بلوچ عورتاں دی منفی تصویر کیوں؟

اشرف شریف

ملک وچ جدوں پی ڈی ایم تے تحریک انصاف دے وچکار جنگ چھڑی ہووے اجہے حالات وچ بلوچستان دے موضوع تے لکھنا کجھ دوستاں نوں عجیب محسوس ہویا۔ ایہ ایس لئی اے کہ ساڈے لوکاں دی اکثریت صرف ایہنوں ای حالات حاضرہ دا موضوع سمجھ بیٹھی اے۔ ایہ یقینا اہم گل اے کہ میں سیاسی جماعتاں دے اک دوجے تے حملیاں تے تبصرہ کردا رہیاں پر میرے پیش نظر حالات دیاں اوہ انگڑائیاں وی اہم رہندیاں نیں جہناں تے بوجوہ ذرائع ابلاغ توجہ نہیں دے پاندے۔ بلوچ روایتاں وچ عورتاں دا احترام اے۔ کہیا جاندا اے کہ بلوچ دی سواری تے عورت تے حملہ ناقابل معافی جرم سمجھیا جاندا اے۔ انگریز نے بلوچ سرداراں دی ہر طرح نال تذلیل کیتی پر اوہناں دیاں عورتاں دے معاملے وچ احتیاط دا مظاہرہ کیتا۔
بلوچ سماج خوبصورت اے۔ ساڈا بچپن پی ٹی وی دے اوہناں نغمیاں دا زمانہ اے جدوں اہل لہور فیض بلوچ دی دھن تے جھومدے سن پنجاب وچ بلوچ آبادی دے ان گنت پنڈ نیں۔ چاکر اعظم دا مقبرہ ست گھرا اوکاڑہ وچ اے۔ بلوچ قوم دا سیاسی و ثقافتی تعلق پختون‘ پنجابی تے سن دھی قوم دے نال رہیا اے۔ نواں سوال ایہ ابھر رہیا اے کہ ایس صدیاں تے کھلری محبت دا جغرافیائی ناں جدوں پاکستان رکھ دتا گیا تے کجھ قوتاں نے بلوچ لوکاں نوں ورغلانا شروع کر دتا۔ ایہدے نتیجے وچ تشدد دا اک سلسلہ اے جہنوں علیحدگی پسندی دی تحریک کہیا جاندا اے۔ نفرت اینی گہری کیتی جا رہی اے کہ ہن ایہ سوال کوئی کر ای نہیں رہیا کہ محبت دے پاکستان توں علاوہ کوئی منزل نہیں۔ بلوچستان وچ تشدد دے سلسلے وچ اک نواں رنگ شامل ہویا اے۔ علاقے وچ غربت اے‘ عسکریت پسند کسے بیرونی سرمایہ کاری دے راہ وچ رکاوٹ بن جاندے نیں۔ کوئی سکول‘ ہسپتال‘ کارخانہ تے کاروبار قائم ہون وچ مزاحم ہوندے نیں۔ لوکاں نوں دسیا جاندا اے کہ ریاست اوہناں دی معاشرتی ترقی دی دشمن اے۔ نواں ہتھکنڈا ایہہ وے کہ معصوم تے محترم عورتاں دی غربت تے مجبوریاں نوں ریاست نال نفرت دی اگ تے ایناں پکایا جاندا اے کہ اوہ آسانی نال تخریبی کاروائیاں وچ استعمال ہون لئی اپنے آپ نوں پیش کر دیندیاں نیں۔ شرپسند عناصر عورتاں دی غربت تے مجبوریاں دا فائدہ چک رہے نیں اجہے واقعات وی سامنے آ رہے نیں کہ بیوہ عورتاں دی برین واشنگ کیتی جاندی اے۔ اوہناں نوں دسیا جاندا اے کہ اوہناں دے مسئلیاں دی وجہ ریاست اے۔ ایہ سب اینی ہشیاری نال ہو رہیا اے کہ ایہناں وچاریاں عورتاں نوں پتہ ای نہیں لگ پاندا کہ اوہ جہناں نوں اپنا ہمدرد سمجھ رہیاں نیں اصل وچ ایہناں دی وجہ نال بلوچستان دے کجھ علاقے ترقی توں محروم تے لوک غربت دا شکار نیں۔
