حکومت پنجاب دے پہلے 50دِناںوچ عوامی خدمات دا سفر

حکومت پنجاب دی ہمیشہ توں کوشش رہی اے کہ عوام الناس دی فلاح و بہبود لئی ایسے اقدامات کیتے جان جہڑے کہ اوہناں دی ترقی تے خوشحالی دا کارن بنن تے عوام نوں مشکلاں توں کڈ کے خوشحالی ول گامزن کرے تاں جے براہ راست ملکی ترقی وچ نمایاں وادھا ممکن ہو سکے۔ حکومت پنجاب جہنے وزیراعلیٰ پنجاب پرویزالٰہی دی قیادت وچ دن رات محنت کیتی تے ایسے پروگرام تے منصوبیاں دا سنگ بنیاد رکھیا جو ملک دی 75 سالہ تریخ وچ ناممکن سن۔ وزیراعلیٰ پرویزالٰہی نے حلف چکن توں تادم تحریر جہناں منصوبیاں تے پروگراماں دا سنگ بنیاد رکھیا اوہدے وچ اولین ترجیح عوام دی فلاح و بہبود لئی اوہناں نوں ریلیف دینا سی۔
وزیراعلیٰ پنجاب پرویز الٰہی نے عدالت عظمیٰ دے فیصلے دے مطابق 26 جولائی تے 27جولائی سنہ 2022دی سرمیانی شام حلف چکیا سی۔ پرویزالٰہی ایس توں پہلاں پرویز مشرف دے دور وچ وزیراعلیٰ پنجاب رہے نیں جہناں بارے مشہور اے کہ اوہ مصلحت پسندی دی سیاست کردے نیں تے اپنے منصوبیاں تے بیوروکریسی دی مدد نال خموشی نال کم کردے رہندے نیں۔ پرویزالٰہی نوں چیئرمین ضلع کونسل توںلے کروزیراعلیٰ تک دی سیاست دا تجربہ اے۔ا یسے طرحاں وفاق دی سطح تے اوہناں نے قائد حزب اختلاف توں لے کے نائب وزیراعظم تک دی سیاست کیتی اے۔ سیاسی مبصرین دے مطابق پرویزالٰہی اک متحرک سیاستدان نیں۔ دوجے پاسے ملک اتے حکمرانی کرن والی متعدد سیاسی جماعتاں تے آمراں نے اپنے اپنے دور وچ ملک دے غریب عوام دی قسمت بدلن’ نوجواناں نوں بہتر تعلیم تے روزگار دے موقعے فراہم کرن’ ملک دے ہر طبقے لئی صحت دی یکساں سہولتاں دی فراہمی تے زنانیاں نوں بااختیار بنان دے بلند و بانگ دعوے کیتے تاہم اوہ ایہدے وچ کامیاب ویکھائی نہیں دتے کیوں جے اوہناں دے دعوویاں دے برعکس تاحال سارے مسائل اپنی جگہ جوں دے توں نیں۔
وزیراعلیٰ پرویزالٰہی دی حکومت نوں 50دیہاڑے مکمل ہو گئے نیں تے اینے مختصر ویلے وچ صوبہ پنجاب وچ جو نمایاں تبدیلی ویکھن نوں ملی اے اوہ کسے تعارف دی محتاج نہیں۔50دناں وچ جہناں اقدامات تے پالیسیاں نوں بروئے کار لیایا گیا اوہناں وچ سیلاب زدگان لئی 20ارب روپے دا پیکیج تے لواحقین لئی 10لکھ روپے دی امدادی رقم’ ایمرجنسی وارڈاں وچ مفت دوائیاں دی فراہمی’ ریسکیو 1122 دا دائرہ کار ضلع توں ودھا کے ساری تحصیلاں تک کرنا’ احساس راشن رعایت پروگرام دے ذریعے گھٹ آمدنی والے 1کروڑ گھرانیاں نوں راشن اتے 40فیصد تک دی رعایت ‘ گریجویشن تک طلبا دی بنیادی فیس حکومت پنجاب دی ذمہ داری’ پی آئی ٹی بی دے بنائے گئے سیلاب فنڈ پورٹل وچ کریڈٹ کارڈ توں اک ارب توں ودھ دی رقم جمع’ 88 ہائی وے پٹرولنگ پوسٹ دی منظوری دینا’ پلس دے شہدا دی فیملی دی پیشن وچ 4گنا ودھا’ شہری جائیداد دی خریدو فروخت اتے عائد سٹامپ ڈیوٹی گھٹ کر کے 1فیصد کرنا’ آن لائن تعلیم لئی انصاف اکیڈمی دا قیام ‘ صوبے بھر وچ صحت کارڈ دی بحالی تے توسیع دا عمل جاری’ محکمہ صحت وچ ایڈ ہاک بھرتیاں اتے پابندی ختم کرنا’ ریسکیو موٹرسائیکل سروس ہور 27اضلاع وچ شروع کرنا وغیرہ شامل نیں۔
