پنجابی میڈیا گروپ دے چیئرمین مدثر اقبال بٹ تے اوہناں دی ٹیم دا دورہ سوہدرہ
چیئرمین پنجابی میڈیا گروپ مدثر اقبال بٹ نے پچھلے دناں اپنی ٹیم دے نال سوہدرہ دا دورہ کیتا تے سورہدرہ دی ہر دل عزیز شخصیت مہر خالد مجید جو کہ پچھلے دناں عارضہ قلب وچ مبتلا ہوئے’ دی تیمارداری تے عیادت کیتی۔مدثر اقبال بٹ نے مہر خالد مجید نوں شعروادب دا اک اثاثہ قرار دتا تے آکھیا کہ مہر خالد مجید دی سوہدرہ دھرتی دی سماجی خدمات توں انکار نہیں۔ چیئرمین پریس کلب سوہدرہ نجیب اللہ ملک نے وی مہر خالد مجید دی ادبی’ سیاسی تے سماجی خدمات نوں سراہیا تے اوہناں دی مکمل صحت یابی لئی دعا کیتی۔
کینیڈا وچ مقیم معروف پاکستانی نوجوان رضوان ملک نے وی مہر خالد مجید دے کردارو افعال دی تعریف کردے ہوئے اوہناں دی مکمل صحت یابی دی دعا کیتی۔ ایس موقعے اتے وائس چیئرمین پنجابی میڈیا گروپ بلال مدثر بٹ’ جنرل منیجر رضوان اصغر بٹ’ محمد فاروق’ علی بابر بٹ’ حسیب جوئیہ تے مہر سعدی وی موجود سن۔مہر خالد مجید نے معزز مہماناں دا نہ صرف شکریہ ادا کیتا بلکہ اوہناں دی تواضع وچ وی کوئی کسر نہ چھڈی۔
مہر خالد مجید نے آکھیا کہ پنجابی میڈیا گروپ پنجابی زبان وادب لئی جو گراں قدر خدمات سرانجام دے رہیا اے اوہ قابل تقلید تے قابل تعریف نیں۔ اوہناں نے پنجابی میڈیا گروپ دے اکابرین دی سوہدرہ آمد تے اوہناں دا شکریہ ادا کیتا تے آکھیا کہ مدثر اقبال بٹ اپنے دوستاں نوں ہمیشہ یاد رکھدے نیں تے اوہناں دی ہر غمی خوشی وچ شامل ہوندے نیں۔