لیا اے جہڑا لوکی اک عمر بیتا دین مگروں وی حاصل نہیںکر پاندے۔
چوہدری اورنگزیب دی شخصیت بارے بیان نوں دفتر درکار ہون گے مگر ایس حقیقت وچ کوئی شبہ نہیں کہ کجھ لوک اجیہے ہوندے نیں جنہاں دا مقصد زیست درحقیقت عوام دی خدمت ہوندا اے تے اوہ اپنا ایہہ مقصد پان لئی کوئی وی قربانی دین توں گریز نہیں کردے۔ چوہدری اورنگزیب دا شمار وی ایسی ای شخصیات وچ ہوندا اے جنہاں نے عوام دی خدمت لئی اک ایسا شاندار رہائشی منصوبہ شروع کیتا جہڑا اج الکبیر ٹائون دے ناں توں معروف اے تے شہر لہور دی پہچان بن چکیا اے۔ اوہناں نے سیاسی رہنما دے طور تے وی کجھ ای مہینیاں وچ اپنی وکھری پہچان بنا لئی اے تے ہن اوہناں دا شمار قومی سطح دے رہنماواں وچ کتیا جان لگیا اے۔ ایہہ اوہ بنیادی وجہ اے جہدے کارن پاکستان تحریک اتحاد دے کنونشن وچ حاضرین تے پارٹی دے سپورٹراں وزیراعظم چوہدری اورنگزیب دے نعرے بلند کیتے۔ ہو سکدا اے کجھ لوکاں نوں ایہ نعرہ عجیب محسوس ہووے کیوں جے چوہدری اورنگزیب نوں سیاست وچ آئے بوہتا عرصہ نہیں ہویا مگر اوہناں نے اپنی سوچ تے متحرک سیاست نال ایہہ ثابت کر دتا اے کہ ا وہ بہت چھیتی اپنے ایس سفنے دی تعبیر پان وچ وی کامیاب رہن گے۔

چوہدری اورنگزیب نے سیاسی جماعت پاکستان تحریک اتحاد قائم کیتی تے مقصد پاکستان نوں مثالی ریاست بنانا ای سی‘ اوہناں نوں مرکزی دھارے دی سیاسی جماعتاں ولوں اعلیٰ عہدیاں دی پیشکش ہوئی مگر اوہناں نے روایتی سیاست توں دور رہندے ہوئے اپنی سیاسی جماعت قائم کیتی جہدا مقصد ای ایہہ ہے کہ اوہ عوام دی خدمت اتے غیر متزلزل یقین رکھدے نیں۔ اوہناں لئی امکانات دے لامتناہی در کھلے سن مگر اوہنان نے مثالی پاکستان دا سفنا ویکھیا تے اوہدی تعبیر پان لئی عملی جدوجہد کرن وچ دیر نہیں کیتی۔ بہت سارے لوک بجا طور تے ایہہ استفسار کردے نیں کہ اوہناں نے کسے قومی جماعت وچ شمولیت کیوں نہیں اختیار کیتی؟ ایہدی سادہ جئی توجیہہ ایہہ اے کہ کسے ہور سیاسی جماعت وچ جان دا مطلب ایہہ ہوندا کہ اوہناں نے عارضی کامیابی دے حصول لئی اپنے نظریات قربان کر دتے نیں۔ چنانچہ اپنی وکھری سیاسی جماعت دی بنیاد رکھی تاں جے خدمت دے منشور اتے عمل کرن دے علاوہ پاکستان نوں اک مثالی ریاست بنان دے اپنے سفنے نوں وی پورا کر سکن جد کہ اوہ اک قومی اخبار دے چیف ایگزیکٹو وی نیں جہدے اجرا دا مقصد ای ایہہ اے کہ عوام نوں حقائق نال باخبر رکھیا جاوے تے روایتی دے بجائے متبادل بیانیہ پیش کیتا جاوے جنھوں مرکزی دھارے دا میڈیا عموماً نظر انداز کر دیندا اے تے ایہہ وی درحقیقت اوہناں دے ایس سفنے دی تعبیر ول اک اہم پیش رفت اے جہڑا اوہناں نے پاکستان دے باب وچ ویکھیا اے جتھے ہر پاکستانی بچے نوں بلامعاوضہ تے یکساں تعلیم دے موقعے حاصل ہون تے کوئی شہری صرف مالی مشکلات کارن صحت دی سہولتاں توں محروم نہ رہ جاوے۔ چوہدری اورنگزیب دا سیاست دے حوالے نال ویژن واضح تے غیر مبہم اے۔ اوہناں دے مطابق ملکی معیشت نوں مضبوط کرن لئی بے روزگاری دا خاتمہ کرنا ہووے گا جہڑا حقیقت اتے مبنی اے تے اوہدے وچ وی کوئی شبہ نہیںکہ اوہ صرف لفظاں یا دعویاں دی حد تک نوجوان نہیں بلکہ حقیقت وچ اک نوجوان نیں تے نوجواناں دے مسئلیاں دا حقیقی تے معروضی حقائق دی روشنی وچ ادراک رکھدے نیں تے اوہناں نوں میدان سیاست ول متوجہ کرن لئی سرگرم عمل وی نیں۔
دعوے کرنا آسان اے مگر چوہدری اورنگزیب نے حقیقت وچ ایہہ ثابت کیتا اے کہ اوہ بہت سارے جہاندیدہ تے سینئر سیاستداناں دی نسبت غیر معمولی سیاسی ویژن رکھدے نیں۔ اوہ ملک دے کامیاب ترین نوجوان انٹرپرینیورز وچوں اک نیں تے چاہندے نیں کہ نوجوان فضول سرگرمیاں وچ اپنا ویلا ضائع کرن دے بجائے اگے ودھن تے ترقی دے سفر اتے گامزن ہون کیوں جے ملکی آبادی دا اک وڈا حصہ نوجواناں اتے مشتمل اے۔
چوہدری اورنگزیب نال اوہناں دے سپورٹراں تے شہریاں دی والہانہ محبت ایہہ ثابت کردی اے کہ اوہ اک غیر معمولی سیاستدان ای نہیں بلکہ اوہناں دا عوام دوست شخصیت دا تاثر حقیقت اتے مبنی اے۔ اوہناں نے خدمت دے جذبے نوں شعار بنایا تے خدائے تبارک تعالیٰ نے وی اوہناں لئی کامیابی دے بوہے کھول دتے تے ایہہ حقیقت وی عیاں ہو گئی کہ جذبہ جواں ہووے تے کامیابی دور نہیں رہندی۔ چوہدری اورنگزیب اتے ایہ مثال صادق آندی اے کہ اوہناں نے ایس جواں عمری وچ اوہ کامیابیاں حاصل کیتیاں نیں جو بہت گھٹ لوکاں نوں نصیب ہوندیاں نیں۔
چوہدری اورنگزیب دا ویژن واضح اے۔ اوہ آکھدے نیں میں پاکستان نوں اک اسلامی فلاحی ریاست بنان دا مقصد لے کے میدان سیاست وچ اتریا واں۔ پاکستان تحریک اتحاد دا منشور ای ملک نوں ہر قسم دی تفرقہ بازی توں پاک کر کے قوم وچ اتحاد پیدا کرنا اے۔ بانی پاکستان قائداعظمؒ نے ترقی دے زریں اصول ایمان‘ اتحاد تے تنظیم دس کے قوم دی اک سمت متعین کردتی اے مگر بدقسمتی ایہہ اے کہ اسیں قائد دے ایس سبق نوں فراموش کر چکے آں تے اپنی منزل توں بتدریج دور ہو رہے آں۔
اوہ آکھدے نیں کہ میرا منشور پاکستان دے ہر بال نوں بلامعاوضہ تے یکساں تعلیم دی فراہمی یقینی بنانا اے۔ میری پہلی ترجیح لمے عرصہ توں نظرانداز ہو رہیا شعبہ صحت اے تاں جے کوئی غریب علاج دے بغیر ایڑیاں رگڑدے ہوئے موت دے منہ وچ نہ جاوے۔ ملک دی معیشت مضبوط ہووے گی تے ارض پاک توں بیروزگاری ختم ہووے گی تے ہر پاسے خوشحالی داور دورہ ہووے گا۔ اسیں کسے نوں بے روزگار نہیں رہن دیاں گے۔
