عمران خان نوں سیاست توں نااہل کرن دی چالاں

مینوں قتل کرن لئی اک ات گرد تنطیم نوں کرپشن دا سرمایہ فراہم کیتا اے

قیوم نظامی

پاکستان دے پچھلے وزیراعظم عمران خان نے ویڈیو لنک اتے خطاب کردیاں کہیا اے کہ اوہناں دے خلاف پلان سی تیار کیتا گیا اے جہدے ماسٹر مائنڈ پچھلے صدر پاکستان آصف علی زرداری نیں۔ اوہناں نے اک ات گرد تنطیم نوں کرپشن دا سرمایہ فراہم کیتا اے۔ ایس تنظیم وچ ایسے لوک وی شامل نیں جو خفیہ ایجنسی دی سہولت کار نیں۔ ایہہ ات گرد تنظیم اوہناں نون قتل کرے گی۔ عمران خان نے کہیا کہ جدوں اوہناں نے حکومت سنبھالی تے ایس ویلے وی چار لوکاں نے اوہناں دے قتل دا منصوبہ تیار کیتا سی جہدے بارے اوہناں نے اک ویڈیو تیار کر کے محفوظ مقام اتے رکھوا دتی سی تے عوام نوں وی اعتماد وچ لے لیتا سی۔ پلان اے دی نکامی مگروں پلان بی تیار کیتا گیا جہدے مطابق عمران خان نوں توہین مذہب دے الزام وچ قتل کروانا سی۔ پلان بی دے مطابق قاتلانہ حملہ عمران خان اتے ہو چکیا اے جہدے وچ اللہ تعالیٰ نے اوہناں نوں معجزانہ طور تے محفوظ رکھیا۔ عمران خان نے ایس حملے بارے وی عوام نوں اعتماد وچ لے لیتا سی۔ عمران خان دے بیان دے مطابق ہن پلان سی اتے عملدرآمد کیتا جاوے گا جو آصف علی زرداری دی آشیرباد نال تیار کیتا گیا اے۔ عمران خان کہندے نیں اوہناں دا ایمان اے کہ زندگی تے موت اللہ دے ہتھ وچ اے ایس لئی اوہ عنقریب عوامی رابطے اتے نکلن گے۔ پاکستان پیپلز پارٹی دے چیئرمین تے وزیرخارجہ بلاول بھٹو زرداری نے عمران خان دے الزام اتے گہری تشویش دا اظہار کیتا اے تے کہیا اے کہ عمران خان نے جھوتا بیان جاری کر کے خود اوہناں دی تے اوہناںدے والد دی جان نوں خطرے وچ پا دتا اے۔ اوہناں نے کہیا کہ اوہناں دے خاندان دے تن افراد پہلے ای شہید ہو چکے نیں مگر پی پی پی نے کدی کسی دوجے دی زندگی نوں خطرے وچ نہیں پایا۔ پی پی پی دی قیادت نے عمران خان دے خلاف قنونی چارہ جوئی کرن دا فیصلہ کیتا اے تے وکلا نے آصف زرداری ولوں عمران خان دے نام لیگل نوٹس ارسال کیتا اے جہدے وچ عمران خان توں چودہ دناں دے اندر غیر مشروط معافی منگن دا مطالبہ کیتا گیا اے جے اوہناں نے معافی نہ منگی تے اوہناں دے خلاف دس ارب روپے دا ہتک عزت دے ہرجانے دا دعویٰ دائر کیتا جاوے گا۔ بدقسمتی نال پاکستان پہلاں ای ات گردی دا مرکز بنیا ہویا اے۔ پشور وچ ات گردی دے المناک سانحہ نے پوری قوم نوں سوگوار کردتا اے۔ ایہناں حالات وچ پاکستان دے لیڈراں دا ایہہ فرض اے کہ اوہ اپنے بیاناں دے سلسلے وچ محتاط رہن تے ایسے بیانات جاری نہ کرن جہناں نال نفرت عصہ تے اشتعال پیدا ہوندا ہووے۔
عمران خان اپنے سیاسی مخالفاں دی مختلف سازشاں تے چالاں بارے عوام نوں اعتماد وچ لیندے رہندے نیں۔ عمران خان دے حامی زندگی دے ہر شعبہ نال تعلق رکھدے نیں تے ریاستی اداریاں وچ وی عمران خان دے چاہن والے موجود نیں جو اوہناں نوں خفیہ اطلاعات دیندے رہندے نیں۔