پنجاب حکومت ولوں سیلاب وچ شدید زخمی ہون والیاں دی امداد 3لکھ مقرر کیتی گئی اے جد کہ سیلاب وچ مکمل تباہ ہون والے گھراں دے افراد دی امداد اک لکھ توں ودھا کے 4لکھ کردتی گئی اے۔جزوی متاثرہ گھراں دی مالی امداد 40ہزار توں ودھا کے دو لکھ کردتی گئی جدکہ مویشیاں دی ہلاکت اتے وڈے جانو ردے فی کس نقصان دی مالی امداد 20ہزار توں ودھا کے 75 ہزار کردتی گئی اے۔ خیال رہوے کہ پنجاب وچ سیلاب دے کارن 3 اضلاع راجن پور’ ڈی جی خان تے میانوالی سب توں ودھ متاثر ہوئے’ تنوں اضلاع وچ 37یونین کونسلاں دے 236 موضع جات متاثر ہوئے۔ حکام دے مطابق ایہناں تن اضلاع وچ 4لکھ اک ہزار 977 ایکڑ رقبہ متاثر ہویا جد کہ اک لکھ78ہزار 186 ایکڑ تے موجود فصلاں تباہ ہوئیاں۔ دریں اثنا پنجاب حکومت سیلاب متاثرین دی بحالی لئی سارے وسائل بروئے کار لیا رہی اے۔ وزیراعلیٰ فلڈ ریلیف فنڈ وچ جمع ہون والی رقم نال سیلاب متاثرین دی بحالی دا کم جاری اے۔ افسو س دی گل تے ایہہ اے کہ وفاقی حکومت نے پنجاب دے سیلاب متاثرین دی کوئی مدد نہیں کیتی تے وفاق نے سیلاب متاثرین دی بحالی لئی اک پائی تک نہیں دتی ۔ وفاق دا ایہہ طرز عمل ہر لحاظ نال قابل افسوس تے قابل مذمت اے۔
ریسکیورز دا کم صرف ڈیوٹی کرنا نہیں بلکہ ایہہ انسانیت دی خدمت دے مترادف اے۔ پنجاب وچ ریسکیو 1122 ایمرجنسی سروس وزیراعلیٰ پرویزالٰہی نے شروع کیتی۔ پنجاب ایمرجنسی سروس ریسکیو 1122 صوبے دا قابل قدر تے باعث فخر ادارہ اے۔ ایہو وجہ اے کہ وزیراعلیٰ چودھری پرویزالٰہی نے صوبے دی ساری تحصیلاں وچ ریسکیو 1122نوں توسیع دین دی منظوری دتی اے۔ وزیراعلیٰ پرویزالٰہی دے پچھلے دور حکومت وچ ایس مایہ ناز ادارے دی بنیاد رکھی گئی تے اج ایہہ ادارہ نہ صرف پاکستان بلکہ عالمی سطح اتے وی اپنی پہچان رکھدا اے۔
ایہہ کہنا غلط نہیں ہووے گا کہ پنجاب حکومت دا فوکس عام تے غریب بندے دی فلاح اے۔ احساس پروگرام عام بندے دی فلاح تے بہبود دا پروگرام اے۔ احساس پروگرام وچ وی وی آئی پی عام بندا اے۔ وزیراعلیٰ چودھری پرویزالٰہی نے 100ارب روپے دے پنجاب احساس راشن رعایت پروگرام دا آغاز کردتا اے۔ احساس راشن رعایت پروگرام دے تحت مستحق خانداناں نوں آٹا’ دالاں’ کوکنگ آئل تے گھیو 40فیصد تک سستا ملے گا۔ مستحق خاندان رجسٹرڈ کریانہ سٹوراں توں 40فیصد رعایت تے آٹا’ گھیو’ تیل تے دالاں خرید سکن گے۔ ہور اشیا خورونوش نوں پروگرام وچ شامل کرن دا وی جائزہ لیتا جا رہیا اے۔ وزیراعلیٰ پرویزالٰہی دا کہنا اے کہ احساس پروگرام دا دائرہ کار گلی محلے تک وسیع کراں گے۔ دُوجے پاسے غریب طبقے لئی 40فیصد دی رعایت بہت وڈی رعایت اے جد کہ سیلاب توں متاثرہ تن اضلاع وچ وی متاثرین نوں ایس پروگرام وچ رجسٹرڈ کرایا گیا اے۔
