سیاسی پکڑ دھکڑ پورے عروج تے

عمران خان نوں قتل یا نااہل کرن لئی ایڑی چوٹی دا زور لایا جا رہیا اے تاں جے پاکستان نوں آمراں دی مرضی تے منشا دے مطابق دھکیلیا جا سکے

لکھت:خالد بلوچ

اج کل پاکستان دے معاشی تے سیاسی حالات زبان زدعام نیں۔ پوری دنیا تے دنیا وچ پھیلے معاشی ادارے بڑی گہری نظر نال پاکستان دی ڈگدی ساکھ دا جائزہ لے رہے نیں جد کہ دن بدن پاکستان دیوالیہ ہون دے قریب ترین ہوندا جا رہیا اے۔ پاکستان اک جمہوری ملک اے جد کہ پاکستان دے قیام توں لے کے ہن تک ایہہ ملک فوج دا دانستہ‘ نادانستہ عمل دخل رہیا اے۔ پاکستان وچ 30سال توں ودھ فوجی مارشل لاواں دی زد وچ رہیا جد کہ باقی ویلا انج تے سیاستداناں دے چہرے لا کے فوجی عامر ای ملک اتے قابض رہے نیں۔ پاکستان جمہوری دنیا دا واحد ملک اے جہدے وچ کوئی وی وزیراعظم اپنی مدت پوری نہیں کر سکیا تے پاکستان شاید ایسے لئی ترقی نہیں کرسکیا تے آمراں نے کدی وی پاکستان وچ اک مستحکم حکومت قائم نہ ہون دتی۔ جہدے توں کوئی وی حکومت آزادانہ مستحکم فیصلے نہیں کر سکی تے انج جوڈیشری‘ انتظامیہ سنے پاکستان دا ہر ادارہ کمزور تے کرپٹ ہویا۔ انصاف دا معیار انج تے دنیا وچ 133ویں نمبر تے اے لیکن آن والے دناں وچ ایہہ معیار ہور ڈگے گا تے پاکستان اخلاقی پستیاں سنے تریک ترین حالات دے انھیریاں وچ ڈگدا چلا جاوے گا۔
پاکستان دے پچھلے چیف آف آرمی جرنل باجوہ نے پاکستان وچ رجیم دی تبدیلی دا جہڑا بھیانک تے پاکستان کش منصوبہ بنایا تے ایس جال وچ پاکستان دی سیاسی جماعتاں نوں اپنے مکروفریب وچ پھسا کے اک چلدی ہوئی حکومت نوں رخصت کر کے پاکستان نوں سیاسی تے معاشی اعتبار نال تباہ و برباد کر دتا تے اج آئی ایم ایف سنے ساڈے سارے دوست ملک وی ساڈا ساتھ چھڈ چکے نیں۔
خزانہ خالی اے۔ کابینہ دا سائز حیران کن حد تک ودھیا مطلب 100دے کول اے جہدے وچ روزانہ وادھا ہوندا جا رہیا اے۔ کجھ معاشی تجربہ کار پاکستان نوں ڈیفالٹ کر چکے نیں تے کجھ ایہنوں ریڈ لائن توں کراس کر چکے نیں۔ ڈالر بے قابو ہو چکیا اے۔ مہنگائی‘ بیروزگاری‘ بیکاری‘ بیماری تے غذائی قلت دے نال تیل‘ ڈیزل تے دوجے بحران سر چک رہے نیں لیکن حیران کن حد تک موجودہ حکومت تے مقتدر ادارے خموش تماشائی بنے بیٹھے نیں۔ روم سڑ رہیا سی تے نیرو بانسری وجا رہیا سی۔ ایہہ پاکستان دی معاشی تباہی دی وڈی مختصر تصویر اے۔ ہن اسیں پاکستان دی قومی سلامتی ول ویکھو تے ساڈی موجودہ خارجہ پالیسی دا ایہہ عالم اے کہ ساڈا وزیر خارجہ کدی کدی پاکستان دا دورہ کردا اے تے پاکستان اپنے ہمسایہ ملک افغانستان نال اپنے تعلقات نوں اینا وگاڑ چکیا اے کہ پچھلے دناں پشور وچ ہون والے اندوہناک حادثہ وچ سینکڑاں جاناں ضائع ہو گئیاں۔ ایس طرحاں پاکستان اک واری فیر ات گردی دی زد وچ آ چکیا اے تے ایس ویلے حالت جنگ وچ اے تے کسی وی وڈے سانحے دا شاید انتظار کر رہیا اے۔ اللہ حفاظت فرماوے۔
