ساڈیاں سڑکاں تے ٹریفک دی بدحالی

ہر کوئی چاہندا اے کہ اوہدا ہارن تیزی نال وَجے لیکن اوہدے پچھے والے رستہ لئی ڈِپر نہ مارن

لکھت:مظہر علی

بہت سارے پلس والیاں نال سلام دعا اے۔ نہ مینوں کدی پلس نال کوئی کم پیا تے نہ ای میں کدی کوئی ایسا غلط کم کیتا اے کہ پلس دے جوان مینوں تلاش کردے پھرن لیکن فیر وی کدھرے نہ کدھرے پلس خاص کر ٹریفک پلس والیاں نال ملاقات ہو ای جاندی اے۔ کدی سڑک کنڈے‘ کدی کسے سیمینار وچ تے کدی کسے سرکاری دفتر وچ۔ جدوں وی ملنے آں اسیں ہمیشہ پلس دے بہادر جواناں توں اک ای سوال کرنے آں کہ خدارا‘ چوک توںذرا ہٹ کے وَڈیاں گڈیاں‘ رکشیاں تے ٹرالیاں دے چالان کرن دے بجائے چوک وچ پھسی ٹریفک نوں چالوں رکھن ول وی دھیان دے لیا کرو۔ ایہدے مگروں جے کوئی خلاف قنون گڈی سفر کردی نظر آوے تے اوہدا چالان کرن وچ کوئی حرج نہیں لیکن اکثر اک ای جواب ملدا اے کہ ساڈی ڈیوٹی اسیں بہتر جاننے آں‘ تسیں جائو اپنا کم کرو۔ کئی واری اخباراں وچ خبر پڑھی اے کہ ٹریفک پلس دے جانبازاں نے ایس مہینے اینے چالان کیتے تے اینے لکھ روپے قومی خزانے وچ جمع ہوئے لیکن کدی ایہہ خبر نظراں توں نہیں لنگھی کہ ٹریفک پلس نے ایس مہینے اینے لوکاں نوں لائن دی پابندی کردے ہوئے سڑک اتے چلن دی ترغیب دتی ہووے۔ حال ایہہ ہے کہ پڑھے لکھے لوک ہون یا انپڑھ۔ ریڑھی والے ہون یا کروڑاں دی لگثری گڈی والے۔ دُوجیاں نوں نصیحت کرن والے موٹیویشنل سپیکر‘ مسجداں وچ درس دین والے سکول تے کالج وچ بچیاں نوں بہتر زندگی دا گر سکھان والے‘ ایہناں ساریاں وچوں اکثریت ایسی اے کہ جیویں ای سڑک اتے آندے نیں اپنے پڑھے پڑھائے رٹے رٹائے سارے سبق بھل جاندے نیں۔ ہر کوئی ایہہ کوشش کردا اے کہ اوہ کسے نہ کسے طرحاں سب توں اگے نکل جاوے۔ ہر کوئی ایہہ چاہندا اے کہ اوہدا ہارن تے تیزی نال وَجے لیکن اوہدے پچھے والے اوہنوں رستہ دین لئی ڈِپر نہ مارن۔ کہندے نیں ستر دی دہائی تک میرے ملک دی شاہراواں اتے ٹریفک دا نظام بہت چنگا ای نہیں بلکہ دنیا دے دوجے ملکاں لئی قابل تقلید وی قرارد تا جاندا سی لیکن پچھلے کجھ عشریاں وچ جیویں دا برا حال ساڈا سیاسی سماجی زندگی وچ ویکھیا جا رہیا اے ویسے ای ساڈیاں سڑکاں ٹریفک دی بدحالی دا رونا روندیاں نظر آندیاں نیں۔ اج توں 20,15 سال پہلاں شہر وچ کجھ مقامات اتے ای ٹریفک پولیس دے جوان کھڑے نظر آیا کردے سن لیکن ٹریفک دی حالت کافی بہتر سی لیکن بیڑا غرق ہووے قسطاں اتے گڈیاں ویچن دا آئیڈیا پیش کرن والیاں دا۔ میرے ملک دے ہر دوجے بندے جہدے کول کھٹارا موٹرسائیکل سی اوہنے بغیر ڈرائیونگ لائسنس بغیر کسے تربیت دے قسطاں اتے کار خرید لئی۔ لوک کہندے نیں کہ نواں لائسنس بنوانا آسان نہیں اے۔ بندہ جہنا مرضی ماہر ڈرائیور ہووے۔ ٹریفک پلس دے سامنے جا کے بے بس ہو جاندا اے۔ کجھ ٹرائی وچ فیل کردتے جاندے نیں تے بہت سارے سڑکاں اتے لگے اشاریاں دی زبان نہ بیان کر پان دی وجہ ڈرائیونگ لائسنس توں محروم رہ جاندے نیں۔ کجھ لوک کہندے نیں ٹرائی تے اشاریاں دی سمجھ نہ رکھن والا جے اپنی جیب وچ 20,15 ہزار روپے رکھ لووے تے اوہدے سارے مرحلے آسانی نال حل ہو جاندے نیں۔ ایہہ اک تلخ حقیقت رہی اے کہ ڈرائیونگ برانچاںوچ رشوت چلدی رہی اے۔ دور دی گل نہیں میرا اپنا اک ڈرائیور جہڑا میری ای گڈی نوں دس سال تک چلاندا رہیا اے اوہنوں اج توں کجھ سال پہلاں جدوں سارے سبق یادکروا کے کمپیوٹرالائسنس بنوان گھلیا تے اوہدی ساری ہوشیاری تے مستعدی اتے لائن لا دتی گئی تے اوہنوں 45دن مگروں دوبارہ آن نوں کہیا گیا۔ میرے کول آیا تے آکھیا ‘ راجہ صاحب تھوڑے جئے پیسے دین نال بہت سارے نکمے لوکاں دے لائسنس بن چکے نیں تے مینوں تسیں کہندے او کسے نوں پیسہ نہیں دینا۔ تہانوں پتہ ای اے کہ میں اک چنگا ڈرائیور آں تے اٹھوں تے چل کے سی ٹی او صاحب کول میری جائز سفارش کر دیو دور دی گل نہیں میرا اپنا اک ڈرائیور جہڑا میری ای گڈی نوں دس سال تک چلاندا رہیا اے اوہنوں اج توں کجھ سال پہلاں جدوں سارے سبق یادکروا کے کمپیوٹرالائسنس بنوان گھلیا تے اوہدی ساری ہوشیاری تے مستعدی اتے لائن لا دتی گئی تے اوہنوں 45دن مگروں دوبارہ آن نوں کہیا گیا۔ میرے کول آیا تے آکھیا ‘ راجہ صاحب تھوڑے جئے پیسے دین نال بہت سارے نکمے لوکاں دے لائسنس بن چکے نیں تے مینوں تسیں کہندے او کسے نوں پیسہ نہیں دینا۔ تہانوں پتہ ای اے کہ میں اک چنگا ڈرائیور آں تے اٹھوں تے چل کے سی ٹی او صاحب کول میری جائز سفارش کر دیو۔ سی ٹی او صاحب نوں آکھیا جناب ایہہ میرے کول دس سال توں گڈی چلا رہیا اے تے اوہناں دی مہربانی نال اوہ مرحلہ حل ہویا۔ کہن دا مقصد ایہہ ہے کہ جائز کم لئی سفارش دی لوڑ کیوں پئی۔ چلو سفارش‘ رشوت یا مہارت جیویں وی ہون لوک لائسنس تے حاصل کر رہے نیں۔ لیکن سڑک اتے گڈی کیویں چلانی اے ایہہ سبق کدھرے نہیں پڑھایا جا رہیا۔ا کثرایہہ فقرہ سنن نوں ملدا اے کہ گڈی ہووے گی تے اک دو واری ٹھوکن مگروں چلانی آ جاوے گی۔ کرن والا کم ایہہ اے کہ ڈرائیونگ ٹیسٹ لین والے خوف خدا کرن تے رشوت دے چکر وچ جان بوجھ کے لوکاں نوں فیل نہ کرو۔ فیر عوام وچ ٹریفک شعور اجاگر کرن لئی سکول تے مسجداں وچ تربیتی ورکشاپاں دا پربندھ کیتا جاوے۔ جمعہ دے بیانات وچ امام صاحبان تے عوامی تقریباں وچ مذہبی رہنما لوکاں نوں اخلاقیات دا مفہوم سمجھان دی کوشش کرن۔ لوکاں نوں سمجھان کہ رشوت دے کے حاصل کیتے جان والے لائسنس توں حاصل ہون والی کمائی حلال نہیں ہووے گی۔ لوکاں نوں ایہہ سبق دتا جاوے کہ جے مسجداں وچ صف بندی کیتی جاندی اے تے اوہدا مقصد عام زندگی وچ وی لائن دی پابندی کرنا اے۔ دین نام ای لوکاں نوں چنگا شہری بنان دا اے۔ استاد طلبا نوں سمجھان کہ غلط پاسے سفر کرن والے نہ صرف قنون دے مجرم نیں بلکہ بداخلاق بد تہذیب تے گنہگار وی نیں۔