ساڈی سیاست وچ سب چلدا اے

خالد مسعود خان

چلو جی الیکشن دی بلی وی تھیلے چوں باہر ای آ گئی۔ ایہ بلی شروع توں ای تھیلے وچ بری طرح تڑپ رہی سی تے باہر آن لئی بے چین سی ایس لئی ہن ایہ باہر آ ای گئی اے۔ مینوں ذاتی طور تے کئی دن توں ایہ اندازا ہو رہیا سی کہ میری خواہش تے پچھلے اندازیاں دے الٹ دوہاں صوبائی اسمبلیاں دے الیکشن ہونا ہن مشکل ہوندا جا رہیا اے۔ کجھ دیہاڑ پہلاں تک ایہ صرف قیاس سی جو حالات نوں ویکھدے ہوئے لایا سی پر کجھ دیہاڑ پہلاں جدوں میری ملاقات اپنے اک دوست نال ہوئی جو پیپلزپارٹی ولوں ایہناں ملتوی ہو جان والے انتخابات وچ اک حلقے توں امیدوار سی تے ایہ قیاس یقین دے نیڑے آن لگ پیا۔دوستو تسیں یقین کرو ایہ کوئی فرضی کردار نہیں جو صرف کالم وچ رنگ بھرن تے اپنی گل نوں اگے ودھان لئی بھرتی کیتا گیا اے سگوں ایہ اک حقیقی کردار اے پر دوستی دا تقاضا اے کہ اوہدا ناں کالم دی زینت نہ بنایا جاوے ایس لئی اوہدا ناں نہیں لکھ رہیا۔
ایس دن اوہ اپنے کاغذات نامزدگی جمع کروا کے میرے کول آیا تے پچھن لگا کہ میرے خیال وچ الیکشن ہو رہے نیں یاں نہیں؟ میں کہیا جیویں جیویں عمران خان دی عوامی مقبولیت وچ وادھا ہو رہیا اے الیکشن ہون دے امکانات اوسے حساب نال گھٹدے جا رہے نیں۔ میں تہانوں راجن پور دے حلقہ این اے 193 دے نتیجے دے بعد کہیا سی کہ ہن مینوں فوراً الیکشن ہوندے وکھائی نہیں دے رہے اج فیر تہانوں ایہو کہہ ہیا واں کہ بھاویں تسیں کاغذات نامزدگی جمع کروا آئے ہو مینوں ایہناں دے انعقاد دے بارے شک اے۔ میرا اوہ دوست کہن لگا کہ میں ہنے گیلانی ہائوس توں آ رہیا واں۔ میری سید یوسف رضا گیلانی نال ملاقات ہوئی تے اوہناں آکھیا کہ تسیں کاغذات تے جمع کروا دتے نیں ہن تسیں ٹکٹ لئی پارٹی دے جاری کردہ فارم نوں پُر کرکے گھل دیو پر الیکشن ہن نہیں سگوں پنج چھ مہینے بعد ہون گے تے قومی تے ساریاں صوبائی اسمبلیاں دے الیکشن اکٹھے ہون گے میں اپنے دوست نوں کہیا کہ ایہ یوسف رضا گیلانی دے اندازے یاں خواہش نال اگلی سٹیج دی گل لگدی اے۔ اوہ جس اعتماد نال تہانوں دس رہے سن اوہدے توں صاف لگدا اے کہ ایہ گل کدھرے نہ کدھرے طے ہو چکی اے تے فیصلہ ساز اک ہور احمقانہ فیصلے دے مرتکب ہو رہے نیں۔