سی ٹی ڈی بلوچستان دی ماحل بلوچ توںحاصل کیتی گئی جانکاری بالکل سجری اے۔ سی ٹی ڈی دے مطابق کوئٹہ وچ اک اجہے گروہ دی موجودگی دا پتہ لگا جہدا تعلق اک کالعدم دہشت گرد تنظیم نال سی۔ بی ایل ایف دے ایس گروہ دا لیڈر یوسف خان سی۔ ایہ ڈاکٹر اللہ نذر بلوچ دا قریبی ساتھی سی۔ انٹیلی جنس جانکاری دی بنیاد تے ستاراں فروری نوں اک خاتون ماحل بلوچ نوں خودکش جیکٹ سنے پھڑیا گیا۔ خاتون نے منیا کہ اوہدا شوہر بی ایل ایف دا رکن اے۔ ماحل بلوچ دے بارے ہور پتہ لگا اے کہ اوہ اک پنڈ گیاب دی رہائشی اے۔ ایہ پنڈ ضلع کیچ دا اے۔ ماحل بلوچ اک غریب خاندان وچ پیدا ہوئی۔ آل دوالے دا ماحول اجیہا سی کہ ریاست دے خلاف گل کرنا عام سی۔ دسیا جاندا اے 2013ء وچ اوہدا ویاہ اجہے خاندان وچ ہویا جہدا تعلق بی ایل ایف نال سی۔ ایہ خاندان دہشت گردانہ سرگرمیاں وچ ملوث رہیا اے۔ اوہدے والدین نوں شہر دی عسکریت پسندانہ سرگرمیاں دا پتہ لگا تے اوہناں نے ماحل نوں طلاق لئی راضی کرن دی کوشش کیتی پر اوہ اپنے آن والے بچے دے خیال نال طلاق تے تیار نہ ہوئی۔ ماحل بلوچ کراچی منتقل ہوئی تے اوتھے بی ایل ایف دے لوکاں نے اوہدے نال رابطہ کیتا۔ بی ایل ایف والے مسلسل اوہنوں تیار کردے رہے کہ اوہ اوہناں دا ساتھ دیوے۔ شروع وچ اوہنوں دوجیاں عورتاں نوں اپا ہم خیال بنان تے ریلیاں وچ شریک ہون دا ہدف دتا گیا۔ بلوچستان لبریشن فرنٹ ایس دوران اوہدے گھر وچ وکھووکھ ذرائع نال خرچے گھلدی۔ ایس ساری ٹرانزیکشن دے ثبوت بنک اکائونٹس‘ موبائل ٹرانسفر دے راہیں ملدے نیں۔ ماحل بلوچ نوں پہلے اوہدی نند بی بی گل تے فیر دوجی نند پری گل پیسے گھلدی تے معاملات ویکھدی رہی۔
ماحل بلوچ نے حراست دوران دسیا کہ اوہدا سسرال اوہنوں اوہدیاں بچیاں دی وجہ نال بلیک میل کردا رہیا کہ اوہ کسے نال تنظیمی معاملیاں دا ذکر نہ کرے نہیں تے اوہدے توں دوویں دھیاں کھوہ لئیاں جان گئیاں۔ ماحل بلوچ دسدی اے کہ بی ایل ایف دے اک کمانڈر شربت خان نے اوہنوں گرفتاری توں اک ہفتہ پہلاں اک جیکٹ گھلی جو اوہنے اک ہفتے تک گھر وچ چھپا کے رکھی۔ گرفتاری ویلے ماحل بلوچ ایہ جیکٹ کسے دوجے بندے نوں دین لئی گھروں نکلی سی۔ بلوچ سماج وچ خواتین قبائل دے جھگڑے ختم کران وچ اہم کردار ادا کردی رہی اے حالیہ دیہاڑیاں اک بلوچ سردار دی حراست وچ جدوں خاتون نے قرآن چک کے رہائی دی اپیل کیتی تے پورے ملک وچ بڑا سخت ردعمل سامنے آیا۔ ایسے ردعمل دے نتیجے وچ سردار عبدالرحمن نوں اک خاتون تے دو نوجواناں دے قتل دے الزام وچ پھڑیا گیا۔ اجہے وچ پراپیگنڈا تے مبنی خبراں تے غلط بندیاں دیاں گلاں وچ آ کے بلوچ عورتاں دی منفی تصویر پیش کیتی جا رہی اے۔٭