عمران خان پاکستان دے مقبول ترین لیڈر نیں۔ اگلے انتخابات جے صاف تے شفاف ہوئے تے اوہ اک واری فیر پاکستان دے وزیراعظم منتخب ہو سکدے نیں۔ ریاستی ادارے شدید دبائو وچ نیں ایس لئی اوہناں لئی انتخابی نتائج نوں ’’مثبت‘‘ بنانا ممکن نہیں رہیا۔امریکہ کدی نہیں چاہے گا کہ عمران خان اک واری فیر منتخب ہو کے وزیراعظم بن جان تے جنوبی ایشیا وچ امریکی مفادات خطرے وچ پے جان۔ مسلم لیگ نواز تے پی پی پی دے لیڈر عمران خان دی عوامی مقبولیت توں بہت زیادہ خوفزدہ نیں اوہ انتخابات وچ عمران خاند ا مقابلہ نہیں کر سکدے۔ عمران خان دی عوامی مقبولیت اوہناں دی اپنی زندگی لئی خطرہ بن چکی اے۔ جے عمران خان کمپرومائز تے مک مکا کرن والے سیاستدان ہوندے تے سٹیٹس کو دے حامی اوہناں نوں قبول کر لیندے۔ عمران خان نوں سیاست نال نااہل کرن دے دعوے وی کیتے جاندے رہے نیں۔ غیر جانبدار مبصرین دے مطابق جے عمران خان نوں نااہل کر وی دتا جاوے تے اوہناں دی مقبولیت گھٹ نہیں ہووے گی بلکہ ہور ودھ جاوے گی۔ برصغیر ہندوستان دی تریخ دے تناظر وچ عمران خان دے قتل دے امکانات نوں رد نہیں کیتا جا سکدا۔ بھارت وچ مہاتما گاندھی اندرا گاندھی تے راجیو گاندھی نوں قتل کیتا گیا۔ پاکستان وچ لیاقت علی خان ذوالفقار علی بھٹو بے نظیر بھٹو نوں شہید کیتا گیا۔ عمران خان اتے اک قاتلانہ حملہ ہو چکیا اے جد کہ اک ہور حملے دے امکانات موجود نیں۔ پی ڈی ایم دی حکومت عمران خان دی عوامی مقبولیت نوں گھٹ کرن لئی مختلف حربے تے ہتھکنڈے آزما چکی اے جہڑے کامیاب نہیں ہو سکے۔ سیاست دے نال ارباں روپے دے مفادات جڑ چکے نیں کھرباں روپے دی سیاست نے مقبول عوامی لیڈراں دی جاناں نوں خطرے وچ پا دتا اے۔ عمران خان چیلنجاں تے خطریاں دا مقابلہ کرن تے آمادہ نظر آندے نیں۔ پاکستان دی خفیہ ایجنسیاں دا ایہہ قومی فریضہ اے کہ اوہ پاکستان دے مقبول ترین لیڈر دی جان دی حفاظت کرن لئی خصوصی انتظامات کرن۔ جے خدانخواستہ عمران خان اتے قاتلانہ حملہ ہویا تے اوہ شہید ہوئے تے ایس قومی المیہ دے سب توں منفی اثرات قومی سلامتی تے دفاع دے ادارے اتے ای پین گے۔ پاکستان نوں بیرونی جارحیت توں بچانا تے اندرونی استحکام برقرار رکھنا پاک فوج دا آئینی فرض اے لہٰذا ایہدی ایہہ ذمہ واری اے کہ اوہ پاکستان دے سیاسی لیڈراں دی جاناں دی حفاظت لئی خصوصی انتظامات کرے تاں جے پاکستان دی سلامتی تے آزادی نوں اندرونی خطریاں توں محفوظ رکھیا جا سکے۔
پاکستان اج کل شدید نعویت دے معاشی عدم استحکام دا شکار اے۔ ایہناں حالات وچ پاکستان غصے‘ نفرت اشتعال انگیزی مایوسی تے قتل و غارت گری دا متحمل نہیں ہو سکدا۔ پاکستان دے دشمن ملک دی ایہہ ریاستی پالیسی اے کہ اوہ پاکستان نوں اندروں توڑن دی ہر ممکن کوشس کرے گا ایہناں حالات وچ پاکستان نوں قومی اتحاد ہم آہنگی تے یکجہتی دی لوڑ اے۔ پاکستان دے سارے سیاستداناں نوں قوم دے وسیع تر مفاد وچ اک میز اتے بیٹھ کے سیاسی تے معاشی چارٹر اتے سنجیدہ غوروخوض کرنا چاہیدا اےﷺ پاکستان دی ساری سیاسی جماعتاں دے سنجیدہ پاکستان تے عوام دوست افراد دا وی ایہہ قومی نظریہ اے کہ اوہ اپنی اپنی جماعتاں نال وابستگی توں اتے اٹھ کے پاکستان تے عوام دے مفاد وچ سوچن تے اپنی جماعتاں دی لیڈراں اتے دبائو پان کہ اوہ اک نویں سوشل کنٹریکٹ اتے آمادہ ہو جان۔ پاکستان دے پچھلے وزیراعظم شاہد خاقان عباسی پچھلے وزیر خزانہ مفتاح اسماعیل تے پچھلے سینیٹر مصطفی نواز کھوکھر پہلے ای قوم دے وسیع تر مفاد وچ رائے عامہ نوں بیدار کرن دی مخلصانہ کوشش کر رہے نیں۔ پاکستان دے پڑھے لکھے مہب الوطن شخصیات دا فرض اے کہ اوہ اوہناں خلوص کوششوں دی تائید تے حمایت کریں۔پاکستان دی ساری پارلیمانی جماعتاں جے دو سال دی قومی حکومت بنان تے آمادہ ہو جان تے پاکستان دے سیاسی تے معاشی بحران اتے قابو پایا جا سکدا اے۔