پاکستان دی دو وڈی اسمبلیاں نوں توڑیا جا چکیا اے تے پاکستان دی سب توں وڈی سیاسی جماعت پاکستان تحریک انصاف پاکستان دی اسمبلیاں تے پارلیمنٹ توں باہر اے تے 60 فیصد پاکستان دی قومی اسمبلی خالی اے جد کہ دونویں صوبیاں وچ نران حکومتاں کم کر رہیاں نیں۔ پاکستان دا الیکشن کمیشن مکمل طور تے جانبدار ہو کے رہ گیا اے تے اوہدی کوشش اے کہ پاکستان دی سب توں وڈی پارٹی نوں دھکیل کے دیوار نال لایا جاوے تے اپنی مرضی دے انتخابات کروا کے پاکستان وچ ہور سیاسی استحکام وچ کمی تے افراتفری وچ وادھا پیدا کر کے مہنگائی توں توجہ ہٹائی جا سکے۔
پاکستان دی عدالتاں اکھاں اتے پٹی بنھے ہوئے نیں۔ سیاسی پکڑ دھکڑ پورے عروج تے اے تے عمران خان نوں قتل یا نااہل کرن لئی ایڑی چوٹی دا زور لایا جا رہیا اے تاں جے پاکستان نوں آمراں دی مرضی تے منشا دے مطابق دھکیلیا جا سکے۔ پاکستان دی 75 ورھیاں دی تریخ وچ شاید پہلی واری انج ویکھن وچ آیا اے کہ پاکستان وچ سارے سٹیک ہولڈراں نوں جہنان وچ فوجی آمراں سنے ساری سیاسی جماعتاں تے الیکشن کمیشن تے دوجے جج جرنیل جرنلسٹ ساریاں نوں اک حمام وچ اکٹھے ننگا کر کے عوام نوں رکھ دتا گیا اے۔ ایتھے میں ایہنوں اللہ دا عذاب وی آکھاں گا جتھے اک پلیٹ فارم تے ساری قوتاں نوں اک جگہ اکٹھا کر کے پاکستان اتے نازل کردتا گیا۔ اوتھے عوام دے دلاں وچ عمران خان لئی محبت پا دتی گئی جد کہ دوجے پاسے اللہ تعالیٰ نے ایہناں قوتاں دے دلاں وچ عمران خان دی دہشت تے خوف پیدا کردتا تے اج کسی نوں پاکستان دی ڈبدی کشتی دی کوئی فکر نہیں بلکہ اوہناں نوں صرف عمران خان نوں منظر توں ہٹان لئی ہرحربہ استعمال کیتا جا رہیا اے۔ صحابہ کیف باغی ہو کے قریبی پہاڑ دی اک غار وچ لک گئے تے کجھ دیر وچ ای اوتھے فوجاں پہنج گئیاں لیکن غار دے اندر داخل کوئی نہیں ہو سکیا۔ انج دقیانوس جو کہ حاکم وقت سی اوہنے غار دے بوہے نوں اٹاں دی دیوار لا کے بند کردتا۔ اللہ فرماندا اے کہ فیر اسیں اوس غار وچ اینا خوف پیدا کردتا کہ کوئی وی اوہدے وچ داخل نہیں ہو سکیا۔ بالکل محسوس ہوندا اے کہ اللہ نے حق تے باطل نوں آمنے سامنے کھڑا کر کے پاکستان نوں دنیا وچ عزت و توقیر عطا کرن لئی فیصلہ کر لیتا اے تے تسیں چھیتی ای ایسی تبدیلی محسوس کرو گے کہ باطل قوتاں ہمیشہ لئی دم توڑ دیاں گی تے پاکستان دے اندر تے باہر وطن دے دشمناں نوں لذت تے رسوائی دے سوا کجھ نہیں ملے گا۔ حالانکہ ایس ویلے پاکستان نوں معاشی ‘ سیاسی تے سماجی تے غذائی بحران دا جہڑا سامنا اے‘ ات گرداں نے جیویں پنجے گاڑ لیتے نیں۔ ایس توں نظر آندا اے کہ پاکستان سینکڑاں سال پچھے چلا گیا اے لیکن اللہ دا وی اک پلان ترتیب دتا ہوندا اے تے اوہ سارے حاکماں دا حاکم اے۔