کیہ ادارے کمزور تے بے بس نیں؟

اسیں اجہے ملک دے شہری آں جتھے ویڈیو تے آڈیو سامنے آ جاندی اے جتھے عورتاں دی ویڈیو بنا کے اوہناں نوں بلیک میل کر کے پیسے بناندے ہون’ جتھے کھانے پینے دیاں شیواں وچ ملاوٹ کردے ہون’ انج کرن والے لوکاں دے کول ایس توں علاوہ کوئی دوجا ہنر نہیں جہدے نال ایہ پیسے بنا سکن جاب کر سکن۔ لگدا ایہہ وے کہ آڈیو ویڈیو بنان والے نوکری پیشہ ہوندے نیں۔ پیسے بناندے نیں فیر غایب ہو جاندے نیں۔ سوال ایہ وے کہ اوہناں نوں ایہ کم کرن کون دیندا اے؟ کیہ انج کرن والیاں نوں قنون نہیں روکدا؟ کیہ ادارے کمزور تے بس نیں؟ کیہ انج کرن والیاں نوں سزاواں دا ڈر نہیں۔ کیہ انج کرن والیاں وچ سوسائٹی دا ڈر نہیں ہوندا۔ اوہناں نوں سماج دی فکر نہیں ہوندی۔ کیہ حکومتاں نوں چلان دے کیتے اوہناں دے اپنے ادارے ایہ کم کردے نیں۔ کیہ ایہدے پچھے کوئی انٹرنیشنل مافیا اے جو سامان وغیرہ دیندا اے۔ فیر اوہناں توں مرضی دے کم لیندا اے۔ ایہناں سوالاں دا جواب جانن لئی بابا کرمو نال ملاقات کیتی۔ بابا کرمو نے گزارشات سنیاں تے کہیا تہاڈے سوالاں ول بعد وچ آنے آں پہلے دسو سیلاب نال متاثرہ لوکاں نوں امداد ملی؟ کیہ سیلاب مارے علاقیاں دے حالات نارمل ہو چکے نیں۔ کجھ لیڈراں نوں ویکھ سن کے لگدا اے کہ ایہ آفت لیاندی گئی سی۔ سیلاب دا آنا وی سازش سی۔ ایہ سمجھ رہے نیں جیویں کجھ ہویا ای نہیں۔ ایہ سب حکومت دا کیتا دھریا سی۔ اک لیڈر نے تے کمال ای کر دتا دو واری ٹی وی تے بہہ کے کجھ گھنٹیاں وچ ارباں روپیے اکٹھے کر لئے سن پر ایہ نہیں دسدے کہ ایہ رقم کس بینک تے کس اکائونٹ وچ رکھی؟ کتھے کتھے ایہ رقم تقسیم ہوئی۔ اوہناں نوں تے لگدا اے سیلاب دی فکر نہیں۔ ایہناں حالات وچ وی جلسے کردے رہے۔ ایہناں وچ اک ای پریشانی اے کہ فیر کدوں الیکشن ہون گے۔ اسیں کیویں اقتدار وچ واپس آواں گے۔
ایہ پنج ورھیاں لئی اسمبلی دے ممبر منتخب ہوئے پر جیویں ای حکومت ختم ہوئی۔ اسمبلی توں ایہ باہر آئے تے اداریاں دے خلاف طبل جنگ وجا دتا۔ اسمبلی وچ جانا ای چھڈ دتا پر کہیا جاندا اے تنخواہواں اجے وی لے رہے نیں۔ دو صوبیاں وچ اوہناں دیاں حکومتاں نیں جے الیکشن کرانا چاہندے نیں ایہناں دو صوبیاں دیاں اسمبلیاں نوں ختم کرا دین بحران پیدا ہو جاوے گا پر ایہ صرف نویں الیکشن لئی آواز ای بلند کر کے سیاست وچ ان رہنا چاہندے نیں۔ ایہ سمجھدے نیں کہ مسئلیا ںدا حل سجرے الیکشن نیں۔ جے اقتدار وچ نہیں آن گے تے کیہ فیر وی اسمبلی وچ جان گے بظاہر لگدا اے انج ممکن نہیں۔ ایہ صادق و امین نیں تے لوکاں نوں سچ سچ دسن کہ اقتدار وچ الیکشن نال آئے سن یاں سلیکشن نال۔ جد کہ ایہ سمجھدے نیں کہ اسیں الیکشن نال نہیں سلیکشن نال آنے آں جو سانوں لیاندے نیں اسیں اوہناں دی خدمت کراں گے تے اقتدار وچ رہواں گے ایس لئی عوامی خدمت ایہ کیویں کرن گے۔ لیڈر لوکاں نوں بے وقوف سمجھدے نیںتے لوک اوہناں نوں بے وقوف سمجھدے نیں۔ عوام اپنی مدد آپ دے تحت زندہ رہن لئی ایہ سب کجھ کردے رہندے نیں۔ ہن میں تہاڈے سوالاں دے جواب ول آنا واں کہ فیصلے لکھن والیاں دی آڈیو ویڈیو کیویں لیک ہوندی اے؟ سوال ایہہ وے کہ ایہناں نوں بناندا کون اے؟ لیک کون کراندا اے۔ پھڑن والیاں توں بنان والے زیادہ طاقتور نیں ایہ انج ای اے جیویں غبارے وچ پہلے ہوا بھری جاندی اے فیر اپنی مرضی نال لیک کر دتی جاندی اے۔ انج کرن تے بچہ روندا ے کہ فیر ہوا بھرو پر غبارے دی حالت دی وجہ نال یاں بچے دی صحت دی وجہ نال یاں کجھ گھریلو مجبوریاں دی وجہ نال دوبارہ ہوا نہیں بھری جاندی۔ ایہدے تے بچہ کناں روئے چیکے’ ہوا بھری جاندی اے فیر ایہ اڈ کے اقتدار دی کرسی تے بہہ جاندے نیں جدوں کرسی توں لاہنا ہووے تے ہوا کڈھ دتی جاندی اے فیر ایہ ضد کردے نیں کہ جدوں تک دوبارہ ہوا نہیں بھرو گے اسیں اسمبلی وچ نہیں جاواں گے۔
ایہہ دل ای دل وچ روندے وی نیں پر اچی آواز وچ اوہناں نوں رون نہیں دتا جاندا۔ کدی کدی جدوں اوہناں دے غبارے دی ہوا نہیں نکلدی تے اوہناں دی ذاتی ویڈیوتے آڈیو نوں چپ کران لئی لیک کروا دیندے نیں۔ انج دا ای کجھ حال ای وچ ہویا اے۔ اوہناں نوں وی پتہ ہوندا اے کہ ساڈیاں خامیاں دے باوجود سانوں سلیکٹ کیتا گیا سی ایس لئی نوکری کرو مراعات لوو’ ٹکر نہ لوو۔ ایہ کم اوہناں دی مرضی نال کردے رہندے نیں پر جدوں اپنی مرضی نال کم کرنے لگ جاندے نیں تے اوہناں نوں سمجھان دے باوجود جدوں ایہ نہیں سمجھدے تے اوہناں دی آڈیو ویڈیو لیک کرکے اوہناں نوں سمجھان دی کوشش کردے نیں۔ ایس ملک نوں چلان والے جو قنون نوں بناندے نیں اوہ لاگو نہیں کرواندے یعنی بنان والے وکھرا تے لاگو کرن والے وکھرا پچھیا اوہ کہڑا قنون اے جواب ملیا جہدی لاٹھی اوہدیمجھ’ پچھیا کیویں ایس قنون توں نجات حاصل کریے کہیا عہدے نہ لوو’ اقتدار دی کرسی تے نہ بیٹھو تے مجھ لاٹھی دے بناں نہ رکھو۔٭