پاکستان تحریک اتحاد دے چیئرمین چوہدری اورنگزیب نے پاکستان تحریک اتحاد دے پہلے ورکرز کنونشن نال خطاب کردے ہوئے آکھیا: اسیں رائٹ پرسن ٹو رائٹ پلیس دی پالیسی اتے یقین رکھنے آں۔ اقتدار وچ رہن والی سیاسی جماعتاں نے اپنے نااہل چہیتیاں نوں اہم عہدیاں اتے تعینات کر کے ملک نوں تباہی دے دہانے اتے پہنچا دتا اے۔جنہاں قوماں نے اپنی فوجاں دی قدر نہیں کیتی تے ادارے نوں کمزور کیتا اوہ ملک تباہ ہو گئے۔ عراق‘ شام تے ہن یوکرین ددا انجام ساڈے سامنے اے جیویں کہ یوکرین وچ ہر طرح دا انفراسٹرکچر ہون دے باوجود کمزور فوج ہون دی وجہ نال اوہ کجھ گھنٹے وی روس دا مقابلہ نہیں کر سکیا۔ پاکستانی فوج دا شمار دنیا دی بہترین فوجاں وچ ہوندا اے جہڑی ہر ویلے وطن نال محبت دے جذبے نال سرشار دشمن دے خلاف برسرپیکار اے۔
لہور وچ الکبیر ٹائون فیز2وچ ہون والے ایس یادگار کنونشن نال خطاب کردے ہوئے اوہناں نے آکھیا کہ پاکستان وچ ایسا قنون ہونا چاہیدا اے کہ کوئی جے فوج جیسے باوقار ادارے دے خلاف ہرزہ سرائی کرے تے اوہنوں سخت ترین سزا دتی جاوے۔ پاک فوج ملک دی حقیقی محافظ اے تے سرحداں اتے اوہدی موجودگی کارن ای اہالیان وطن سکون دی نیندر سوندے نیں تے پاک فوج سرحد دے اندر وی ملک دشمناں دی بیخ کنی وچ مصروف اے۔
چوہدری اورنگزیب نے ہور آکھیا‘ اقتدار وچ آن والی سیاسی جماعتاں نے قوم نال کیتے جان والے وعدے کدی پورے نہیں کیتے۔ روٹی‘ کپڑا تے مکان دا وعدہ کرن والی پیپلز پارٹی نے سندھ دے لوکاں کولوں پین دے پانی تک دی سہولت کھوہ لئی اے تے موجودہ حکمراناں نے ملک دے قرضے لان تے کشکول توڑن دا وعدہ کتیا سی لیکن اوہناں نے قرضے دگنے کر دتے نیں تے قوم دے ہر بچے نوں کشکول پھڑا دتا اے۔اوہناں آکھیا کہ اللہ تبارک تعالیٰ دا پاکستان اتے احسان اے کہ ساڈی آبادی دا 65فیصد نوجواناں اتے مشتمل اے۔اسیں برسراقتدار آ کے ملک دی ترقی لئی نوجواناں نوں اوہناں دا بھرواں کردار ادا کرن دا موقع دیاں گے۔حکمراناں دی چہیتیاں نوں نوازن دی پالیسی پاروں ملک تباہ ہو رہیا اے۔ پنجاب وچ وزیراعلیٰ لئی اہل شخص نوں ای ایہہ عہدہ دتا جانا چاہیدااے‘ اک نااہل بندے نوں پنجاب دا وزیراعلیٰ بنانا زیادتی اے۔ کوئی نو جوان جے کاروبار کرن وچ مہارت رکھدا اے تے اوہنوں ایسی ای وزارت دتی جاوے گی۔ ایسے طرح جہڑا جہڑے عہدے لئی اہل ہووے گا اوہنوں اوہو عہدہ دتا جاوے گا۔ اسیں خاندانی سیاست دا خاتمہ کر دیاں گے۔ اسیں پاکستان دے آں تے پاکستان ساڈا اے‘ ساڈے وڈے وی
پاکستان وچ ای رہے تے اوہ ایتھے دفن نیں۔ اسیں وی ایتھے رہواں گے تے ایتھے دفن ہواں گے۔
اوہناں نے کسے دا ناں لیتے بغیرہور آکھیا اسیں لندن وچ بیٹھ کے ملک دی گلاں کرن والیاں وچوں نہیں آں۔ کدی میرے کول اپنا گھر تک نہیں سی لیکن میں صرف اپنا گھر بنان بارے نہیں سوچیا بلکہ سارے بے گھراں بارے سوچیا۔ اللہ نے مینوں وی گھر دتا تے دوجیاں لئی وی گھر بنان دی توفیق دتی۔چوہدری اورنگزیب نے ہور آکھیا کہ عمران خان نے گرین پاسپورٹ دی عزت ودھان دا وعدہ کیتا سی۔ اج گرین پاسپورٹ دا حال ویکھ لو۔ اسیں گرین پاسپورٹ دی عزت بحال کراں گے۔ پاکستان دے کول دنیا دا بہترین نہری نظام اے۔ زرعی ملک ہون دے باوجود اسیں چینی تے گندم دوجے ملکاں توں درآمد کرن تے مجبور آں۔ ایہناں حکمراناں نوں کساناں نے ای ووٹ دتا تے اوہناں نے ہن ایہناں دا ای برا حال کردتا اے۔ اج کساناں نوں کھاد تک نہیں مل رہی۔ کساناں نوں ایس عزم دا اعادہ کرنا چاہیدا اے کہ ہن اوہ ایہناں لوکاں نوں ووٹ نہیں دین گے۔
اوہناںنے آکھیا کہ ساڈا منشور اے کہ اک اسلامی بینک بنایا جاوے جہدا ہیڈ آفس سعودی عرب وچ ہووے گا۔ اسلامی کرنسی ہووے تاں جے ڈالر دی غلامی توں نجات حاصل کیتی جا سکے۔ اسیں کشمیر دے اندر بھارتی فوج دے ظلم و ستم اتے مودی نوں وارننگ دے رہے آں جے ایہہ سلسلہ نہ رکیا تے اسیں بھارت وچ گھس کے اوہ حال کراں گے کہ اوہدی آن والی نسلاں یاد رکھن گئیاں۔چوہدری اورنگزیب نے آکھیا کہ ساڈی تحریک دن بدن پھیل رہی اے۔ عوام وچ مقبول ہو رہی اے۔ اسیں انقلاب لیاواں گے تے قوم دی قسمت بدل دیاں گے۔سیاسی جماعتاں نے اخلاقیات دا جنازہ کڈ دتا اے لیکن اسیں اخلاقیات دا دامن نہیں چھڈاں گے۔ دنیا وچ بلند اخلاقیات دی حامل قوماں نے ای ترقی کیتی اے۔ اسیں کامیاب ہو کے نوجواناں نوں اقتدار وچ آن دا موقع فراہم کراں گے۔
پاکستان تحریک اتحاد دے کنونشن وچ صوبہ بھر توں لوکاں دی بہت وڈی تعداد نے رلت کیتی۔ ایس پروقار مگر سادہ تقریب نال پاکستان تحریک اتحاد دے اہم رہنماواں سعید‘ میاں مبشر‘ راجہ نبیل کیانی‘ عادل‘ چوہدری نعیم گورایہ‘ چوہدری اکبر‘طاہر مسعودچوہدری، وسیم حمید،آصف شہزاد، ذیشان شفیق،ملک ارشد،میجر رفیق حسرت،حافظ ذوہیب،صادق ارشاد، حافظ حیدر،فیصل صدیق، آغا شاہد،حافظ امجد،امین بٹ،چوہدری عابد شہزاد،صفت اللہ،کرنل (ر) پرویز،کیپٹن (ر) احسن،چو ہدری مبین انور،چوہدری ندیم،کاشف شہز اد، رئوف بٹ،خواجہ نبیل ایڈووکیٹ، حسنات گیلانی، اعظم بھٹہ، خادم حسین، حماد مانیکاتے تنویر باجوہ نے قافلیاں دی شکل وچ رلت کیتی جد کہ قومی اسمبلی دے حلقہ 143 توں چودھری جاوید ‘ بلال عمر بودلہ‘ سید اختر شاہ ‘ عباس شاہ تے چودھری عثمان نے وی قافلیاں دی شکل وچ بھرویں رلت کیتی۔ چیئرمین چوہدری اورنگزیب دی آمدتوں پہلے پنڈال لوکاں نال کھچا کھچ بھر گیا سی تے پارٹی نغمیاں دی گونج دور دور تک سنائی دے رہی سی۔
چیئرمین چوہدری اورنگزیب دی پنڈال وچ آمد تے کنونشن دے شرکا نے اوہناں دا بھرواں استقبال کردے ہوئے گل پاشی کیتی تے وزیراعظم چوہدری اورنگزیب دے نعرے لائے۔پاکستان تحریک اتحاد دے چیئرمین چوہدری اورنگزیب نے اپنی پارٹی دے پہلے کنونشن وچ این اے 143 توں قومی اسمبلی تے پی پی 167 توں صوبائی اسمبلی دا الیکشن لڑن دا اعلان کیتا جہدے اتے پنڈال اک واری فیر وزیراعظم چوہدری اورنگزیب دے نعریاں نال گونج اٹھیا۔