نیز’ شہدا جہڑے کہ ساڈا قیمتی اثاثہ نیں جہناں دی قربانیاں ساڈے ساریاں لئی مشعل راہ نیں تے ایس راہ اتے چلن لئی بھرویں جذبے’ دیانت تے پیشہ وارانہ اہلیت دی لوڑ اے۔ شہدائے وطن دی قربانیاں ساڈے کولوں تقاضا کردیاں نیں کہ اسیں ارض پاک دی اپنے خون نال آبیاری کرن والیاں نوں اپنے سر دا تاج بنا کے رکھیے ۔ قوم دے ہیرو تے پلس دے شہدا دی فیملی دی پیشن وزیراعلیٰ پرویزالٰہی نے 4گنا ودھا کے اوہناں دے لواحقین دی دادرسی وچ اہم کردار ادا کیتا اے۔
چوہدری پرویزالٰہی عوام نوں مشکلات تے دوجے مسائل توں نجات لئی ہر سطح تے ریلیف فراہم کرن لئی اقدامات کر رہے نیں۔ ایہو وجہ ا ے کہ سٹامپ ڈیوٹی دی وصولی حکومت پنجاب لئی اک وڈی آمدنی دا ذریعہ اے جو بورڈ آف ریونیو دے ذریعہ جمع کیتا جاندا اے۔ صدیاں پرانے عمل وچ شہریاں دی سہولت توں متعلق بڑے مسائل سن جیویں جعلی تے دھوکہ دہی دے طریقیاں دے ذریعے ریونیو دا اخراج سی۔ حکومت دے ایس عمل توں مالکان اراضی نوں خریدوفروخت وچ بہت آسانیاں میسر ہون گئیاں۔
تعلیم جو کہ انسان دی بنیادی ضرورت اے تے تعلیم جو کہ شخصیت نوں بہتر بنان تے حصول معلومات لئی ضروری اے اوتھے ملازمت حاصل کرن لئی تعلیم بنیادی ضرورت اے تے ملک دے قنون آر ٹی ای دے تحت وی تعلیم حاصل کرنا لازمی اے تے ایہناں ساریاں توں ودھ ایہہ اہم اے کہ اسیں بحمداللہ مسلمان آں’ ایس لحاظ نال تعلیم حاصل کرنا ساڈا مذہبی فریضہ اے لیکن ایہہ اینا آسان نہیں ۔ بالخصوص اوہناں لوکاں لئی جہناں دی مالی حیثیت کمزور اے یا جہناں دی ارباب اقتدار تے اختیار تک رسائی نہیں اے۔ ساڈے طلبہ لئی حکومت ‘نجی اداریاں تے بینکاں دے علاوہ فلاحی تے سماجی اداریاں وَلوں بہت ساری سکیماں جاری کیتیاں گئیاں نیں۔ وزیراعلیٰ پرویزالٰہی دی حکومت نے پہلاں وی صحت تے تعلیم نوں اولین ترجیح دتی تے ہن ایہناں شعبہ جات وچ ہور انقلابی اقدامات کیتے جار ہے نیں۔
تعلیم دی اہمیت نوں گرداندے ہوئے پنجاب حکومت نے ٹیوشن کلچر دے خاتمے لئی فری آن لائن اکیڈمی دا آغآز کردتا اے جتھے طلبہ بالکل مفت تعلیمی وسائل تک رسائی حاصل کر سکدے نیں۔ اکیڈمی وچ 7,000 توں ودھ لیکچرز تے فرضی ایم سی کیوکوئز نیں تاں جے طلبہ نوں ٹیوشن سنٹراں اتے اک پیسہ خرچ کیتے بغیر سالانہ امتحاناں دی موثر طریقے نال تیاری کرن وچ مدد ملے۔ انصاف اکیڈمی وچ 9ویں’ 10ویں’ 11ویں تے 12ویں اتے مشتمل مواد اے۔ میٹرک لئی مواد انگریزی تے اردو زباناں وچ دستیاب اے۔ اکیڈمی دے موبائل وژن ایپل سٹور تے گوگل پلے سٹور تے وی دستیاب نیں۔ مزید برآں’ شہباز شریف دور وچ سیرت اکیڈمی نوں تالا لا کے غیر فعال کرنا اک افسوسناک عمل سی تے ہن پنجاب حکومت وزیراعلیٰ پرویزالٰہی دی قیادت وچ سیرت اکیڈمی نوں بحال تے متحدہ علما بورڈ نوں فعال کیتا جاوے گا۔ سیرت اکیڈمی نوں بحال تے متحدہ علما بورڈ نوں فعال کرن دے نال نال سیلاب وچ متاثرہ مسجداں تے مدرسیاں دی بحالی دا کم وی کیتا جاوے گا۔