حقیقت ایہہ وے کہ اپنی حکومت دے خاتمے توں پہلاں ہر آن والا دن جس طرح عمران خان دی مقبولیت دا تختہ کر رہیا سی تے عمران خان دی غیرمقبولیت وچ وادھا کر رہیا سی ہن آن والا دن عمران خان دی مقبولیت وچ وادھا کر رہیا اے یعنی سائیکل بالکل ای پٹھا چل پیا اے۔ ایہناں حالات وچ منصوبہ سازاں تے فیصلہ سازاں دے ہتھاں دے طوطے اڈ چکے نیں تے حواس باختہ نیں۔ اوہناں نوں کوئی سمجھ نہیں آ رہی کہ اوہناں نے کیہ کر دتا اے تے ایس توں وڈا مسئلہ ایہہ وے کہ اوہناں نوں ایہ سمجھ نہیں آ رہی کہ ہن اوہ کیہ کرن؟ اوہناں دیاں ساریاں تدبیراں اوہناں لئی مصیبت بن چکیاں نیں تے جس طرح ایہناں دیہاڑیاں عمران خان دی ہرالٹی گل تے غلط تدبیر اوہناں لئی مقبولیت دا نواں بوہا کھولدی اے اوسے طرح منصوبہ سازاں دا ہر منصوبہ تے ہر تدبیر اوہناں دے گلے پے رہی اے۔
بقول شاہ جی‘ افراتفری تے حواس باختگی دا ایہ عالم اے کہ الیکشن ملتوی کرن دے اعلان والے دن زبردستی رمضان دے آغاز دا اعلان کرکے حسب معمول قوم نوں اک ہور ٹرک دی بتی دے پچھے لان دی کوشش کیتی گئی اے۔ بھلا چن رات دس وجے دے بعد رویت ہلال کمیٹی والیاں دے چوبارے توں علاوہ ہور کتھے چڑھدا اے؟ اجے تے رویت ہلال کمیٹی والے جلدی وچ سن تے افراتفری وچ چن چڑھا کے رات یاراں وجے گھر چلے گئے‘ جے اوہ تھوڑی دیر ہور بیٹھدے تے اوہ یقینا سورج وی چڑھا لیندے۔ اوہناں نے جہڑیاں تھاواں تے چن ویکھن دا اعلان کیتا اے اوہناں وچوں گھٹو گھٹ ساڈے جانن والے کسے مقامی بندے نے ایہدی تصدیق نہیں کیتی۔ اک واری انج ہویا کہ تراویح پڑھ کے فارغ ہوئے تے عید دا اعلان ہو گیا۔ ہن ایس ورھے تراویح دا ویلا نکل گیا تے روزے دا اعلان ہو گیا۔ میرا خیال اے حکومت نے سوچیا ہووے گا کہ پچھلے والی تراویح ضائع نہ جاوے اوہناں نوں ایس ورھے استعمال کر لیا جاوے۔
جس طرح نااہلی میاں نوازشریف دی مسلم لیگ ن تے گرفت گھٹ نہیں کر سکی اوسے طرح عمران خان دی متوقع نااہلی دی خوش فہمی وچ مبتلا دن نوں سپنے ویکھن والیاں لئی عرض اے کہ نااہلی دی صورت وچ عمران خان تحریک انصاف دے قائد دے طور تے پارٹی تے اپنی پوری گرفت برقرار رکھن گے تے سارے فیصلے اوہناں دی مرضی تے خواہش تے ہون گے تے کسے وچ اینی جرأت نہیں ہووے گی کہ ایہناں فیصلیاں تے اعتراض تے رہیا اک پاسے چون چرا وی کر سکے۔ حکومت توں فراغت دے بعد والا عمران خان تے اوہناں توں پوری طرح سنبھالیا نہیں جا رہیا‘ نااہلی دے بعد عمران خان ہور بے خوف تے بے دھڑک ہو جاوے گا۔ جیویں جیویں ایہ عمران خان نوں بے دست و پا کرن دی کوشش کردے جان گے اویں اویں عمران خان دے سروں کسے چیز دے کھو جان دا ڈر ختم ہوندا جاوے گا تے اوہ پہلے توں وی زیادہ فرنٹ فٹ تے آ کے کھیڈے گا تے اوہدی جارحیت وچ ہور وادھا ہوندا جاوے گا۔٭