وزیراعلیٰ چوہدری پرویزالٰہی صوبہ پنجاب دے ہسپتالاں دے ایمرجنسی وارڈاں وچ مفت دوائیاں دی فراہمی یقینی بنا رہے نیں۔ صحت کارڈ پروگرام دے تحت مریضاں نوں ہور مرضاں دے علاج دی سہولت دتی جاوے گی۔ اوہناں نے ایس پروگرام دے تحت مریضاں نوں علاج معالجے دی سہولتاں لئی پینل وچ ہور ہسپتال شامل کرن دی باضابطہ منظوری دتی اے جد کہ ایس پروگرام دے تحت ہن تک 20لکھ توں ودھ مریضاں دا علاج ہو چکیا اے۔ دُوجے پاسے وزیراعلیٰ پنجاب چوہدری پرویزالٰہی نے صوبے بھر دے سارے سرکاری ہسپتالاں دی ایمرجنسی وارڈاں نوں اَپ گریڈ کرن دی منظوری دیندیاں ہوئیاں اوتھے مریضاں نون مفت دوائیاں دین دااعلان کیتا اے۔ پچھلے وزیراعظم عمران خان دے ہیلتھ کارڈ پروگرام نوں ہور بہترانداز وچ ودھان دا فیصلہ کیتا گیااے۔
وزیراعلیٰ پنجاب چودھری پرویزالٰہی نے محکمہ صحت وچ ایڈہاک تقرریاں اتے پابندی ختم کردتی اے۔ ایڈہاک تقرریاں اتے پابندی ختم کرن دا اطلاق محکمہ سپیشلائزڈ ہیلتھ کیئر اینڈ میڈیکل ایجوکیشن تے محکمہ پرائمری اینڈ سیکنڈری ہیلتھ کیئر اتے ہووے گا۔ایس سلسلے وچ وزیراعلیٰ پنجاب نے دونویں محکمیاں ولوں ارسال کردہ سمری دی منظوری دے دتی اے۔ فیصلے مگروں ڈاکٹرز’ نرسز تے دوجے عملے نوں قواعدو ضوابط دے تحت ایڈہاک ملازمتاں اتے بھرتی کیتا جا سکے گا جد کہ ایس اقدام نال محکمے وچ ڈاکٹرز’ نرسرز تے دوجے سٹاف دی کمی دور ہووے گی۔
پچھلے سال اکتوبر وچ پنجاب اسمبلی نے متفقہ طور تے اک قرارداد منظور کیتی سی جہدے وچ نکاح نامہ دے فارم وچ ختم نبوت دے حلف نوں شامل کرن دا مطالبہ کیتا گیا سی تاں جے مسلماناں تے غیر مسلماں (احمدیاں) دے وچ ویاہ دی حوصلہ شکنی کیتی جا سکے۔ پنجاب حکومت نے نکاح نامے وچ ختم نبوت دا اعلان ضروری قرار دے دتا اے جو کہ عظیم اقدامات وچوں اک اے۔
وزیراعلیٰ چودھری پرویزالٰہی نے ٹیوٹا اداریاں دے طلبہ لئی 43بساں دی چابیاں چیئر پرسن ٹیوٹا مامون تارڑ دے حوالے کردتیاں نیں۔ 37ٹیوٹا اداریاں نوں 62کروڑ روپے مالیت دی 43بساں فراہم کیتیاں گئیاں نیں۔ 12بساں جنوبی پنجاب دے ٹیوٹا اداریاں نوں دتیاں گئیاں نیں۔ ٹیوٹا اداریاں نوں بساں دی فراہمی نال طلبہ نوں آمدورفت وچ سہولت ملے گی۔
وزیراعلیٰ پرویزالٰہی نے اوکھے ویلے وچ حکومت سنبھالی تے 50دناں دے مختصر عرصے وچ اَن تھک محنت نال نہایت اہم اقدامات سرانجام دتے جو کسے وی حکومت لئی ناممکن ہوندا اے۔ اپنے انتخابی منشور وچ معیشت’ احتساب’ طرز حکمرانی تے سفارت کاری دے شعبے توں متعلق جہڑے وعدے تے اعلانات کیتے سن اوہ مکمل ہوندے نظر آرہے نیں۔ ایہہ حقیقت اے کہ کامیابی تے نکامی دا تعین کرنا آسان نہیں۔ کجھ چیزاں’ مثلاً معیشت دا تے پچھلے سالاں توںموازنہ کر کے ایہہ آکھیا جا سکدا اے کہ صوبہ پنجاب ترقی دی راہ اتے گامزن اے تے چودھری پرویزالٰہی دی سرپرستی وچ گڈ گورننس دے نال حکومتی اقدامات سرانجام دتے جا رہے نیں۔